Kungani Kumele Amakhosikazi Azehlise Kubomkawo?
‘Inhloko yowesifazana yindoda.’—1 KHOR. 11:3.
1, 2. (a) UJehova uyihlele njani indaba yobunhloko? (b) Yiphi imibuzo esizayiphendula esihlokweni lesi?
UMPHOSTOLI uPhawuli waphefumulelwa ukuthi abhale ukuthi ‘inhloko yamadoda wonke nguKhristu lokuthi inhloko kaKhristu nguNkulunkulu.’ (1 Khor. 11:3) Le yiyo indlela uJehova ahlele ngayo. Esihlokweni esidlulileyo sifundile ukuthi uJesu wayezehlisa ngaphansi kweNhloko yakhe uJehova futhi safunda lokuthi inhloko yamadoda nguKhristu. UJesu wayelomusa, elozwelo, elendaba labantu futhi ebaphatha kuhle. Amadoda kumele abe njalo ebandleni futhi kuqakatheke kakhulu ukuthi aphathe njalo amakhosikazi awo.
2 Abesifazana ke? Inhloko yabo ngubani? UPhawuli wabhala wathi: ‘Inhloko yowesifazana yindoda.’ Amazwi la atshoni kwabesifazana? Ayasebenza yini nxa umkakhe engakhonzi uJehova? Sekusitsho yini ukuthi owesifazana akumelanga akhulume akucabangayo nxa kusenziwa izinqumo ekhaya? Owesifazana angenzani ukuze adunyiswe? Imibuzo le sizayiphendula esihlokweni lesi.
“Ngizamenzela Umsizi”
3, 4. Uhlelo lobunhloko emulini lunceda njani?
3 UJehova nguye owatshoyo ukuthi ngubani okumele abe yinhloko emulini. Esedale u-Adamu wathi: “Akukuhle ukuthi umuntu aqhubeke eyedwa. Ngizamenzela umsizi omfaneleyo.” U-Adamu wathokoza kakhulu sekudalwe u-Eva yikho wathi: “Khathesi usekhona olithambo lamathambo ami lenyama yenyama yami.” (Gen. 2:18-24) U-Adamu lo-Eva babezakuba ngabazali babantwana abangelasono ababezagcwala emhlabeni futhi bakholise ukuphila kuze kube nini lanini.
4 Okudanisayo yikuthi akusabanga njalo ngoba bahlamukela uNkulunkulu baba lesono esabangela ukuthi bafe. (Bala uRoma 5:12.) Lanxa kunjalo uJehova kazange atshintshe ulokhe esithi indoda yiyo inhloko yomkayo. Imuli iba ngethokozayo kakhulu futhi izinto zihambe kuhle nxa indoda ingasebenzisa kuhle ubunhloko bayo lenkosikazi izithobe. Bobabili bazathokoza njengoba nje loJesu wayethokoza ukuzehlisa kuNhloko yakhe uJehova. Engakabuyi lapha emhlabeni uJesu ‘wayejabula phambi kukaJehova zikhathi zonke.’ (Zaga. 8:30) Isono sibangela ukuthi amadoda angabi zinhloko ezinhle lokuthi abesifazana behluleke ukuzehlisa ngendlela epheleleyo kubomkabo. Kodwa nxa amadoda lamakhosikazi bangaqhubeka besenza konke okusemandleni abo ukuthi bathandane futhi bathobeke bazathokoza emulini lanxa belesono.
5. Yindaba kumele abatshadileyo balalele lokho okutshiwo kuRoma 12:10?
5 Ukuze abatshadileyo bathokoze kumele balandele lokho okutshiwo liBhayibhili. Lithi: “Thandanani ngothando lobuzalwane, lithandane ngenhliziyo yonke. Khokhelani ekuhlonipheni abanye.” (Rom. 12:10) Kanti njalo kumele bobabili basebenze nzima ukuze ‘babe lomusa komunye lomunye, bazwelane njalo bathethelelane ngenhliziyo yonke.’—Efe. 4:32.
Nxa Omunye Engakhonzi UJehova
6, 7. Kungenzakalani nxa inkosikazi ekhonza uJehova ingazehlisa kumkayo ongakhonzi uJehova?
6 Kuthiwani nxa umkakho engakhonzi uJehova? Izikhathi ezinengi amadoda yiwo ayabe engakhonzi. Nxa sekunjalo inkosikazi kumele imphathe njani umkayo? IBhayibhili liphendula lisithi: “Makhosikazi, zehliseni kubomkenu ukwenzela ukuthi nxa bekhona abangalilaleliyo ilizwi, bacine sebekholwa ngenxa yokuziphatha kwamakhosikazi abo kungelalizwi elikhulunyiweyo ngoba sebezibonele ngawabo ukuziphatha kwenu okumsulwa lokuthi liyahlonipha kakhulu.”—1 Phet. 3:1, 2.
7 ILizwi likaNkulunkulu litshela amakhosikazi ukuthi azehlise kubomkawo abangakhonzi uJehova. Nxa inkosikazi ingaphatha kuhle umkayo kungenza ukuthi ancibilike abesefuna ukufunda iBhayibhili futhi mhlawumbe angacina esamukela iqiniso abhabhathizwe.
8, 9. Owesifazana ongumKhristu kumele enzeni nxa umkakhe engafuni ukutshintsha afunde ngoJehova?
8 Kodwa kuthiwani nxa kuyikuthi indoda ayifuni ukutshintsha ikhonze uJehova? IMibhalo ikhuthaza inkosikazi ukuthi iqhubeke itshengisa ubuntu obuhle lanxa kungabe kunzima kwezinye izikhathi. Ngokwesibonelo u-1 Khorinte 13:4 uthi: “Uthando luyabekezela.” Yikho inkosikazi iyabe isenza kuhle nxa ingaqhubeka ‘izithoba, imnene, ibekezela futhi isiba lesineke’ njalo itshengisa ukuthi iyamthanda umkayo. (Efe. 4:2) Umoya ongcwele kaNkulunkulu ungayinceda ukuthi iqhubeke ilobuntu obuhle lanxa iphakathi kwezimo ezinzima.
9 UPhawuli wabhala wathi: “Ngilamandla okwenza zonke izinto ngenxa yalowo ongipha amandla.” (Flp. 4:13) Umoya kaNkulunkulu uyenelisa ukuncedisa umKhristu ukuthi enelise ukwenza okunengi abecabanga ukuthi ngeke akwenelise. Ngokwesibonelo, nxa omunye wakho engakuphatha kubi ungahle ufune ukuphindisela. Kodwa iBhayibhili lithi kuwo wonke amaKhristu: ‘Lowo oliphatha kubi lingambuyiseli ngokubi ngoba kubhaliwe ukuthi: “Ukuphindisela ngokwami, yimi engizabuyisela, kutsho uJehova.”’ (Rom. 12:17-19) Lo-1 Thesalonika 5:15 usixwayisa esithi: “Nanzelelani kungabi lobuyisela okubi ngokubi kuloba ngubani, kodwa hlalani lizama ngamandla wonke ukwenza okuhle komunye lomunye lakwabanye bonke.” Umoya ongcwele ungasincedisa sibili ukuthi senze lokho ebesibona angani ngeke sikwenelise. Yikho kuqakathekile ukuthi sithandaze siwucele.
10. UJesu wayesenzani nxa abanye bangakhuluma kumbe benze izinto ezimzwisa ubuhlungu?
10 UJesu uyisibonelo esihle kithi endleleni ayesenza ngayo nxa abanye babemphatha kubi. U-1 Phetro 2:23 uthi: “Wathi ethethiswa kazange aphindisele ngokuthethisa. Wathi esebunzimeni kazange asongele muntu kodwa wathembela kulowo owahlulela ngendlela elungileyo.” Kumele silingisele isibonelo sakhe. Ungavumeli ukuthi izinto ezimbi ezenziwa ngabanye zikwenze uvuke ngolaka. Wonke amaKhristu akhuthazwa ukuthi ‘abe lozwelo futhi athobeke. Angabuyiseli okubi ngokubi kumbe ukuthethisa ngokuthethisa.’—1 Phet. 3:8, 9.
Abesifazana Kumele Bazithulele Yini Emulini?
11. Yisiphi isibusiso abanye abesifazana abalaso?
11 Ukuthi amakhosikazi kumele azehlise kubomkawo sekusitsho ukuthi akumelanga atsho lokho akucabangayo yini endabeni zemuli kumbe ezinye nje? Hatshi. Abesifazana labo njengamadoda baphiwe izibusiso ezinengi nguJehova. Ngokwesibonelo, baphiwe isibusiso esikhulu sokuba phakathi kwe-144 000 bengamakhosi labaphristi ezulwini ngaphansi kukaKhristu bebusa umhlaba. (Gal. 3:26-29) Kuyazicacela ukuthi uJehova unike abesifazana umsebenzi oqakathekileyo.
12, 13. Nika isibonelo esitshengisa ukuthi abesifazana babephrofetha.
12 Ngezikhathi zeBhayibhili abesifazana labo babephrofetha. UJoweli 2:28, 29 uthi: ‘Ngizathululela umoya wami kuyo yonke imihlobo yabantu, amadodana lamadodakazi enu azaphrofetha. Ngalezonsuku umoya wami ngizawuthululela laphezu kwezigqili lezigqilikazi zami.’
13 Phakathi kwabafundi bakaJesu abangu-120 ababebuthene endlini ephezulu eJerusalema ngelanga lePhentekhosti lika-33 C.E., abesifazana labo babekhona. Umoya kaNkulunkulu wathululelwa kubo bonke ababelapho. Yikho uPhetro watsho amazwi akhulunywa ngumphrofethi uJoweli futhi ayesebenza kumadoda labesifazana. Wathi: ‘Nanku okwakhulunywa kusetshenziswa umphrofethi uJoweli, “UNkulunkulu uthi, ‘Ezinsukwini zokucina ngizathululela umoya wami kuyo yonke imihlobo yabantu. Amadodana lamadodakazi enu azaphrofetha. Ngalezonsuku omunye umoya wami ngizawuthululela phezu kwezigqili lezigqilikazi zami njalo zizaphrofetha.’”’—Imiseb. 2:16-18.
14. Kuyini okwenziwa ngabesifazana ukuze basekele umsebenzi woMbuso ngesikhathi samaKhristu okuqala?
14 Ngesikhathi samaKhristu okuqala abesifazana benza umsebenzi omkhulu besekela uMbuso. Babekhuthele emsebenzini wokutshumayela izindaba ezinhle zoMbuso kaNkulunkulu futhi babencedisa langezinye izindlela ukuze umsebenzi wokutshumayela uqhubekele phambili. (Luk. 8:1-3) Ngokwesibonelo umphostoli uPhawuli wathi uFebhi ‘ngudadewabo okhonza ebandleni eliseKhenikhreya.” Kanti njalo ngesikhathi uPhawuli ebingelela abanye ayesebenza labo waqamba abesifazana abanengi ababethembekile abagoqela “uTrayifina loTrayifosa, abesifazana abayisebenzela nzima iNkosi.” Waphinda wathi ‘uPhesisi bayamthanda ngoba wayeyisebenzele gadalala iNkosi.’—Rom. 16:1, 12.
15. Kuyini okwenziwa ngabesifazana lamuhla ukuze basekele umsebenzi woMbuso?
15 Lamuhla abanengi abatshumayela izindaba ezinhle zoMbuso kaNkulunkulu ngabesifazana. (Mat. 24:14) Abanengi babo bangamaphayona, abanali futhi abanye basebenza eBhetheli. Umhubi uDavida wahlabela wathi: “UJehova unika abantu bakhe umlayo, abesifazana abamemezela izindaba ezinhle balibutho elikhulu.” (Hubo. 68:11) Aliqiniso sibili amazwi la! UJehova uyakuqakathekisa konke okwenziwa ngabesifazana ekutshumayeleni izindaba ezinhle kanye lasekugcwalisekeni kwenhloso zakhe. Lokhu kutshengisa ukuthi lanxa abesifazana kumele bazehlise akutsho ukuthi sekumele bazithulele nje bagoqe izandla.
Abesifazana Ababili Abangazange Bathule
16, 17. Okwenziwa nguSara kutshengisa njani ukuthi abesifazana akumelanga baphonguzithulela nje emulini?
16 UJehova uyabanika abesifazana imisebenzi eminengi abangayenza. Lokhu kumele kufundise amadoda ukuthi aqale akhulume labomkawo engakenzi izinqumo eziqakathekileyo. Nxa angenza njalo ayabe etshengisa ukuthi ahlakaniphile. IBhayibhili lisitshela ngabesifazana ababili abakhuluma kumbe benza okuthile lanxa omkabo bengazange bebacele ukuthi benze njalo. Ake sixoxe ngabo.
17 USara umka-Abrahama wayelokhu emtshela ukuthi axotshe umkakhe wesibili uHagari lendodana yakhe ngoba babengahloniphi. “Kodwa lokhu okwatshiwo nguSara ngendodana yakhe akuzange kumphathe kuhle u-Abrahama.” Yikho uJehova watshela u-Abrahama wathi: “Akungakuphathi kubi lokho okutshiwo nguSara mayelana lomfana kanye lesigqilikazi sakho. Mlalele.” (Gen. 21:8-12) U-Abrahama walalela uJehova kanye loSara futhi wenza lokho okwakucelwa ngumkakhe.
18. Kuyini okwenziwa ngu-Abhigeli?
18 Cabanga langalokho okwenziwa ngu-Abhigeli, umkaNabhali. Ngesikhathi uDavida ebalekela iNkosi uSawuli eyayilomhawu wafika wahlala duzane lalapho umhlambi kaNabhali owawudlela khona. Kulokuthi azithathele izifuyo zendoda le eyayinothile yena lamadoda akhe bayivikela impahla kaNabhali. Kodwa uNabhali “wayelesihluku futhi elemikhuba emibi,” njalo ‘watshingela amadoda kaDavida wawathethisa’ ngesikhathi ecela ukudla. Kuyakhanya sibili ukuthi wayeyindoda ‘engelancedo futhi engelangqondo.’ Manje u-Abhigeli wenzani esizwa ngalokho okwenzakalayo? “Wahle wathatha izinkwa ezingu-200, lembiza ezimbili ezinkulu zewayini, lezimvu ezinhlanu ezihlinziweyo, lamabele akhanzingiweyo angamaseya amahlanu, lamakhekhe angu-100 enziwe ngamagilebisi awonyisiweyo kanye lamakhekhe amakhiwane angu-200” wayakunika uDavida lamadoda akhe. Konke lokhu wakwenza engatshelanga umkakhe. Kwakuqondile yini lokho okwenziwa ngu-Abhigeli? Ye, ngoba “uJehova wamtshaya uNabhali wafa.” Ngokuhamba kwesikhathi uDavida wathatha u-Abhigeli waba ngumkakhe.—1 Sam. 25:3, 14-19, 23-25, 38-42.
‘Owesifazana Odunyiswayo’
19, 20. Kuyini okwenza owesifazana adunyiswe?
19 IMibhalo iyamncoma umfazi owenza izinto ngendlela kaJehova. Ibhuku leZaga lidumisa “umfazi owenza okuhle” lisithi: “Umfazi lo uligugu ukwedlula amakhorali. Indoda yakhe iyamthemba ngenhliziyo yonke, njalo ayisweli lutho oluqakathekileyo. Uyenzela okuhle, hatshi okubi, kuzo zonke izinsuku zokuphila kwakhe.” Kanti njalo “amazwi awakhulumayo atshengisa ukuthi uhlakaniphile; umthetho womusa uselimini lwakhe. Ukhangela yonke imisebenzi yomuzi wakhe, njalo kasidli isinkwa sobuvila. Abantwabakhe bayasukuma bamdumise, lendoda yakhe isukume imncome.”—Zaga. 31:10-12, 26-28.
20 Kuyini okwenza owesifazana adunyiswe? IZaga 31:30 zithi: “Ukubukeka kuyayenga, lobuhle buyaphela, kodwa owesifazana omesabayo uJehova uzadunyiswa.” Owesifazana omesabayo uJehova uyakwazi ukuthi kuqakathekile ukuthi azehlise kulabo uJehova ababeke ukuthi bakhokhele emulini lasebandleni. Phela ‘inhloko yowesifazana yindoda’ njengoba nje ‘lenhloko yamadoda wonke kunguKhristu’ futhi “inhloko kaKhristu nguNkulunkulu.”—1 Khor. 11:3.
Qakathekisa Isipho Esisiphiwe NguNkulunkulu
21, 22. (a) Yindaba kumele amaKhristu atshadileyo ambonge uNkulunkulu? (b) Kungani kumele sihloniphe ilungiselelo likaJehova lobunhloko? (Khangela ibhokisi elisekhasini 17.)
21 AmaKhristu atshadileyo alezizatho ezinengi zokubonga uNkulunkulu. Phela nguye owasungula umtshado. Khathesi indoda lomkayo sebengaba ngamathe lolimi, bakholise impilo ndawonye. Kanti njalo kumele bambonge uNkulunkulu ngesipho somtshado ngoba sebengenelisa ukukhonza uJehova beyimuli emanyeneyo. (Ruthe. 1:9; Mik. 6:8) UJehova nguye okwaziyo okumele kwenziwe yindoda lomkayo ukuze bathokoze emulini yabo. Hlalani lisenza izinto ngendlela yakhe, futhi lingenza njalo ‘intokozo eliyiphiwa nguJehova izalenza libe lamandla,’ lanxa liphila emhlabeni lo olenhlupho.—Neh. 8:10.
22 Indoda ethanda umkayo izamkhokhela kuhle njalo itshengise ukuthi iyamthanda. Kuzaba lula ukuthi ithande umkayo ngoba uthanda uJehova futhi uyayihlonipha. Okuqakathekileyo yikuthi imuli yayo izenza uJehova uNkulunkulu adunyiswe.
Usakhumbula Yini?
• UJehova uyihlele njani indaba yobunhloko?
• Kungani kumele abatshadileyo bahloniphane?
• Inkosikazi ekhonza uJehova kumele imphathe njani umkayo ongakhonzi uJehova?
• Kungani kumele amadoda aqale axoxe labomkawo engakenzi izinqumo?
[Ibhokisi]
Kungani Kumele Sihloniphe Abakhokhelayo?
UJehova nguye otshoyo ukuthi ngubani okumele akhokhele futhi akwenze njani. Lokhu ukwenzele abantu kanye lezingilosi ukuze benelise ukuzikhethela ukumkhonza bemanyene njalo belokuthula.—Hubo. 133:1.
AmaKhristu agcotshiweyo wona ayazehlisa kuMkhokheli wawo uJesu Khristu. (Efe. 1:22, 23) UJesu laye uyamhlonipha uYise yikho ngokuhamba kwesikhathi “iNdodana layo izazibeka ngaphansi kwalowo owabeka zonke izinto ngaphansi kwayo, ukuze uNkulunkulu abe yikho konke kubo bonke.” (1 Khor. 15:27, 28) Ngakho kuhle ukuthi bonke abantu abakhonza uNkulunkulu bahloniphe labo abakhokhelayo ebandleni lasemulini. (1 Khor. 11:3; Heb. 13:17) Nxa singakwenza lokhu uJehova uzasibusisa.—Isaya. 48:17.
[Umfanekiso]
Umthandazo unganceda inkosikazi ukuthi ibe lobuntu obuhle
[Imifanekiso]
UJehova uyakuqakathekisa konke okwenziwa ngabesifazana ukuze baqhubekisele phambili umsebenzi woMbuso