52 UMAKHO
“Yena Uluncedo Kimi”
UJESU wayesanda kubotshwa ehamba lexuku lamadoda ayehlomile. Abaphostoli bonke basebembalekele. Kodwa iBhayibhili lisitshela ngelinye ijaha elaba lesibindi lalandela uJesu. Abanye balinanzelela yikho basebefuna ukulibamba. Bathi bayalibamba laphunyuka lahlaba ngejubane basala bebambe isembatho salo, ijaha leli lasala lelalikugqoke ngaphakathi kuphela. Ibhuku likaMakho yilo lodwa elilandisa ngendaba le yikho abantu abanengi becabanga ukuthi uMakho wayekhuluma ngaye. Lokhu kwenza sibone ukuthi uMakho wayelesibindi lanxa wayengosakhulayo.
UMakho owayebizwa langokuthi nguJosefa wayehlala eJerusalema lomamakhe futhi kungenzeka babenothile. Ngemva kokufa kukaJesu ibandla lalisenzela imihlangano koMakho. Yikho lapho umphostoli uPhetro aqonda khona ingilosi ize imkhulule ejele ebusuku. Kumele ukuthi uMakho wayesazi abaphostoli labafundi bakaJesu abanengi. Kungenzeka wafunda kubo ukuba lesibindi.
Umzawakhe kaMakho uBhanabha lomphostoli uPhawuli bafika eJerusalema ngabo-46 C.E. Balithanda ijaha leli futhi bobabili babezimisele ukuliqeqetsha yikho balithatha bahamba lalo e-Antiyokhi. Phose ngemva komnyaka banxusa uMakho ukuthi ahambe labo besiyatshumayela endaweni ezikhatshana. Wavuma ukuhamba labo futhi wayezabe ebancedisa ngemisebenzi ethile.
UMakho kwakumele abe lesibindi ngoba ngalezonsuku kwakulengozi ezinengi ezingabehlela emangweni. Ngokwesibonelo, umphostoli uPhawuli wabhala ukuthi wake wahlangana ‘lezingozi emfuleni, lengozi zokuhlaselwa yizigebenga, lengozi edolobheni, lengozi enkangala kanye lengozi elwandle.’ (2 Khor. 11:26) UMakho kwakumele alalele uBhanabha loPhawuli njengoba kuyibo ababemqeqetsha. Lakanye wabalalela wahamba labo ePhamfiliya kodwa sebekhonale waphenduka wabuyela eJerusalema. Kambe ukuthi wayesekhulelwa ngumsebenzi yini? IBhayibhili kalisitsheli. Akwenzayo akuzange kubaphathe kuhle ikakhulu uPhawuli.
Bathi sebeqede uhambo lwabo lokuqala, bahlela uhambo lwesibili. UBhanabha wayefuna bahambe loMakho kodwa uPhawuli wayengasamthembi uMakho ngoba ecabanga ukuthi wayezaphinda abatshiye. UPhawuli loBhanabha baphikisana kakhulu ngendaba le. UBhanabha wacina ethatha uMakho wahamba laye eKhuphro. UPhawuli wathatha uSila bayatshumayela kweyinye indawo.
Kumele ukuthi lokhu kwamzwisa ubuhlungu uMakho. Phela wayesedanise uPhawuli umuntu ayemhlonipha kakhulu futhi wamhlukanisa lomngane wakhe ayemthanda. Lanxa kunjalo kazange avumele ukuthi lokhu kumqede amandla, ahlale ezondele uPhawuli loba acine ekhalala ukukhonza.
UMakho walahlekelwa ngumsebenzi wenkonzo ayewuqakathekisa kodwa kazange akhalale
Waqhubeka esenza konke okusemandleni akhe encedisa abafowabo labodadewabo. Ngabo-60 kusiya ku-61 C.E., uPhawuli wayeyisibotshwa eRoma. Wabhala incwadi eyayitshengisa ukuthi wayeloMakho, wathi wayemduduza kakhulu. Phakathi laphakathi kuka-62 kusiya ku-64 C.E., umphostoli uPhetro waqamba uMakho encwadini ayibhalayo. Kukhanya uMakho wahamba umango omude esiya eBhabhiloni ukuze ayencedisa njalo akhuthaze uPhetro owayeseluphele. UPhetro wambiza ngokuthi yindodana yakhe ngoba wayemduduza kakhulu. Kufanele ukuthi kunengi kakhulu umphostoli uPhetro amtshela khona ngoJesu Khristu. Ngesikhathi uMakho eseRoma ebhala iVangeli lakhe, kukhanya izinto ezinengi azibhalayo wayezitshelwa nguPhetro.
UMakho sicina ukuzwa ngaye ngesikhathi umphostoli uPhawuli ebhalela uThimothi incwadi. UPhawuli wayesesejele ngesikhathi ecela uThimothi ukuthi abuye loMakho. Wayefuna abuye laye ngenxa yokuthi wayeluncedo kakhulu kuye. Akuthandabuzwa ukuthi uMakho loThimothi babezimisele ukuyaduduza uPhawuli engakafi. Lanxa uMakho wahlangana lobunzima waqhubeka encedisa abafowabo labodadewabo. Lokhu kwenza uJehova wamthanda kakhulu.
Bala indaba le eBhayibhilini:
Ingxoxo:
UMakho watshengisa njani ukuthi ulesibindi?
Julisa Ingqondo
1. Yindaba sisithi uMakho wakhulela emulini eyayinothile? (w10 3/15 6 ¶6–7 ¶1-wcgr)
2. Yiphi imisebenzi engabe yayisenziwa nguMakho ngesikhathi “engumsizi” kaPhawuli loBhanabha? (Imiseb. 13:5; w10 3/15 7 ¶5-wcgr)
3. Yiziphi ezinye indawo uMakho ahamba kuzo? (w10 3/15 8 ¶6-8-wcgr) A
Umfanekiso A: Ezinye indawo uMakho angabe wafika kuzo
4. Nika isibonelo esitshengisa ukuthi okwabhalwa nguMakho eVangelini lakhe angabe wakutshelwa nguPhetro. (w08 2/1 26 ¶1-wcgr)
Cabangisisa Ngezifundo
UMakho kazange abizwe ngokuthi ngumphostoli kumbe ngokuthi ngumphrofethi. Lanxa kunjalo wayethobekile encedisa abanye. Thina singabancedisa njani abanye?
UMakho waqhubeka ethembekile lanxa uPhawuli wake wambona engafanelanga ukwenza umsebenzi oqakathekileyo. Yiziphi izifundo esizithola kuMakho nxa singalahlekelwa ngumsebenzi wenkonzo ebesiwenza? B
Umfanekiso B
Yiziphi ezinye indlela ongatshengisa ngazo ukuthi ulesibindi njengoMakho?
Cabangisisa
Indaba le ingifundisani ngoJehova?
Indaba le ingenelana njani lenhloso kaJehova?
Kuyini okuthandayo ngoMakho okwenza uthi ufanele sibili ukuyabusa loKhristu ezulwini?
Funda Okunengi
Kuyini okuqakathekileyo esikuthola eVangelini likaMakho?
Sebenzisa isibonelo sikaMakho ukuze ufundise abantwabakho ngokuthi kuqakatheke ngani ukungakhalali ukukhonza uJehova.
“UMakho Kazange Akhalale” (w08 2/1 24-26-wcgr)