32 U-ELISHA
“Awu Jehova, Ngicela Uvule Amehlo Akhe”
UMPHROFETHI u-Elisha wayeseDothani, idolobho elalisesigodini njalo ligonjolozelwe zintaba. Idolobho leli laliseqaqeni futhi kwakulemiduli eyayilivikela. Ngelinye ilanga ekuseni, inceku yakhe yavuka yaya phandle, eyakubonayo kwayiqeda amandla. Idolobho leli laselihanqwe ngamabutho amaSiriya ayelezinqola zempi lamabhiza elande ukuzothumba umphrofethi kaNkulunkulu u-Elisha. Inceku yathi ikubona lokhu yahle yagijima yayatshela u-Elisha.
Kwakungasikho kokuqala ukuthi u-Elisha abe sebunzimeni. Eminyakeni emilutshwana eyayedlule uJehova wayethume u-Elija ukuthi aqeqetshe u-Elisha abe ngumphrofethi. Bobabili babethwaliswe nzima yiNkosi u-Ahabi lendlovukazi uJezebheli lendodana yabo u-Ahaziya. Abantu laba babebazonda abaphrofethi bakaJehova futhi befuna ukubabulala. U-Elisha engakawujayeli umsebenzi, kwathutsha inqola yamabhiza omlilo yathatha u-Elija. Kwaba yikho ukwehlukana kwakhe lo-Elisha. Kufanele ukuthi u-Elisha kazange aphinde ambone umngane wakhe kodwa waqhubekela phambili ngomsebenzi owawusenziwa ngu-Elija. Umsebenzi lo wawunzima ngoba kwakumele akhokhele “amadodana abaphrofethi” ukuze aqede ukukhonzwa kukaBhali ko-Israyeli.—2 Amakho. 2:15.
UJehova wapha u-Elisha amandla okuthi enze izimangaliso ezinengi. Esinye isimangaliso asenzayo ngesokusilisa uNamani, umkhokheli webutho owayethenjwa yinkosi yeSiriya uBheni-hadadi. Kodwa inkosi le ayizange itshengise ukuthi iyabonga, yaqhubeka ilokhu ifuna ukuhlasela abantu bako-Israyeli. UJehova wayehlala etshela u-Elisha ukuthi uBheni-hadadi wayezahlasela ngaphi kwendawo, u-Elisha abesexwayisa inkosi yako-Israyeli. Ngelinye ilanga uBheni-hadadi wazonda kakhulu wabuza izinceku zakhe ukuthi ngubani owayengumthengisi phakathi kwabo. Eyinye inceku yaphendula yathi: “Ngu-Elisha umphrofethi wako-Israyeli otshela inkosi yako-Israyeli izinto ozikhuluma usendlini yakho yokulala.” UBheni-hadadi wathi esizwa ukuthi u-Elisha useDothani wahle wathuma amabutho akhe ukuthi ayemthumba.
Lanxa u-Elisha lenceku yakhe basebegonjolozelwe libutho elikhulu, kukhona u-Elisha ayekwazi inceku yakhe eyayingakwazi
Inceku ka-Elisha yathi ibona ibutho leSiriya, yahle yagijima isiya ku-Elisha imemeza isithi: “Awu nkosi yami, sizakwenza njani?” U-Elisha wathi ebona ukuthi indoda le yayisesaba kakhulu, wayiqinisa esithi: “Ungesabi!” Waphinda wakhuluma amazwi ayiduduza kakhulu, wathi: “Abalathi banengi ukwedlula abalabo.” Kumele ukuthi okwatshiwo ngu-Elisha kwayimangalisa inceku le ngoba bona babebabili kuphela. Yikho u-Elisha wathandaza wathi: “Awu Jehova, ngicela uvule amehlo akhe abone.”
UJehova wahle wawuphendula umthandazo lo. Wayivula amehlo inceku le, yabona izingilosi ezilibutho elikhulu likaJehova zibagombolozele. Akulabutho elalilamandla njengalo. IBhayibhili lithi inceku le yabona ezintabeni kugcwele amabhiza lezinqola zempi zomlilo zibagombolozele.
Amabutho eSiriya kawazange alibone ibutho likaJehova. Asondela edolobheni efuna ukuthumba u-Elisha. U-Elisha wacela ukuthi uJehova enze amabutho la angasaboni ukuthi ayengaphi. Lakanye uJehova wawuphendula umthandazo lo, yikho avuma ngesikhathi u-Elisha esithi amlandele. Wawakhokhela wahamba lawo eSamariya, umango ongamakhilomitha angaba ngu-16, wasecela uJehova ukuthi awenze abone. UJehova uthe esewayenze abona asenanzelela ukuthi ayeseSamariya. Inkosi yama-Israyeli yayisifuna ukuwabulala. Kodwa u-Elisha wawazwela usizi wasesithi aphiwe ukudla abuyele eSiriya. Indaba le iphetha ngokuthi amabutho eSiriya ayethumba impahla zabantu awazange aphinde alugxobe elizweni lako-Israyeli.
U-Elisha wayekwazi ukuthi kulebutho elisezulwini elalizabavikela. Izinto ezinengi ezenzakala engumphrofethi zamnceda wabona ukuthi uJehova lezingilosi bahlala beseduze labantu abathembekileyo futhi bazimisele ukubancedisa. Lokhu yikho okwenza u-Elisha waba lesibindi. Lathi nxa singacabanga ngakho sizaba lesibindi.
Bala indaba le eBhayibhilini:
Ingxoxo:
U-Elisha watshengisa njani ukuthi ulesibindi?
Julisa Ingqondo
1. U-Elisha watshengisa njani ukuthi uyakuqakathekisa ukuba ngumphrofethi ngesikhathi uJehova emkhetha? (1 Amakho. 19:19-21; it “U-Elisha” ¶2-wcgr) A
Umfanekiso A
Umfanekiso A
2. Kuyini okwenza u-Elisha wacela umoya ka-Elija ‘usuphindwe kabili’? (2 Amakho. 2:9; w03 11/1 31-wcgr)
3. Kuyini okwenza sithi uJehova kazange enze amaSiriya aba yiziphofu? (it “Ubuphofu” ¶6-wcgr)
4. Kuyini okwenziwa ngu-Elisha engumphrofethi? (it “U-Elisha” ¶27-28-wcgr)
Cabangisisa Ngezifundo
Ukwazi ukuthi izingilosi zihlala ziseduze kwethu, kusinceda njani ukuthi sibe lesibindi? B
Umfanekiso B
U-Elisha wakhuthaza inceku yakhe ngesikhathi isesaba. Abadala labanye ebandleni bangamlingisela njani?
Yiziphi indlela ongatshengisa ngazo ukuthi ulesibindi njengo-Elisha?
Cabangisisa
Indaba le ingifundisani ngoJehova?
Indaba le ingenelana njani lenhloso kaJehova?
Ngizambuzani u-Elisha nxa esevusiwe?
Funda Okunengi
Abafowethu abasanda kuphiwa imisebenzi ebandleni bafundani esibonelweni sika-Elisha?
Hlola ezinye izifundo ezitholakala endabeni ka-Elisha.
“U-Elisha Wabona Izinqola Zomlilo—Wena Uyazibona Yini?” (w13 8/15 28-30-wcgr)