Kungani OFakazi BakaJehova Bengazingeni Ezombusazwe?
OFakazi bakaJehova kabangeni kwezombusazwe ngenxa yalokho okutshiwo liBhayibhili. Asikhankaseli iqembu elithile lezombusazwe futhi asivoti. Kasiqali ukungena ezikhundleni zezombusazwe futhi asingeni kuloba yini eyenziwayo ukuze kutshintshwe ohulumende. Konke lokhu kwenziwa yikuthi silandela izizatho ezicacileyo eziseBhayibhilini.
Silingisela uJesu owayalayo ngesikhathi abantu befuna ukumbeka kwesinye isikhundla sezombusazwe. (UJohane 6:15) Watshela abalandeli bakhe ukuthi ‘bangabi ngabomhlaba’ futhi wakwenza kwacaca ukuthi akumelanga bazingene ezombusazwe.—UJohane 17:14, 16; 18:36; UMakho 12:13-17.
Sisekela uMbuso kaNkulunkulu, uJesu akhuluma ngawo ngesikhathi esithi: “Lezizindaba ezinhle zoMbuso zizatshunyayelwa emhlabeni wonke.” (UMathewu 24:14) Asingeni kwezombusazwe zaloba yiliphi ilizwe okugoqela lalelo esihlala kulo ngoba sisekela uMbuso kaNkulunkulu. UMbuso lo siwusekela ngokutshela abantu ngokubuya kwawo.—2 KwabaseKhorinte 5:20; Kwabase-Efesu 6:20.
Ukungangeni kwezombusazwe kuyasinceda ukuthi sibe lenkululeko yokukhuluma labantu ngezindaba ezinhle zoMbuso kaNkulunkulu kungelani lokuthi bona basekelani kwezombusazwe. Sitshengisa ngamazwi langezenzo ukuthi sikholwa ukuthi uMbuso kaNkulunkulu yiwo wodwa ozalungisa izinto emhlabeni.—IHubo 56:11.
Simanyene labafowethu labodadewethu emhlabeni wonke ngenxa yokuthi asingeni kwezombusazwe ezenza abantu badabukane phakathi. (KwabaseKholose 3:14; 1 UPhetro 2:17) Kodwa amasonto angena kwezombusazwe enza kungabi lokumanyana phakathi kwamalunga awo.—1 KwabaseKhorinte 1:10.
Ukuhlonipha ohulumende. Lanxa singazingeni ezombusazwe, siyabahlonipha ohulumende abasibusayo. Lokhu sikwenza silandela umthetho oseBhayibhilini othi: “Wonke umuntu kazehlise kuziphathamandla.” (KwabaseRoma 13:1) Siyayilandela imithetho yazo, siyabhadala imithelo, siphinde sibambisane lemizamo enziwa nguhulumende ukuze ancede abantu. Asiqali ukulandela abantu abayabe befuna ukuzama ukukhipha uhulumende kodwa sikhulekela ‘amakhosi labo bonke abasezikhundleni eziphezulu,’ ikakhulu nxa sifisa ukuthola inkululeko yethu yokukhonza ngoba iBhayibhili lisikhuthaza ukuthi senze njalo.—1 KuThimothi 2:1, 2, amabala angaphansi.
Okunye esingakwenziyo yikuphambanisa inhlelo zokhetho kumbe labo abayabe bekhethe ukuyavota. Siyawahlonipha amalungelo abanye okuzikhethela lokho abafuna ukukwenza futhi asibahluleli.
Kudala amaKhristu ayengena kwezombusazwe yini? Hatshi. Abaphostoli lamanye amaKhristu akuqala labo babengangeni kwezombusazwe. Ibhuku elithi Beyond Good Intentions lithi: “AmaKhristu akuqala ayekwazi ukuthi kumele ahloniphe ohulumende kodwa ayengazingeni ezombusazwe.” Ibhuku elithi On the Road to Civilization lalo lithi amaKhristu akuqala “ayengavumi ukungena ezikhundleni zezombusazwe.”
Ukungangeni kwethu kwezombusazwe kuyingozi kwabanye yini? Hatshi. Singabantu abathanda ukuthula labalothando. Yikho ohulumende akumelanga besabe ukuthi singaqabuka sesenze izinto ezingaba yingozi kwabanye. Cabanga ngombiko ka-2001 owavela kwenye inhlanganiso yase-Ukraine okuthiwa yiNational Academy of Sciences. Umbiko lo wawumayelana ngokungangeni kwethu kwezombusazwe futhi wathi: ‘Namuhla abanye kungangabahambi ukuthi oFakazi bakaJehova abafuni ukungena kwezombusazwe njengoba nje kudala amaNazi ake abahluphela indaba le.’ Lanxa kunjalo, ngaphansi kombuso we-Soviet owawubacindezela, oFakazi ‘abazange bayekele ukulandela imithetho. Babethembekile futhi besebenza nzima emasimini, lakwezinye indawo ababebekwe ukuthi basebenze kuzo, abazange babeluhlupho ngitsho.’ Umbiko wenhlanganiso ye-Ukraine waphetha ngokuthi izenzo zaboFakazi bakaJehova kanye lalokho abakukholwayo ‘akuphambanisi ukuvikeleka kwaloba yisiphi isizwe.’