U-Obhadiya—Mesabe UNkulunkulu

U-Obhadiya wayelesikhundla esigodlweni senkosi eyayisenza okubi u-Ahabi. Inkosi le yekela abantu bezikhonzela uBhali kulo lonke elako-Israyeli. Lanxa kunjalo u-Obhadiya yena wayemesaba uJehova ‘kusukela esesemutsha.’ (1 Amakho. 18:​1-13) Lokhu yikho okwenza u-Obhadiya waba lesibindi sokufihla abaphrofethi bakaJehova abangu-100 ngesikhathi iNdlovukazi uJezebheli ifuna ukubabulala. Ukufihla umphrofethi kaJehova oyedwa kwakuvele kuyingozi, pho kuthiwani ngabangu-100? U-Obhadiya waba lesibindi sibili futhi watshengisa ukuthi uyamesaba uNkulunkulu ngoba waba leqiniso lokuthi abaphrofethi laba bayakuthola ukudla ngesikhathi sendlala. Phela kwakumele ananzelele ukuze abaphrofethi bakaBhali bangaboni ayekwenza.—1 Amakho. 18:19.

Sifundani? Lanxa u-Obhadiya wayemesaba u-Ahabi, ayemesaba kakhulu nguJehova. Lokhu yikho okwenza wafaka impilo yakhe engozini encedisa abaphrofethi bakaJehova. Lathi kumele sitshengise ukuthi siyamesaba uJehova ikakhulu nxa kuyithi sihlala endaweni lapho umsebenzi wethu ovinjelwe khona. Ukwesaba uJehova kuzasenza sizimisele ukuncedisa abafowethu labodadewethu ngezikhathi ezinzima.