4. Abantu Abangelathando

‘Abantu bazakuba ngabangathandi abanye.’—2 KUTHIMOTHI 3:1-3.

● UChris usebenzela iqembu elincedisa abantu abahlukuluzwayo eliseNorth Wales. Uthi: “Kwake kwafika omunye umama engimaziyo kodwa kwakungasakhanyi lokuthi nguye ngoba wayetshaywe waba ngokunye.” Uphinda aveze ukuthi ukuhlukuluzwa kwenza abanye omama babe lenhloni njalo bazizwe bengasibantu balutho.

UBUFAKAZI BUTSHENGISANI? Kwelinye ilizwe elise-Africa, kucatshangelwa ukuthi owesifazana oyedwa kwabathathu wake wahlukuluzwa kwezemacansini esesemncane. Ukuhlolisisa okwenziwe elizweni lelo kutshengisa ukuthi obaba abanengi bathi kuqondile ukutshaya omkabo. Kodwa ayisibo bodwa abesifazana abahlukuluzwayo. Ngokwesibonelo, eCanada kucatshangelwa ukuthi obaba abathathu kwabalitshumi bake bahlukuluzwa kumbe batshaywa ngomkabo.

OKUJAYELE UKUKHULUNYWA NGABANGAVUMELANI LESIPHROFETHO LESI. Abantu bebevele behlukuluzwa kusukela kudala. Kodwa okwenza kukhanye angani sebebanengi abahlukuluzwayo yikuthi abantu sebekhululekile ukukhuluma ngendaba le.

ABAKUTSHOYO KULIQINISO YINI? Kuliqiniso sibili ukuthi eminyakeni esanda kwedlula kwenziwe imizamo eminengi yokuxwayisa abantu ngendaba yokuhlukuluzwa. Kodwa lokhu kuluqedile yini uhlupho lolu? Hatshi. Luqhubeka lusanda ngoba abantu abanengi abaselathando ngitsho lasezimulini zabo.

UCABANGANI? U-2 Thimothi 3:1-3 uyagcwaliseka yini? Lukhona yini uthando ezimulini ezinengi?

Esinye isiphrofetho esigcwalisekayo siphathelane lomhlaba esihlala kuwo. Bala uzwe ukuthi iBhayibhili lithini ngendaba le.

[Umfanekiso osekhasini 7]

“Kukhanya abantu abanengi ababiki nxa behlukuluzwa. Omama abanengi bajayele ukuya emapholiseni sebehlukuluzwe okwezikhathi ezingaba ngu-35.”—OKHULUMELA INHLANGANISO YE-WALES DOMESTIC ABUSE HELPLINE.