Ndiʼi ki̱vi̱ ná kaʼviyó tu̱ʼun Ndióxi̱

1, 2. ¿Ndáaña xa̱a̱ kéʼé na̱ ñuu Ndióxi̱ ña̱ va̱ʼa ka̱ʼviyó texto ndiʼi ki̱vi̱, ta mií kivi ndani̱ʼíyó ña̱yóʼo tiempo vitin?

Tá ku̱i̱ya̱ 1905, na̱ ñuu Jehová ta̱vána iin libro tu̱ʼun inglés ña̱ naní Daily Heavenly Manna for the Household of Faith (Maná celestial diario para la casa de la fe). Libro yóʼo xi̱kuumiíña texto ña̱ xi̱kaʼvina iin tá iin ki̱vi̱ ta saátu iin comentario ña̱ xi̱tavána nu̱ú revista ña̱ xi̱naní Zion’s Watch Tower (La Torre del Vigía de Sion, ta vitin naníña Tutu Ña̱ Nátúʼun xíʼinyó). Ku̱i̱ya̱ tá ku̱i̱ya̱ xi̱xiniñúʼuna libro yóʼo nda̱a̱ tá ku̱i̱ya̱ 1927, ta ku̱i̱ya̱ yóʼo ki̱xáʼana távána texto xíʼin comentario ta xi̱kanaña nu̱ú tutu ña̱ anuario.a Ña̱yóʼo va̱ʼaní xi̱chindeétáʼanña xíʼin na̱ hermano saáchi ku̱a̱ʼání texto xi̱kixi nu̱úña xíʼin comentario ña̱ kivi ndakanixi̱nína xa̱ʼa̱.

² Tá ku̱i̱ya̱ 1986, na̱ ñuu Ndióxi̱ ki̱xáʼana távána folleto ña̱ naní Examinando las Escrituras diariamente. Ta vitin naníña Ndiʼi ki̱vi̱ ná kaʼviyó tu̱ʼun Ndióxi̱ ta xa̱a̱ yáʼaka 300 nu̱ú tu̱ʼun kánaña. Saátu va̱xi texto diario yóʼo nu̱ú aplicación JW Library^®, BIBLIOTECA NU̱Ú INTERNET Watchtower^™ (wol.jw.org) xíʼin nu̱ú programa Watchtower Library.

3. ¿Nda̱chun sava yichi̱ kǒo tiempo nu̱úyó ña̱ kaʼviyó texto diario, ta ndáaña ka̱ʼa̱nyó xa̱ʼa̱ nu̱ú artículo yóʼo?

³ Xa̱ʼa̱ ña̱ ku̱a̱ʼání chiñu íyo nu̱úyó, sava yi̱chi̱ kǒo tiempo nu̱úyó ña̱ kaʼviyó texto diario ndiʼi ki̱vi̱. Nu̱ú artículo yóʼo siʼna kunda̱a̱-iniyó xa̱ʼa̱ iin ejemplo ña̱ va̱xi nu̱ú Biblia ña̱ chindeétáʼan xíʼinyó nda̱chun ndáyáʼviní kaʼviyó tu̱ʼun Ndióxi̱ ndiʼi ki̱vi̱. Ta saátu ka̱ʼa̱nyó ndáa ki̱ʼva chindeétáʼan texto diario xíʼinyó ta ndáaña kivi keʼéyó ña̱ va̱ʼa kǒo sandákooyó kaʼviyóña.

EJEMPLO ÑA̱ VA̱XI NU̱Ú BIBLIA ÑA̱ CHINDEÉTÁʼAN XÍʼINYÓ

4. ¿Ndáaña ke̱ʼé na̱ ñuu Berea tá na̱túʼun ta̱ apóstol Pablo xíʼinna? (Hechos 17:10, 11).

⁴ Texto nu̱ú ka̱na ña̱ artículo yóʼo, káʼa̱nña ndáaña ke̱ʼé na̱ ñuu Berea tá na̱túʼun ta̱ apóstol Pablo xíʼinna xa̱ʼa̱ Ndióxi̱ (kaʼvi Hechos 17:10, 11). Na̱ judío na̱ ni̱xi̱yo Macedonia va̱ʼaní xi̱niso̱ʼona tá na̱túʼun ta̱ Pablo xíʼinna “ta ni̱ndi̱ʼi̱ní-inina xa̱ʼa̱ña”. Na̱yóʼo ta̱vána tiempo ña̱ ka̱ʼvi va̱ʼana tu̱ʼun Ndióxi̱ ña̱ va̱ʼa kunda̱a̱-inina á ña̱ nda̱a̱ kúú ña̱ xi̱sanáʼa̱ ta̱ Pablo miína. Ki̱ʼva saá kéʼé miíyó tá xíniso̱ʼoyó discurso ña̱ táxina ti̱xin reunión á ti̱xin asamblea, nándukúyó texto ña̱ káʼvi ta̱ táxi discurso. Xa̱ʼa̱ ña̱ kéʼéyó saá, kándíxayó ña̱ nda̱a̱ kúú ña̱ sanáʼa̱na miíyó.

5. Xa̱ʼa̱ ña̱ xi̱kaʼvi na̱ ñuu Berea tu̱ʼun Ndióxi̱ ndiʼi ki̱vi̱, ¿ndáa ki̱ʼva chi̱ndeétáʼan ña̱yóʼo xíʼinna?

⁵ Ku̱a̱ʼání na̱ ñuu Berea ni̱xa̱a̱na ka̱ndíxana Ndióxi̱ (Hech. 17:12). Soo, tá ni̱ya̱ʼa loʼo tiempo ki̱xaa̱ sava na̱ judío na̱ ñuu Tesalónica ta “ni̱xa̱ʼa̱nna sa̱sáa̱na ndiʼi na̱ yiví ñuu” Berea (Hech. 17:13). Xi̱kuni̱na sayíʼvina na̱ cristiano yóʼo, soo kǒo níkuchiñuna. Na̱ ñuu Berea nda̱kú ni̱xi̱yo inina xíʼin Ndióxi̱, saáchi ndiʼi ki̱vi̱ xi̱kaʼvina tu̱ʼun Ndióxi̱ ta xi̱kandíxana ña̱ nda̱a̱ kúú ña̱ xi̱sakúaʼana. Ta saátu miíyó tá táváyó tiempo ña̱ kaʼviyó tu̱ʼun Ndióxi̱ ndiʼi ki̱vi̱, saá kúú ña̱ kundeé-iniyó ña̱ ya̱ʼayó nu̱ú nda̱a̱ ndáaka tu̱ndóʼo.

NDA̱CHUN XÍNIÑÚʼU KAʼVIYÓ TEXTO DIARIO

6. ¿Nda̱chun xíniñúʼu kaʼviyó texto diario ndiʼi ki̱vi̱? (Koto recuadro ña̱ naní “Ejemplo ña̱ va̱xi nu̱ú Biblia ña̱ káʼa̱n xíʼinyó ña̱ ndáyáʼviní ndasakáʼnuyó Ndióxi̱ ndiʼi ki̱vi̱”).

⁶ Saá kúú ña̱ ndásakáʼnuyó Jehová. Xa̱ʼa̱ ña̱ kúúra Ndióxi̱yó, ndáyáʼviní taváyó tiempo ña̱ na̱ʼa̱yó ña̱ kúni̱yó xíniyóra ta íxato̱ʼóyóra. Ta̱yóʼo kúʼvi̱-inira xínira miíyó ta kúni̱ra ña̱ ná kutakuyó ndiʼi tiempo (Juan 3:16). Nu̱ú Biblia va̱xi ku̱a̱ʼání ejemplo ña̱ náʼa̱ nu̱úyó ña̱ kúni̱ Jehová ná ndasakáʼnuyóra ndiʼi ki̱vi̱. Ku̱a̱ʼání na̱ hermano ña̱ siʼna kéʼéna ndiʼi ki̱vi̱ kúú ña̱ káʼvina texto diario tasaá kéʼéna oración, káʼvina Biblia ta ndákanixi̱nína xa̱ʼa̱ña.

7, 8. ¿Ndáa inka xa̱ʼa̱ xíniñúʼu ka̱ʼviyó texto diario? (Efesios 5:15, 16).

⁷ Vií xíniñúʼuyó tiempoyó tá káʼviyó ña̱yóʼo (kaʼvi Efesios 5:15, 16). Tá táváyó tiempoyó ña̱ ka̱ʼviyó ña̱ yóʼo ndiʼi ki̱vi̱ saá kúnda̱a̱-iniyó ndáaña ndákanixi̱ní Ndióxi̱.

⁸ Táxiña ndee̱ ndaʼa̱yó ña̱ kundeé-iniyó ya̱ʼayó nu̱ú tu̱ndóʼo ndiʼi ki̱vi̱. Ta̱ Jesús ni̱ka̱ʼa̱nra “iin iin ki̱vi̱ xa̱a̱ kúúmiíña tu̱ndóʼo” (Mat. 6:34). Soo saátu ni̱ka̱ʼa̱nra ña̱ kúnda̱a̱-ini Jehová ndáa tu̱ndóʼo kúú ña̱ yáʼayó nu̱ú ta ndáaña xíniñúʼuyó (Mat. 6:25-32). Tá káʼviyó texto diario chíndeétáʼanña xíʼinyó ña̱ va̱ása ndakaniníxi̱níyó xa̱ʼa̱ ña̱ sándi̱ʼi-iniyó tasaá ndakanikaxi̱níyó xa̱ʼa̱ ki̱ʼva ña̱ chíndeétáʼan Jehová xíʼinyó (Sal. 68:19; 1 Ped. 5:6, 7). Iin ñá hermana xi̱ndi̱ʼi̱ní-iniñá xa̱ʼa̱ ña̱ va̱ása va̱ʼa ke̱ʼéñá tá ya̱chi̱ ta xi̱ ixayo̱ʼvi̱ña xíʼinñá kandíxañá ña̱ xa̱a̱ i̱xakáʼnu-ini Jehová xa̱ʼa̱ñá. Ñáyóʼo ke̱ʼéñá oración nu̱ú Jehová ta ni̱ka̱ʼa̱nñá xíʼinra ña̱ ná chindeétáʼanra xíʼinñá ña̱ kandíxañá ña̱ xa̱a̱ i̱xakáʼnuva-inira xa̱ʼa̱ñá. Tándi̱ʼi ka̱ʼviñá texto diario ta nu̱ú ña̱yóʼo va̱xi Salmo 86:5: “Saáchi yóʼó Jehová Ndióxi̱ miíi̱, va̱ʼaní-iniún ta íyo tu̱ʼvaún ña̱ ixakáʼnu-iniún xa̱ʼíi̱; ndixaní kúʼvi̱-iniún xíniún na̱ kána yóʼó”. Ñáyóʼo káchiñá: “Va̱ʼaní ku̱nii̱ ta ta̱xii̱ tíxa̱ʼvi ndaʼa̱ Jehová chi ña̱yóʼo kúú ña̱ xi̱xiniñúʼi̱ ki̱vi̱ saá. Tasaá kúú ña̱ ki̱ʼii̱n kuenta ña̱ ndáyáʼviní kaʼviyó texto diario”.

9. ¿Ndáa ki̱ʼva chi̱ndeétáʼan texto diario xíʼin na̱ hermano na̱ ñuu Ucrania?

⁹ Tá káʼviyó texto diario ndiʼi ki̱vi̱ sándakaʼánña miíyó ña̱ kandíxayó Jehová tá yáʼayó nu̱ú tu̱ndóʼo (Prov. 3:5, 6). Tá ki̱xáʼa guerra chí Rusia xíʼin Ucrania, texto ña̱ ni̱ka̱ʼa̱nna xa̱ʼa̱ míí ki̱vi̱ saá kúú Isaías 30:15, ña̱yóʼo káchiña: “Tá va̱ása ndíʼi̱-inindó ta ndáa-inindó yi̱ʼi̱, ndakú koondó”. Texto yóʼo va̱ʼaní chi̱kaa̱ña ndee̱ xíʼin na̱ hermano na̱ ñuu Ucrania míí ki̱vi̱ saá. Ta̱ hermano Yeduard ka̱chira: “Texto yóʼo va̱ʼaní sa̱ndíkoña-inindi̱. Inkáchi ka̱ʼvii̱ xíʼin ñá síʼi̱ texto diario ki̱vi̱ saá. Tándi̱ʼi ke̱ʼéndi̱ oración ndu̱ndakúka-inindi̱ ña̱ va̱ʼa kǒo yi̱ʼvíndi̱ xa̱ʼa̱ ña̱ kúu”. Iin ñá hermana ñá naní Svitlana káchiñá: “Ndáyáʼviní ña̱ káʼa̱n Isaías 30:15 nu̱úndi̱. Tá xi̱kanitáʼan na̱ soldado yatin nu̱ú xi̱ndoondi̱, xi̱ndakaniníxi̱níndi̱ xa̱ʼa̱ ña̱ káʼa̱n texto yóʼo ta saátu ña̱ kúni̱ kachiña”.

10. ¿Nda̱chun xíniñúʼu ndakú koo iniyó ta ndáaña chindeétáʼan xíʼinyó? (Josué 1:6-9; koto na̱ʼná).

¹⁰ Chíndeétáʼanña xíʼinyó ña̱ nda̱kú koo iniyó. Xíniñúʼu ndakú koo iniyó ña̱ va̱ʼa kǒo keʼéyó táʼan ña̱ kéʼé na̱ káchíñu xíʼinyó á na̱ káʼvi xíʼinyó escuela, ña̱ va̱ʼa natúʼunyó xíʼin inkana xa̱ʼa̱ Biblia ta saátu ña̱ kundeé-iniyó tá íxandi̱va̱ʼana xíʼinyó. Ná ndakanixi̱níyó xa̱ʼa̱ ta̱ Josué. Tá nda̱kaxinnara ña̱ kuniʼira yichi̱ nu̱ú na̱ ñuu Israel, u̱ni̱ yichi̱ ni̱ka̱ʼa̱n Jehová xíʼinra ña̱ ndakú koo inira. Ta ña̱ va̱ʼa ndakú koo inira ni̱ka̱ʼa̱nra xíʼinra ná kaʼvira leyra ndiʼi ki̱vi̱ (kaʼvi Josué 1:6-9). Saátu miíyó tá káʼviyó texto diario xíʼin Biblia ndiʼi ki̱vi̱, ña̱yóʼo taxiña ndee̱ ndaʼa̱yó ta chindeétáʼanña xíʼinyó ña̱ nda̱kú koo iniyó.

11. ¿Ndáa ki̱ʼva chíndeétáʼan texto diario xíʼinyó ña̱ viíka kutáʼanyó xíʼin Ndióxi̱?

¹¹ Chíndeétáʼanña xíʼinyó ña̱ viíka kutáʼanyó xíʼin Ndióxi̱. Na̱ vií kítáʼan xíʼin Jehová chíkaa̱na ndee̱ ña̱ ndakanixi̱nína nda̱a̱ táki̱ʼva ndákanixi̱ní miíra ta saátu ña̱ keʼéna ña̱ kúni̱ra ta xíniso̱ʼona ndiʼi ña̱ káʼa̱nra xíʼina (Rom. 8:5, 6). Tá ni̱ka̱ʼa̱n ta̱ Pablo xíʼin ta̱ Timoteo ña̱ viíka kutáʼanra xíʼin Ndióxi̱, ni̱ka̱ʼa̱nra xíʼinra ná kiʼinra kuenta xíʼin ña̱ káʼa̱nra, xíʼin ña̱ kéʼéra, ña̱ ku̱ʼvi̱-inira kunira inkana, kandíxara Ndióxi̱ ta ná kǒo keʼéra ña̱ yaku̱a̱ (1 Tim. 4:12, 15). Tá káʼviyó texto diario ña̱yóʼo chindeétáʼanña xíʼinyó ña̱ viíka kutáʼanyó xíʼin Ndióxi̱ saáchi chíndeétáʼanña xíʼinyó ña̱ ndakanixi̱níyó ndáaña xíniñúʼu viíka keʼéyó.

12. ¿Ndáana xíniñúʼu na̱ ñuu Jehová ta ndáaña chindeétáʼan xíʼinyó ña̱ vií keʼéyó chiñu?

¹² Chíndeétáʼanña xíʼinyó ña̱ ku̱a̱ʼáka chiñu kúúmiíyó ti̱xin ñuu Ndióxi̱. Ti̱xin ñuu Jehová íyo ku̱a̱ʼání chiñu, xa̱ʼa̱ ña̱kán xíniñúʼuna ku̱a̱ʼáka na̱ hermano xíʼin ná hermana na̱ vií kítáʼan xíʼin Jehová ña̱ va̱ʼa keʼéna ña̱yóʼo. Xíniñúʼuna na̱ hermano xíʼin ná hermana na̱ kivi koo precursor xíʼin misionero, na̱ kachíñu Betel, na̱ kachíñu nu̱ú íxava̱ʼana veʼe nu̱ú ndásakáʼnuyó Ndióxi̱ xíʼin oficina ña̱ traducción. Saátu xíniñúʼuna ta̱ va̱lí kúa̱an na̱ vitá-ini ña̱ va̱ʼa xa̱a̱na koona siervo ministerial, anciano xíʼin superintendente ña̱ circuito. Jehová kúni̱ra ña̱ nda̱kú ná koo ini na̱ hermano ta keʼéna ña̱ káʼa̱nra ña̱ va̱ʼa kundaana ña̱ congregación (Deut. 1:13-15). Ña̱ kaʼviyó texto diario ndiʼi ki̱vi̱ chindeétáʼanña xíʼinyó ña̱ ndakanixi̱níyó xa̱ʼa̱ texto ña̱ va̱xi nu̱ú Biblia tasaá vií keʼéyó chiñu ña̱ táxina ndaʼa̱yó ti̱xin ñuu Ndióxi̱.

ÑA̱ KIVI KEʼÉYÓ ÑA̱ VA̱ʼA KAʼVIYÓ TEXTO DIARIO

13. ¿Ndáaña kivi keʼéyó tá xa̱a̱ káʼviyó texto diario?

¹³ Ná kotoyó ndáaña kivi keʼéyó ña̱ va̱ʼa kaʼviyó texto diario ndiʼi ki̱vi̱. Ndiʼi na̱ hermano na̱ ñúʼu Betel tá kúma̱níka kixáʼana kachíñuna siʼna kéʼéna oración tasaá káʼvina texto diario. ¿Á kivi keʼún táʼan ña̱ kéʼé na̱yóʼo? Kivi ka̱ʼún xíʼin Jehová ta ka̱ʼún xíʼinra ná chindeétáʼanra xíʼún ña̱ kunda̱a̱-iniún xíʼin ña̱ káʼviún tasaá kaʼviún texto xíʼin comentario ña̱ va̱xi nu̱úña (Sant. 1:5). Kivi nda̱ka̱tu̱ʼún ña̱yóʼo miíún: “¿Ndáa ki̱ʼva chíndeétáʼan texto yóʼo xíʼi̱n ña̱ kandíxakai̱ Jehová? ¿Á íyo ña̱ sákuaʼi̱ xa̱ʼa̱ Jehová ña̱ va̱ʼa kuyatinkai̱ nu̱úra? ¿Á chíndeétáʼanña xíʼi̱n ña̱ kundeé-inii̱ ya̱ʼi̱ nu̱ú tu̱ndóʼo?”. Tá káʼviún ña̱yóʼo xíʼin na̱ veʼún á xíʼin na̱ migoún, kivi ka̱ʼa̱nndó xa̱ʼa̱ ña̱yóʼo ña̱ va̱ʼa chikaa̱ndó ndee̱ xíʼin táʼanndó (Rom. 1:12). Sava na̱ hermano káʼa̱nna xa̱ʼa̱ u̱ni̱ á ku̱mí ña̱ ndáyáʼvi ña̱ kivi chindeétáʼan xíʼinna tasaá ndákanixi̱nína xa̱ʼa̱ ña̱yóʼo iníí ki̱vi̱.

14, 15. ¿Ndáakaña kivi keʼéyó ña̱ va̱ʼa ndakaʼányó xa̱ʼa̱ ña̱ káʼviyó?

¹⁴ Yóʼo va̱xi savaka ña̱ kivi chindeétáʼan xíʼún tá xa̱a̱ káʼviún texto diario. Kivi keʼún sava ña̱ va̱xi yóʼo. 1) Xíʼin color kaʼyiún ña̱ ndáyáʼvika ña̱ ta̱vána nu̱ú Tutu Ña̱ Nátúʼun xíʼinyó ta ndakanixi̱ní xa̱ʼa̱ ña̱yóʼo. 2) Nandukú texto ña̱ va̱xi nu̱úña. 3) Kaʼvi iníí capítulo ña̱ ka̱na nu̱ú texto diario. 4) Kuniñúʼu Guía de estudio para los testigos de Jehová á nota ña̱ va̱xi nu̱ú Biblia ña̱ estudio. 5) Kaʼvi sava párrafo ña̱ va̱xi nu̱ú artículo nu̱ú ta̱vána comentario yóʼo. Tá káʼviún ña̱yóʼo nu̱ú celular á tableta, kivi katavi̱ndaʼún nu̱ú va̱xi referencia ña̱ va̱xi nda̱a̱ nu̱ú ndíʼi.b

¹⁵ Iin ñá hermana ñá kúúmií 19 ku̱i̱ya̱ ñá naní Mackenzie káʼa̱nñá ña̱yóʼo: “Tá ku̱a̱ʼá tiempo káʼvii̱ texto diario ta ndákanixi̱níi̱ xa̱ʼa̱ña, ña̱yóʼo chíndeétáʼanña xíʼi̱n ña̱ ndakaʼíi̱n xa̱ʼa̱ ña̱ ka̱ʼvii̱”.

16. ¿Ama kúú ña̱ kivi kaʼviyó texto diario?

¹⁶ ¿Ama kúú ña̱ kivi kaʼviyó texto diario? Kivi kotoún ama kúnaʼa na̱ veʼún ña̱ va̱ʼa iin kachi kaʼvindóña. Savana káʼvinaña tá kúma̱níka kuxuna tá xi̱ta̱a̱n á tá xa̱a̱ ndi̱ʼi xi̱xina á tá kúma̱ní ku̱ʼu̱nna ndakana se̱ʼena escuela. Iin ña̱ kivi keʼún kúú ña̱ ndakoún texto diario nu̱ú mesa ña̱ va̱ʼa ndakaʼún kaʼviún ña̱yóʼo, soo tá kǒo níkivi kaʼviúnña ndukú inka hora ña̱ va̱ʼa kaʼviúnña.

17, 18. ¿Nda̱chun ndáyáʼviní kuumiíyó hora ña̱ kaʼviyó texto diario, ta ndáaña chindeétáʼan xíʼinyó ña̱ kaʼviyó ña̱yóʼo ndiʼi ki̱vi̱? (Koto na̱ʼná).

¹⁷ Ndáyáʼviní ña̱ ndaka̱xiún ndáa hora kúú ña̱ kaʼviún texto diario. Saáchi tá ná kǒo keʼún ña̱yóʼo sana va̱ása kaʼviviúnña. Ta̱ John iin ta̱ hermano ta̱ kúúmií 16 ku̱i̱ya̱ káchira: “Tá va̱ása ndíʼi̱-iniún xa̱ʼa̱ ña̱yóʼo kivi nandóso-iniún kaʼviúnña”. Iin ñá hermana ñá kúúmií 25 ku̱i̱ya̱ ñá naní Sierra káchiñá: “Chíka̱i̱ ndee̱ ña̱ kaʼvii̱ texto diario tá sa̱kán ndákoi̱ tá kuma̱níka kixáʼíi̱ kachíñui̱”. Ta̱ Rogelio ta̱ kúúmií 21 ku̱i̱ya̱ káchira: “Chínúi̱ alarma nu̱ú teléfono ña̱ kúúmiíi̱ ña̱ va̱ʼa ndakaʼíi̱n kaʼvii̱ texto diario”.

¹⁸ Tá xa̱a̱ nda̱kaxiún ndáa hora kúú ña̱ kaʼviún texto diario chikaa̱ ndee̱ ña̱ kaʼviúnña mií hora saá. Kǒo taxiún ña̱ ná kasi nda̱a̱ ni iin ña̱ʼa nu̱ún. Iin ñá hermana ñá kúúmií 19 ku̱i̱ya̱ ña̱ naní Isabelle káʼa̱nñá ña̱yóʼo: “Kǒo kotoún nu̱ú teléfono ña̱ kúúmiíún nda̱a̱ ná sandíʼún kaʼviún texto diario, tá káʼviún ña̱yóʼo nu̱ú teléfono ña̱ kúúmiíún soo kíxáʼún xítoún inka ña̱ʼa va̱ʼaka kaʼviña nu̱ú tutu ña̱ kúúmiíún”. Ñá Olivia ñá kúúmií 19 ku̱i̱ya̱ káchiñá: “Iin ña̱ chíndeétáʼan xíʼi̱n ña̱ kaʼvii̱ texto diario ndiʼi ki̱vi̱ kúú ña̱ káʼvii̱ña xíʼin na̱ veʼi̱ á xíʼin na̱ migoi̱ saáchi saá íyo na̱ sándakaʼán yi̱ʼi̱ xa̱ʼa̱ ña̱yóʼo”.

SANÁʼA̱ NA̱ VA̱LÍ SE̱ʼÚN ÑA̱ KAʼVINA TEXTO DIARIO NDIʼI KI̱VI̱

19. ¿Nda̱chun ndáyáʼvi sanáʼa̱ndó na̱ va̱lí se̱ʼendó ña̱ kaʼvina texto diario ndiʼi ki̱vi̱? Ka̱ʼa̱n xa̱ʼa̱ iin ejemplo (Filipenses 1:9, 10).

¹⁹ Ndóʼó na̱ íyo se̱ʼe tá káʼvindó texto diario ndiʼi ki̱vi̱ xíʼin se̱ʼendó, tá ná kuchéena saátu keʼé na̱yóʼo. Sana válívana vitin ta sana kǒo kúnda̱a̱-inina ndáa xa̱ʼa̱ kúú ña̱ káʼvindó ña̱yóʼo ndiʼi ki̱vi̱, soo chí nu̱únínu va̱ʼaníva chindeétáʼan ña̱yóʼo xíʼinna. Iin yitu̱n loʼo tá loʼo xáʼnu túyóʼo xíʼin ti̱kui̱í, saá kivi kundoʼo se̱ʼendó, tá ná kuchéena viíka xa̱a̱na kutáʼanna xíʼin Jehová. Ña̱kán xíniñúʼu tavándó tiempo ña̱ ndakanixi̱níndó xa̱ʼa̱ texto ña̱ káʼvindó ndiʼi ki̱vi̱ ta saátu comentario ña̱ va̱xi nu̱úña (kaʼvi Filipenses 1:9, 10).

20. ¿Nda̱chun ndáyáʼviní kaʼviyó tu̱ʼun Ndióxi̱ ndiʼi kivi?

²⁰ Ta̱ Jesús ni̱ka̱ʼa̱nra: “Su̱ví si̱táva̱ʼa kuití kúú ña̱ taxi kutaku na̱ yiví chi xíniñúʼu kuniso̱ʼona ndiʼi ña̱ káʼa̱n Jehová” (Mat. 4:4). ¿Á su̱ví ña̱ nda̱a̱ ndáyáʼviní ña̱ kuxuyó ndiʼi ki̱vi̱? Ña̱ kaʼviyó tu̱ʼun Ndióxi̱ ndiʼi ki̱vi̱ ndáyáʼviníka ña̱yóʼo saáchi chindeétáʼanña xíʼinyó ña̱ ka̱kuyó.