¿Á kivi ka̱kuyó tá káʼa̱n kuitíyó ña̱ kándíxayó ta̱ táta Jesús?
Ña̱ káʼa̱n Biblia xa̱ʼa̱ ña̱yóʼo
Na̱ cristiano kándíxana ta̱ Jesús ta saátu kándíxana ña̱ ni̱xi̱ʼi̱ra xa̱ʼa̱ ku̱a̱chi ndiʼiyó (1 Pedro 3:18). Soo ña̱ va̱ʼa ka̱kuyó va̱ása xíniñúʼu ka̱ʼa̱n kuitíyó ña̱ kándíxayó ña̱ sakǎku ta̱ Jesús miíyó, chi íyoka ña̱ xíniñúʼu keʼéyó. Saátu na̱ ta̱chí ndi̱va̱ʼa kándíxana ña̱ kúú ta̱ Jesús “se̱ʼe Ndióxi̱”, soo na̱yóʼo va̱ása ka̱kuvína saáchi na̱ ndiʼi-xa̱ʼa̱va kúúna (Lucas 4:41; Judas 6).
¿Ndáaña xíniñúʼu keʼíi̱ ña̱ va̱ʼa ka̱kui̱?
Xíniñúʼu kandíxayó ña̱ ni̱xi̱ʼi̱ ta̱ Jesús xa̱ʼa̱ ku̱a̱chiyó (Hechos 16:30, 31; 1 Juan 2:2). Ña̱ va̱ʼa kandíxayó ña̱yóʼo, xíniñúʼu ndakuniyó ña̱ ndixa ki̱xi ta̱ Jesús nu̱ú ñuʼú yóʼo ta kandíxayó ña̱ ndiʼi ña̱ káʼa̱n Biblia xa̱ʼa̱ra ña̱ nda̱a̱ kúúña.
Xíniñúʼu sakúaʼayó xa̱ʼa̱ ña̱ nda̱a̱ ña̱ sánáʼa̱ Biblia (2 Timoteo 3:15). Ña̱ Biblia káʼa̱nña ña̱ ni̱ka̱ʼa̱n ta̱ apóstol Pablo xíʼin ta̱ Silas ña̱yóʼo xíʼin iin ta̱ xi̱ndaa veʼe-ka̱a: “Kandíxa ta̱ táta Jesús, ta ka̱kún xíʼin na̱ veʼún”. Ta tándi̱ʼi, ki̱xáʼana nátúʼunna “xa̱ʼa̱ tu̱ʼun Jehová” xíʼinra (Hechos 16:31, 32).a Xa̱ʼa̱ ña̱kán, ña̱ va̱ʼa xa̱a̱ ta̱ xi̱ndaa veʼe-ka̱a kandíxara ta̱ Jesús, siʼna xi̱niñúʼu xa̱a̱ra sakúaʼara xa̱ʼa̱ sava ña̱ʼa ña̱ va̱ása yo̱ʼvi̱ ña̱ va̱xi nu̱ú tu̱ʼun Ndióxi̱. Xi̱niñúʼu xa̱a̱ra kunda̱a̱ káxi inira xa̱ʼa̱ ña̱ káʼa̱n tu̱ʼun Ndióxi̱ (1 Timoteo 2:3, 4).
Xíniñúʼu ndandikó-iniyó (Hechos 3:19). Saátu xíniñúʼu ndandikó-iniyó xa̱ʼa̱ ku̱a̱chiyó, xíniñúʼu na̱ʼa̱yó ña̱ kúsuchí-iniyó xa̱ʼa̱ ña̱ va̱ása va̱ʼa ke̱ʼéyó á xa̱ʼa̱ ña̱ nda̱kanixi̱níyó xa̱ʼa̱ ña̱ va̱ása va̱ʼa. Inkana xíniñúʼu kiʼinna kuenta ña̱ ndixa nda̱ndikó-iniyó xa̱ʼa̱ ku̱a̱chiyó ta va̱ása kéʼékayó ña̱ʼa ña̱ kúndasí Ndióxi̱ xínira, ña̱kán xíʼin ña̱ kéʼéyó xíniñúʼu na̱ʼa̱yó ña̱yóʼo (Hechos 26:20).
Xíniñúʼu ndakuchiyó (Mateo 28:19). Ta̱ Jesús ni̱ka̱ʼa̱nra ña̱ na̱ kúni̱ kundiku̱n sa̱tára xíniñúʼu ndakuchina. Ta̱ xi̱ndaa veʼe-ka̱a ta̱ xa̱a̱ ni̱ka̱ʼa̱nyó xa̱ʼa̱, ni̱xa̱a̱vara nda̱kuchira (Hechos 16:33). Ta saátu ke̱ʼé iin tiʼvi na̱ yiví tá ndi̱ʼi na̱túʼun ta̱ Pedro xíʼinna xa̱ʼa̱ ta̱ Jesús. Ña̱ Biblia káʼa̱nña ña̱ “ndiʼi na̱ va̱ʼaní xi̱niso̱ʼo ña̱ na̱túʼunra nda̱kuchina” (Hechos 2:40, 41).
Xíniñúʼu kuniso̱ʼoyó ña̱ káʼa̱n ta̱ Jesús (Hebreos 5:9). Na̱ ndíku̱n ta̱ Jesús náʼa̱na xíʼin ña̱ kéʼéna ña̱ ndíku̱nna ndiʼi ña̱ ni̱ka̱ʼa̱nra (Mateo 28:20). Va̱ása xíniso̱ʼo kuitína ña̱yóʼo chi kéʼévanaña (Santiago 1:22).
Xíniñúʼu kundeé-iniyó nda̱a̱ nu̱ú ndíʼi (Marcos 13:13). Na̱ ndíku̱n ta̱ Jesús xíniñúʼu kundeé-inina ña̱ va̱ʼa ka̱kuna (Hebreos 10:36). Tá kúú ta̱ apóstol Pablo va̱ʼaní xi̱ndiku̱nra ña̱ sa̱náʼa̱ ta̱ Jesús ta nda̱kúní ni̱xi̱yo inira xíʼin Ndióxi̱, ta ke̱ʼéra ña̱yóʼo nani tá ndu̱ura cristiano iinsaá nda̱a̱ tá ki̱vi̱ ña̱ ni̱xi̱ʼi̱ra (1 Corintios 9:27).
¿Á kivi ka̱kui̱ tá ku̱a̱ʼání yichi̱ ná ka̱ʼi̱n oración ña̱ kéʼé na̱ ndándikó-ini?
Ku̱a̱ʼání na̱ yiví na̱ ndíku̱n inka religión ku̱a̱ʼání yichi̱ ndíkóna káʼa̱nna oración ña̱ káʼa̱n xa̱ʼa̱ na̱ ndándikó-ini á oración ña̱ káʼa̱n xa̱ʼa̱ ña̱ ka̱kuna. Tá káʼa̱nna ña̱yóʼo ndákunina ña̱ kúúna na̱ yiví ku̱a̱chi ta kándíxana ña̱ ni̱xi̱ʼi̱ ta̱ Jesús xa̱ʼa̱ ku̱a̱china. Saátu káʼa̱nna xíʼin ta̱ Jesús ña̱ ná ki̱ʼvira níma̱na ta ná kuniʼira yichi̱ nu̱úna. Soo ña̱ Biblia kǒo káʼa̱n káxiña xíʼinyó ndáa tu̱ʼun kúú ña̱ kuniñúʼuyó tá káʼa̱nyó xíʼin Ndióxi̱ xa̱ʼa̱ ña̱ ndándikó-iniyó ta saátu va̱ása káʼa̱nña ña̱ tuku ta tuku xíniñúʼu ndikóyó ka̱ʼa̱nyó xa̱ʼa̱ iin ña̱ʼa xíʼinra.
Savana ndákanixi̱nína ña̱ tá tuku ta tuku ndíkó iin na̱ yiví káʼa̱nna oración ña̱ kéʼé na̱ ndándikó-ini, kiviva ka̱kuna. Soo nda̱a̱ ni iin oración va̱ása kiviví sakǎkuña miíyó. Na̱ yiví ku̱a̱chiva kúúyó ta xa̱ʼa̱ ña̱yóʼo ndiʼi ki̱vi̱ kéʼéyó ña̱ va̱ása va̱ʼa (1 Juan 1:8). Xa̱ʼa̱ ña̱kán, ta̱ Jesús sa̱náʼa̱ra na̱ discípulora ña̱ ndiʼi ki̱vi̱ xíniñúʼu ka̱ʼa̱nna xíʼin Ndióxi̱ ña̱ ná ixakáʼnu-inira xa̱ʼa̱ ku̱a̱china (Lucas 11:2, 4). Tá kúú sava na̱ cristiano na̱ xi̱ndatu kutaku ndiʼi tiempo va̱ása níkivika ndakiʼinna ña̱yóʼo saáchi sa̱ndákoona ña̱ ndasakáʼnuna Ndióxi̱ (Hebreos 6:4-6; 2 Pedro 2:20, 21).
¿Ndáa míí ka̱na xa̱ʼa̱ oración ña̱ kéʼé na̱ ndándikó-ini?
Na̱ nándukú va̱ʼa xa̱ʼa̱ ña̱yóʼo va̱ása kúnda̱a̱ káxi inina ndáa míí ki̱xáʼa xa̱ʼa̱ ña̱ oración yóʼo. Savana ndákanixi̱nína ña̱ ki̱xáʼana kéʼéna ña̱yóʼo tá kǒo níxiinka na̱ yiví kandíxana ña̱ xi̱kaʼa̱n na̱ veʼe-ñu̱ʼu. Inkatuna ndákanixi̱nína ña̱ ki̱xáʼana kándíxana oración ña̱ kéʼé na̱ ndándikó-ini tá siglo dieciocho xíʼin diecinueve. Ña̱ Biblia va̱ása káʼa̱nña xa̱ʼa̱ ña̱yóʼo ta ni kǒo káʼa̱nña xíʼinyó ña̱ keʼéyóña, saáchi kǒo kítáʼanña xíʼin ña̱ sánáʼa̱ Biblia.
a Ña̱ Biblia sánáʼa̱ña ña̱ ki̱vi̱ Ndióxi̱ kúú Jehová.