Ndásakáʼnuyó Ndióxi̱ tá ndákaʼányó ña̱ cena ta̱ Jesús

NA̱ NDÍKU̱N ta̱ Jesús xa̱ʼndara chiñu nu̱úna ña̱ ndakaʼánna xa̱ʼa ña̱ ni̱xi̱ʼi̱ra ta nanítuña “cena ta̱ Jesús” (1 Corintios 11:20). ¿Nda̱chun ndáyáʼviní ña̱ ni̱xi̱ʼi̱ ta̱ Jesús? ¿Ama xíniñúʼu keʼénaña ta ndáa ki̱ʼva xíniñúʼu keʼénaña?

Ta̱ Jesús chi̱ndúʼú xa̱ʼa ña̱ ndakaʼányó xa̱ʼa ña̱ ni̱xi̱ʼi̱ra ña̱ ñu̱ú tá xi̱ndakaʼánna pascua ña̱ ku̱i̱ya̱ 33 ña̱ tiempo vitin. Ña̱ pascua yóʼo iin yichi̱ xi̱ndakaʼánna xa̱ʼaña nu̱ú ku̱i̱ya̱, ña̱ 14 xíka tí yo̱o̱ nisán. Yo̱o̱ nisán yóʼo kíxaʼárí yo̱o̱ marzo tá kíxaʼá kána yo̱o̱ xa̱á chí ndiví, ki̱vi̱ saá kíxaʼána káʼvina nda̱a̱ tá xínu u̱xu̱ ku̱mí ki̱vi̱ saá kéʼéna ña̱ pascua, tá xi̱ku̱aá tá xa̱a̱ sáʼvi ñu̱ʼu.

Ñu̱ú saá ke̱ʼé ta̱ Jesús pascua xíʼin na̱ apóstol, soo tá ki̱ta ta̱ Judas Iscariote ku̱a̱ʼa̱nra, saá kúú ña̱ ke̱ʼéra inka cena. Ña̱yóʼo kúú ña̱ ni̱ndi̱ʼvi nu̱ú ña̱ pascua, ña̱kán vitin kéʼénaña iin yichi̱ nu̱ú ku̱i̱ya̱.

Ta̱ Mateo ni̱ka̱ʼa̱nra: “Ta̱ Jesús ki̱ʼinra iin si̱táva̱ʼa, tándi̱ʼi ni̱ka̱ʼa̱nra xíʼin Ndióxi̱, ta̱ʼvíraña ta ta̱xiraña ndaʼa̱ na̱ discípulo, ta káchira: ‘kiʼinndóña, kuxundóña. Ña̱yóʼo ndakiʼin nu̱ú ku̱ñui̱ʼ. Ta saátu ki̱ʼinra iin copa, tándi̱ʼi ni̱ka̱ʼa̱nra xíʼin Ndióxi̱, ta ta̱xiraña ndaʼa̱na, ta káchira: ‘Ndiʼi ndóʼó, koʼo copa yóʼo; chi ña̱yóʼo ndakiʼin nu̱ú “trato ña̱ chikai̱ xíʼin ni̱íi̱”, ña̱ ku̱ita̱ xa̱ʼa ndiʼi na̱ yiví ña̱ va̱ʼa ndoo ku̱a̱chinaʼ”(Mateo 26:26-28).

Savana kándíxana mií ña̱ nda̱a̱ nda̱saa ta̱ Jesús si̱táva̱ʼa ku̱ñura ta nda̱saatura vino ni̱i̱ra. Soo tá ta̱xi ta̱ Jesús si̱táva̱ʼa ndaʼa̱ na̱ apóstol kúma̱níva kuvira. ¿Á ña̱ ndixa kúú ña̱ xi̱xina ku̱ñura ta xi̱ʼina ni̱i̱ra? Su̱ví ña̱ ndixa kúúña, chi tá saá níkeʼéna kúni̱ kachiña na̱ xíxi ku̱ñu na̱ yivíva kúúna tasaá na̱ʼa̱tuña ña̱ kǒo íxato̱ʼóna ley Ndióxi̱ (Génesis 9:3, 4; Levítico 17:10). Nu̱ú Lucas 22:20 ni̱ka̱ʼa̱n ta̱ Jesús: “Copa yóʼo ndákiʼin nu̱ú iin trato xa̱á ña̱ chika̱i̱ xíʼin ni̱íi̱ ña̱ ku̱ita̱ xa̱ʼa ndóʼó”. ¿Á ndixa ndu̱u copa yóʼo “iin trato xa̱á”? Kǒo níndúuña iin trato, chi iin ña̱ʼa kǒo kívi nduuña iin trato, iin trato kúni̱ kachiña ña̱ xi̱nu nu̱ú tu̱ʼun káʼa̱nvana.

Si̱táva̱ʼa xíʼin vino yóʼo ndákiʼin kuitíña nu̱ú ku̱ñu ta̱ Jesús xíʼin ni̱i̱vara. Ta̱ Jesús xi̱niñúʼura si̱táva̱ʼa ña̱ ni̱ndoo tá ke̱ʼéna pascua chi ña̱yóʼo kǒo yuxa̱n iyá níchika̱a̱na xíʼinña (Éxodo 12:8). Ña̱ Biblia káʼa̱nña xa̱ʼa yuxa̱n iyá ña̱ ndákiʼinña nu̱ú ku̱a̱chi na̱ yiví. Soo si̱táva̱ʼa ña̱ xi̱niñúʼu ta̱ Jesús ndákiʼinña nu̱ú ku̱ñura, chi ta̱yóʼo kǒo ku̱a̱chi níxikuumiíra (Mateo 16:11, 12; 1 Corintios 5:6, 7; 1 Pedro 2:22; 1 Juan 2:1, 2).

Tá vino kúáʼa ndákiʼinrá nu̱ú ni̱i̱ra, ta xíʼin táyóʼo chi̱ka̱a̱ra iin trato xa̱á. Ta̱ Jesús ni̱ka̱ʼa̱nra, ni̱i̱ra kúú ña̱ ndákata ku̱a̱china. Xa̱ʼa ni̱i̱ra yóʼo savana ndóo ku̱a̱china nu̱ú Ndióxi̱ tasaá ndíʼvina iin trato xa̱á xíʼinra (Hebreos 9:14; 10:16, 17). Trato yóʼo xu̱ná yichi̱ nu̱ú 144,000 na̱ ku̱ʼu̱n chí ndiví. Ta kán nduuna rey, nduuna su̱tu̱ ña̱ chindeé táʼanna xíʼin na̱ kundoo nu̱ú ñuʼú (Génesis 22:18; Jeremías 31:31-33; 1 Pedro 2:9; Revelación 5:9, 10; 14:1-3).

¿Ndáana kúú na̱ va̱ʼa kuxu si̱táva̱ʼa ta koʼona vino tá ndákaʼányó xa̱ʼa ña̱ ni̱xi̱ʼi̱ ta̱ Jesús? Táki̱ʼva sa̱kuaʼayó na̱ ku̱ʼu̱n chí ndiví kúú na̱ va̱ʼa keʼé ña̱yóʼo, chi xíʼin na̱yóʼo kúú ña̱ chi̱ka̱a̱ra iin trato xa̱á. Espíritu santo Ndióxi̱ kúú ña̱ sáka̱ʼa̱n-inina ña̱ va̱ʼa kúnda̱a̱-inina ña̱ ndáka̱xinra miína ku̱ʼu̱nna chí ndiví (Romanos 8:16). Na̱yóʼo kúú na̱ kaʼndachíñu xíʼin ta̱ Jesús (Lucas 22:29).

¿Ndáaña kéʼé na̱ koo nu̱ú ñuʼú yóʼo? Kéʼéna chiñu ña̱ xa̱ʼnda ta̱ Jesús ña̱ ndatakana ndakaʼánna xa̱ʼa ña̱ ni̱xi̱ʼi̱ra tasaá náʼa̱na ña̱ íxato̱ʼóna ña̱ ni̱xi̱ʼi̱ra, ni kǒo xíxina si̱táva̱ʼa ta ni kǒo xíʼina vino. Na̱ testigo Jehová iin yichi̱va ndákaʼánna ña̱yóʼo nu̱ú ku̱i̱ya̱, tá ndíʼvi ñu̱ʼu 14 tí yo̱o̱ nisán. Ni loʼova kúú na̱ ku̱ʼu̱n chí ndiví ni saáví ndiʼi na̱ ndíku̱n ta̱ Jesús ndákaʼánvana xa̱ʼa ña̱yóʼo. Saá kúú ña̱ ndákaʼányó ña̱ kúni̱ní Jehová xíʼin ta̱ Jesús xínina miíyó (Juan 3:16).