¿Á kúúmií na̱ testigo Jehová Biblia miína?
Na̱ testigo Jehová xa̱a̱ ku̱a̱ʼání nu̱ú Biblia xíniñúʼuna ña̱ va̱ʼa kaʼvina. Ta ña̱ ndáyáʼvika nu̱úna kúú ña̱ Traducción del Nuevo Mundo ta ku̱a̱ʼání nu̱ú tu̱ʼun íyoña, saáchi va̱xi ki̱vi̱ Ndióxi̱ nu̱úña ta saátu káxiní káʼa̱nña ta va̱ása nása̱maña.
Va̱xi ki̱vi̱ Ndióxi̱ nu̱úña. Ku̱a̱ʼání na̱ sándaya̱ʼa Biblia inka nu̱ú tu̱ʼun kǒo chínúuna ki̱vi̱ Ndióxi̱ nu̱úña. Tá kúú, iin Biblia ña̱ sa̱ndáya̱ʼana inka nu̱ú tu̱ʼun, yáʼaka setenta ki̱vi̱ na̱ yiví na̱ ka̱chíñu ña̱ va̱ʼa kanaña va̱xi nu̱úña, soo nda̱a̱ ni iin yichi̱ kǒo ki̱vi̱ Jehová va̱xi nu̱úña, ni tu̱ʼun miíra kúúña.
Nu̱ú ña̱ Traducción del Nuevo Mundo va̱xiva ki̱vi̱ Ndióxi̱ nu̱ú ni̱ka̱ʼyi̱ña tá ya̱chi̱, soo kǒo ki̱vi̱ na̱ comité na̱ sa̱ndáya̱ʼa ña̱yóʼo va̱xi nu̱úña.
Va̱ása nása̱maña. Sava Biblia ña̱ sa̱ndáya̱ʼana inka nu̱ú tu̱ʼun na̱samana ña̱ káʼa̱nña chi va̱ása inkáchika íyoña xíʼin ki̱ʼva ña̱ ni̱ka̱ʼyi̱ña tá ya̱chi̱. Tá kúú ña̱ va̱xi nu̱ú Mateo 7:13 inka nu̱ú Biblia káchiña: “Ki̱ʼvindó chí yéʼé táñu, saáchi yéʼé ndíka̱ xíʼin yichi̱ ndíka̱ ku̱a̱ʼa̱nña ndayá á xi̱tu̱n”. Tu̱ʼun ña̱ ni̱ka̱ʼyi̱ña tá ya̱chi̱ va̱ása káʼa̱nña xa̱ʼa̱ “ndayá”, chi ña̱ ni̱ka̱ʼa̱nña xa̱ʼa̱ kúú ña̱ “ndiʼi-xa̱ʼa̱na”. Na̱ sa̱ndáya̱ʼa tu̱ʼun yóʼo xi̱ndakanixi̱nína ña̱ ku̱ʼu̱n na̱ kéʼé ña̱ va̱ása va̱ʼa ndayá ña̱ xo̱ʼvi̱na ndiʼi tiempo. Soo ña̱ Traducción del Nuevo Mundo va̱ása káʼa̱nña xa̱ʼa̱ ña̱yóʼo chi ña̱ káʼa̱nña xa̱ʼa̱ kúú ña̱ ndiʼi-xa̱ʼa̱vana nda̱a̱ táki̱ʼva káʼa̱n ña̱ ni̱ka̱ʼyi̱ tá ya̱chi̱.
Káxi káʼa̱nña. Tá sándaya̱ʼana Biblia inka nu̱ú tu̱ʼun, xíniñúʼu káxi kooña ta va̱ása ixayo̱ʼvi̱ña xíʼin na̱ yiví ña̱ kunda̱a̱-inina xíʼinña. Ná ka̱ʼa̱nyó xa̱ʼa̱ iin texto. Nu̱ú ku̱a̱ʼání Biblia siaʼa sa̱ndáya̱ʼana Mateo 5:3: “Si̱íní íyo na̱ kúúmií espíritu ndáʼvi”. Soo na̱ yiví na̱ íyo tiempo vitin va̱ása kúnda̱a̱-inina xíʼinña. Xa̱ʼa̱ ña̱kán nu̱ú ña̱ Traducción del Nuevo Mundo siaʼa sa̱ndáya̱ʼana ña̱ versículo yóʼo: “Si̱íní íyo na̱ kúnda̱a̱-ini ña̱ xíniñúʼuna Ndióxi̱”.
Na̱ sándaya̱ʼa Biblia ña̱ Traducción del Nuevo Mundo íxato̱ʼóna ki̱vi̱ Ndióxi̱ ta kǒo násamana ña̱ káʼa̱nña chi káxiva íyoña. Saátu táxinaña ndaʼa̱ na̱ yiví ta kǒo xu̱ʼún kíʼinna xa̱ʼa̱ña, ta xa̱ʼa̱ ña̱ kéʼéna ña̱yóʼo ku̱a̱ʼánína kivi kaʼvinaña tu̱ʼun miína ni kǒo xu̱ʼún kúúmiína ña̱ satánaña á ña̱ kueennaña.