¿Á xa̱a̱ xíniñúʼún ña̱ aplicación JW Library?

Ña̱ aplicación JW Library kúúña iin programa nu̱ú kivi taváún Biblia xíʼin savaka tutu ña̱ kúni̱ miíún ta kǒo xu̱ʼún kuniñúʼún ña̱ taváúnña, va̱ʼa taváún video xíʼin audio ta chika̱únña nu̱ú teléfono, tableta á camputadora.

¿NDÁAÑA KEʼÚN ÑA̱ VA̱ʼA KOOÑA NU̱ÚN? Ki̱ʼvi Internet ta tavá ña̱ aplicación JW Library. Ña̱ aplicacion yóʼo va̱ʼa chika̱únña nu̱ú teléfono, tableta á compuadora. Tá kúúmiíún Internet, kuná ña̱ aplicación yóʼo ta tavá nda̱a̱ ndáaka ña̱ kúni̱ miíún. Tá kǒo Internet kúúmiíún veʼún, ki̱ʼvi xíʼin Internet ña̱ íyo Salón del Reino, á veʼe iin na̱ migoún, á nu̱ú íyo iin biblioteca á nda̱a̱ ndáaka nu̱ú íyo Internet. Tá xa̱a̱ ta̱váún ndiʼiña kǒo xíniñúʼu kuumiíkaún Internet ña̱ va̱ʼa kuniñúʼúnña. ¿Ndáaña keʼún ña̱ va̱ʼa taváún ña̱ xa̱á? Tá yáʼa tiempo xíniñúʼu ndasaxa̱únña.

¿NDA̱CHUN VA̱ʼA KOOÑA NU̱ÚYÓ? Ku̱a̱ʼání ña̱ va̱ʼa kúúmií JW Library, kivi kuniñúʼuyóña tá káʼvi miíyó á tá ku̱a̱ʼa̱nyó reunión. Saátu tá ku̱a̱ʼa̱nyó servicio á nda̱a̱ ndáaka míí nu̱ú xíkayó.