Lesina 9
Wane Ni Ra Tha God Kai Falu
Uria ta ni bo’o na kuki falu ana si do ki sui bana? (1)
Si ta na to’o lan̄ai lana falu la ana spirit? (2)biran̄a falu? (3) manate’edo falu? (4) se’edo falu? (5)
Si n̄ata bilia la ufita na kuki to fasia? (6)
1. Jehova God e falu bia ka abu. Nia ka thathamia imole na keki fa’abaita nia keki to falu—ana spirit, biran̄a, manate’edo, bia se’edo. (1 Peter 1:16) Kulu kuki sukwai talin̄ai bona’a uria to falu la i mana tha God. Kulu to ila fanua nei iano e ai si falu. Kuka ili sukwai lau bo’o uria su’usi lana si manate’edo ni ili lana garo la. Kulu kusi feda.
2. Falu La Ana Spirit: Masa kulu kuka thathami ra ifatha Jehova, kulu kusi lae sulia ta to’odoa mada abula la nai nao ana to’odoa ne ai si mamana. Kulu kuki thaka bona’a fasia to’odoa ne asi mamana bia kusi adomi nia lau ana tesi tatha la lau. (2 Corinthians 6:14-18; Revelation 18:4) Masa kuka to na’a sula mamana la sulia tha God, kuki riki lea ania ta wane si tole garo ani kulu.—2 John 10,11.
3. Biran̄a Falu: Jehova e thathamia toa na keki fa’abaita nia keki lae sulia biran̄a Kristian ana siman̄a ki sui. (1 Peter 2:12) Nia e rikia si do ki sui kulu ilia, doanita kuka thaufunia. (Hebrews 4:13) Kulu tala’ana kuki to fasia biran̄a ta’a ana oea bia tei si do ne ai si falu ila fanua nei iano.—1 Corinthians 6:9-11.
4. Manate’edo Falu: Masa kulu fa’a fun̄ua manatakalua ana falu la, manata thathaolia la, ma abula la kalua kai falu lau bo’o. (Philippians 4:8) Suita masa kulu to ila na si do ne ai si falu, nia kai ade kulu kuki fulato’ona ta’a la ki. (Matthew 15:18-20) Kuki to lau bo’o fasi tei si do ana se’ethathala na kai labatai nia manatakalua. Kuki fa’afun̄ua manatakalua ana si do falu ki asi man̄a kulu to’odo sulia Baelana tha God.
5. Se’edo Falu: Sulia kera takwe ifatha God, Kristian keki beta sulia se’eda bia afila kera kai falu. Sa’ua abakulua ibuira kulu tomai i masu’u bia asi man̄a kuki fan̄a mada siman̄a kuki ra ana si fan̄a ki. Masa e ai osi to ana ta sikula lea uria lae la, si do ta’a eri oki ili fafia. (Deuteronomy 23:12, 13) Beta lana se’ekalua kai falu kai falea lau bo’o to lea la. Luma n̄a Kristian keki beta bia ka falu ilana bia ima. Kai fatai nia abula lea la ima’alutana figua.
6. Sin̄ata Ne Falu: Wane ni ra tha God ki keki n̄ata mamana asi man̄a ki sui. Toa na keki lole kesi kotho ila Inotoa tha God. (Ephesians 4:25; Revelation 21:8) Kristian ki kesi aruto’ona si n̄ata ne ta’a. Kera kesi ron̄o uria mada onion̄a la ne bilia mada u’unu ne bilia. Sulania n̄ata lada e falu, kera keki takwe e’eta bona’a ila ra mada ila sukulu bia ila malutana imole ki sui.—Ephesians 4:29, 31; 5:3.
[Pictures on page 18, 19]
Wane ni ra tha God kai falu ana si do ki sui bana