Eski bann reponse-la important?

“Zot pou konn la verité, ek la verité pou libere zot.”​—JEAN 8:32.

LA VERITÉ ki ena dan la Bible kapav libere nou ar bann fausse croyance ki ena lor Jésus, ki mette nou dan confusion ou-soit mem ki trompe nou. Alors, eski seki nou croire lor li, vrai-mem ena l’importance? Oui. Li important pou Jéhovah. Li important pou Jésus. Ek li bizin important pou nou.

● Kifer sa important pou Jéhovah? Simplement parski “Bondié Li l’amour.” (1 Jean 4:8) Jéhovah envie ki nou vive heureux pou touletan. Jésus ti dire: “Bondié finn tellement content le monde [bann dimoune] ki Li finn donne so sel Garson ki Li finn crée direct, pou ki tou seki ena la foi en li . . . gagne la vie pou touletan.” (Jean 3:16) Bondié ti envoye so Garson lor la terre pou ki li sauve nou ek donne nou possibilité pou vive pou touletan dan Paradis lor la terre, en accord avek projet ki Li ti ena au commencement. (Genèse 1:28) Bondié bien envie donne la vie eternel bann ki aprann la verité lor so Garson, ek ki vive en accord avek sa.​—Romains 6:23.

● Kifer sa important pou Jésus? Jésus aussi content bann dimoune. Li ti montré ki li ti ena enn l’amour ki pousse li pou faire bann sacrifice kan li ti disposé pou donne so la vie pou nou. (Jean 15:13) Li ti koné ki kan li ti pé faire sa, li ti pé donne bann dimoune sel moyen ki pou permette zot gagne la vie sauve. (Jean 14:6) Eski sa bizin etonne nou ki Jésus envie trouve maximum dimoune gagne bann bienfait grace a sacrifice ki li’nn faire? C’est a cause sa ki li ti donne so bann vrai disciple l’ordre pou enseigne bann dimoune partout lor la terre, volonté ek projet Bondié.​—Matthieu 24:14; 28:19, 20.

● Kifer sa bizin important pou nou? Pense enn coute bann kitsoz ki ena enn grand l’importance pou ou​—ou la santé ek ou famille. Eski ou envie ki ou-mem ek bann dimoune ki ou content ena enn bon la santé ek enn pli bon la vie? A travers Jésus, Jéhovah donne ou ek bann dimoune ki ou content l’esperance pou ena enn la santé parfait ek enn la vie ki pou dure pou touletan dan le monde nouveau, kot pa pou ena douleur ek souffrance. (Psaume 37:11, 29; Révélation 21:3, 4) Eski ou ti pou content vive dan enn le monde coumsa? Si oui, ena enn kitsoz ki ou bizin faire.

Guette encore enn fois verset ki’nn cité enba titre sa lartik-la: “Zot pou konn la verité, ek la verité pou libere zot.” Kan nou konn la verité lor Jésus ek lor role ki li ena dan realisation projet Bondié, sa kapav libere nou ar pli pire qualité l’esclavage ki kapav ena​—l’esclavage peché ek la mort. Mais, pou ou profite sa liberté-la, ou bizin “konn la verité.” Alors, kifer ou pa aprann plus lor sa verité-la ek guetté couma ou ek bann dimoune ki ou content kapav gagne bann bienfait grace a sa? Bann Témoins de Jéhovah pou bien content pou aide ou.