Couma ou kapav comprend la Bible

Eski enn ou bann camarade finn deja dire ou bann mauvais kitsoz lor enn dimoune ki jamais ou finn joinde? Kan finalement ou ti joinde sa dimoune-la, eski remark ki ou camarade ti faire finn empeche ou trouve bann talent ek bann qualité ki sa dimoune-la ena? Kapav arrive mem zaffaire kan sa concerne la Bible.

L’APOTRE Paul ti montré ki kapav arrivé si nou pa lire la Bible avek enn l’esprit ouvert. Concernant certain Juif dan so lepok, Paul ti ecrire: “Mo dire dan zot faveur ki zot ena enn zele pou Bondié, mais pa dapré connaissance exact.”—Romains 10:2.

Certain Juif ki ti vive dan premier siecle pa ti’lé accepté enn verité ki bann l’Écritures hébraïques ti montré dan enn fason clair: l’identité Messie. Jésus ki ti sorti Nazareth ti rempli tou condition ki bann l’Écritures hébraïques dire concernant le Messie, ek li ti accompli tou bann prophetie ki ena enn rapport avek le Messie. Pourtant, beaucoup parmi bann Juif ti ena zot prop l’idée lor le Messie ek sa finn empeche zot pou comprend Parole Bondié.

Ki nou kapav aprann ar sa l’experience-la? Li important ki nou lire la Bible avek enn l’esprit ouvert. Bann raisonnement ki enn dimoune fini faire a l’avance lor certain kitsoz kapav empeche li pou comprend la Bible.

Par exemple, enn professeur ki enseigne lor la religion dan Caroline du Nord, dan l’Amérique, dire ki la Bible li “enn livre ki finn ecrire par bann dimoune ek ki ena pensé bann dimoune, raisonnement bann dimoune, ki bien different entre zot ek okenn sa bann raisonnement-la pa donne enn direction sur lor couma nou bizin amenn nou la vie.” Si enn dimoune ti bizin lire la Bible avek l’idée ki c’est enn livre ki “ena pensé bann dimoune,” eski li pa pou ena tendance pou rejette bann direction ek bann principe ki li pa content?

Parkont, la Bible encourage nou pou etudié li en profondeur. Concernant bann Béréen ki ti vive dan lepok Paul, bann l’Ecriture dire: “Sa bannla ti extra content pou gagne parole Bondié, ek zot ti examine bann l’Ecriture en profondeur toulé-jour pou guetté si sa bann kitsoz-la ti exact.” (Actes 17:11) Pareil couma bann Béréen, kitfois ou pou bizin tire tou bann mauvais raisonnement ki pareil couma enn voile, ki kapav empeche ou bien comprend la Bible. Alors, anou lire Parole ki Bondié finn faire ecrire, avek enn l’esprit ouvert ek avek enn grand desir pou comprend so message bien interessant.