Nou trouve sagesse Jéhovah dan creation

“Nou trouve so bann qualité invisible . . . a travers bann kitsoz ki Li’nn faire.”—ROM. 1:20.

1. Ki l’effet sagesse sa le monde-la finn ena lor beaucoup dimoune zordi?

ZORDI le monde considere bann dimoune ki finn gagne enn grand connaissance couma bann dimoune ki sage. Mais eski vrai-mem zot sage? Non, parski zot pa kapav ni aide bann dimoune, ni donne zot bann conseil ki sur pou zot trouve enn vrai sens dan la vie. Au contraire, bann ki laisse-zot influencé par sa bann dimoune-la, a la fin, zot “coumadir pé balloté par bann vague ek pé laisse tou sorte qualité l’enseignement sarié [zot] partout-partout couma di-vent.”—Éph. 4:14.

2, 3. (a) Kifer Jéhovah “tousel [ki] sage”? (b) Couma sagesse ki sorti kot Bondié li different ar sagesse ki ena dan le monde?

² C’est vrai-mem enn grand difference avek bann dimoune ki gagne vrai sagesse ki sorti kot Jéhovah! La Bible dire nou ki Jéhovah “tousel sage.” (Rom. 16:27) Li konn tou seki bizin koné lor l’univers, lor fason ki’nn faire li ek couma li’nn arrivé existé. C’est Jéhovah ki finn faire bann la loi physik ki ena dan la nature, lor ki bann dimoune depann pou faire bann recherche. Alors, Li pa impressionné par bann invention ki dimoune faire, ni par bann philosophie ki kitfois beaucoup considere couma bann philosophie extra. “Sagesse sa le monde-la li bete devant Bondié.”—1 Cor. 3:19.

³ La Bible dire nou ki Jéhovah “donne la sagesse” so bann serviteur. (Prov. 2:6) Sagesse ki sorti kot Bondié li pa flou couma philosophie bann dimoune. Au contraire, li aide nou pou ena enn bon jugement ek li basé lor enn connaissance exact ek lor l’intelligence. (Lire Jacques 3:17.) L’apotre Paul ti etonné devant sagesse Jéhovah, ki li ti trouve extraordinaire. Li ti ecrire: “Ah, sa quantité bon kitsoz ki Bondié donné-la, so sagesse, ek so connaissance, zot pa fini jamais! Kisannla ki kapav explik so bann jugement ek comprend so bann chemin?” (Rom. 11:33) Parski Jéhovah tousel sage, nou ena confiance ki so bann la loi donne nou pli bon direction possible dan fason ki nou bizin vive. Apré tou, Jéhovah konn plus ki n’importe kisannla seki nou bizin pou vive heureux.—Prov. 3:5, 6.

Jésus: “enn zouvrier qualifié”

4. Cite enn fason ki kapav aide nou pou trouve sagesse Jéhovah.

⁴ Nou kapav observe sagesse ki Jéhovah ena, ensam avek so bann lezot qualité extraordinaire, dan bann kitsoz ki Li’nn faire. (Lire Romains 1:20.) Depuis pli grand ziska pli tipti kitsoz, creation Jéhovah revele so bann qualité. N’importe kot-sa nou guetté—la-haut dan le ciel ou-soit lor la terre enba nou lipié—nou trouve beaucoup preuve ki enn Createur ki rempli ar l’amour ek ki bien sage, existé. Nou kapav aprann beaucoup lor Li kan nou examine bann kitsoz ki Li’nn faire.—Ps. 19:1; Is. 40:26.

5, 6. (a) A part Jéhovah, kisannla ki ti participe dan creation? (b) Ki nou pou examiné, ek kifer?

⁵ Jéhovah pa ti tousel kan li “ti crée le ciel ek la terre.” (Gen. 1:1) La Bible montré ki bien avant ki Li ti crée bann kitsoz physik, Li ti crée enn creature spirituel ek par moyen sa creature-la, Li ti forme “tou bann lezot kitsoz.” Sa creature spirituel-la ti sel Garson ki Bondié ti crée direct—“premier-né dan tou creation”—ki plitar ti vive lor la terre ek li ti appel Jésus. (Col. 1:15-17) Pareil couma Jéhovah, Jésus ena la sagesse. En realité, Proverbes chapitre 8 decrire li coumadir li-mem la sagesse. Sa-mem chapitre-la represente aussi Jésus couma “zouvrier qualifié” Bondié.—Prov. 8:12, 22-31.

⁶ Alors, creation physik faire nou konn sagesse Jéhovah ek aussi sagesse Jésus, so zouvrier qualifié. Ena bann leson bien important ki nou kapav aprann ar la creation. Anou examine quatre creature ki Proverbes 30:24-28 decrire couma bann creature ki “sage par l’instinct.”a

Nou kapav tire leson ar travail dur ki enn fourmi faire

7, 8. Ki bann kitsoz ou’nn trouve interessant lor fourmi?

⁷ Mem bann kitsoz ki nou kapav appel “pli tipti lor la terre,” kapav aprann nou beaucoup kan nou examine fason ki Jéhovah inn crée zot ek seki zot faire. Par exemple, anou examine sagesse ki bann fourmi ena par instinct.—Lire Proverbes 30:24, 25.

⁸ Certain dimoune ki faire bann recherche pensé ki ena enn quantité fourmi ki travail dur lor la terre ek enba la terre ek ki zot 200,000 fois pli beaucoup ki bann dimoune. Bann fourmi zot organisé en plusieurs groupe, ek dan la plupart bann groupe ena trois type fourmi: bann la reine, bann male ek bann travailleur. Chaque categorie fourmi cooperé pou ki zot tou dan sa groupe-la gagne seki zot bizin. Ena enn l’espece fourmi ki trouve en Amérique du Sud ek ki coupe bann feuille, ek nou kapav dire ki li enn jardinier bien efficace. Sa ti insecte-la cultive enn l’espece champignon enba la terre, li fertilise sa bann champignon-la, li transplante zot ek li taille zot dan enn fason pou gagne enn pli grand rendement possible. Bann ki faire recherche finn decouvert ki sa “jardinier” efficace-la adapté so bann zeffort dapré quantité mangé ki so groupe bizin.b

9, 10. Couma nou kapav imite bann fourmi?

⁹ Nou kapav tire bann leson ar sa bann fourmi-la. Kan nou observe zot, nou aprann ki si nou envie gagne bann bon resultat, nou bizin travail dur. La Bible dire nou: “Al guette enn fourmi, toi ki paresse; guette seki li faire ek vinn sage. Mem si li pena ni commandant, ni enn kikenn pou veille li, ni chef, li prepare so mangé pendant l’été; li’nn ramasse so mangé pendant lepok recolte.” (Prov. 6:6-8) Jéhovah ek so zouvrier Qualifié, Jésus, zot toulé-deux zot travail dur. Jésus ti dire: “Mo Papa inn contigne travail ziska asterla, ek moi aussi mo pé contigne travail.”—Jean 5:17.

¹⁰ Nou ki imite Bondié ek Christ, nou aussi nou bizin vinn bann dimoune ki travail dur. N’importe ki responsabilité nou kapav ena dan l’organisation Bondié, nou tou nou bizin ena “beaucoup pou faire dan travail nou Seigneur.” (1 Cor. 15:58) Alors, nou bizin suive conseil ki Paul ti donne bann chretien dan Rome: “Pa faire paresse dan zot travail. Vinn bien zelé grace a l’esprit saint. Travail couma bann esclave pou Jéhovah.” (Rom. 12:11) Nou bann zeffort pou faire volonté Jéhovah pa dan vide, parski la Bible donne nou sa l’assurance-la: “Bondié pa injuste pou blié seki zot inn faire ek l’amour ki zot finn montré pou so nom.”—Héb. 6:10.

Enn protection spirituel

11. Decrire certain caracteristik enn daman.

¹¹ Enn daman, c’est enn lot ti zanimo ki kapav faire nou aprann bann leson important. (Lire Proverbes 30:26.) Sa zanimo-la ressemblé enn gros lapin mais li ena bann zoreille courte ek rond ek bann ti la patte. Li reste dan bann roche. Li ena bann bon lizié ki aide li pou protege-li, ek sa permette li al cachiette bien vite dan bann trou ek dan fente bann roche kot difficile pou grimpé, kan lezot zanimo vinn attak li. Enn daman inn faire pou vive en groupe, sa protege li ek aide li pou reste chaud en hiver.c

12, 13. Ki bann leson nou kapav aprann ar enn daman?

¹² Ki nou kapav aprann ar enn daman? Premierement, remarké ki sa zanimo-la pa mette li-mem dan bann place dangereux kot facile pou attak li. Au contraire, li servi so deux bon lizié ki permette li trouve bann lezot zanimo ki pé vinn attak li, mem kan zot encore bien loin, ek li reste pré ar bann trou ek bann fente roche kot li kapav rentré pou protege-li. Li pareil aussi pou nou, nou bizin ena enn bon vision spirituel pou ki nou kapav trouve bann danger ki pé menace nou dan le monde Satan. L’apotre Pierre ti donne sa conseil-la bann chretien: “Garde zot bon sens, ek reste lor zot garde. Zot adversaire, le Diable, pé circulé couma enn lion ki pé criyé ek ki pé rod kikenn pou devoré.” (1 Pierre 5:8) Kan Jésus ti lor la terre, li ti reste lor so garde kont tou bann manigance ki Satan ti essaye faire pou faire li perdi so l’integrité. (Mat. 4:1-11) Jésus inn vrai-mem laisse enn bon l’exemple pou so bann disciple!

¹³ Enn fason ki nou kapav reste lor nou garde c’est kan nou profite protection spirituel ki Jéhovah donne nou. Fodé pa nou neglige nou l’etude Parole Bondié ek nou bizin contigne assisté reunion regulierement. (Luc 4:4; Héb. 10:24, 25) En plus, pareil couma enn daman developpe bien kan li reste ensam avek lezot daman, nou bizin reste proche ar nou bann frere ek soeur pou ki nou kapav ena “enn l’echange l’encouragement” entre nou. (Rom. 1:12) Kan nou faire seki bizin pou gagne protection Jéhovah, nou montré ki nou d’accord avek David ki ti ecrire dan enn psaume: “Jéhovah Li enn grand roche ek enn forteresse pou moi, ek sa Kikenn ki faire moi sapé-la. Mo Bondié Li mo grand roche. Mo pou al cachiette derriere Li.”—Ps. 18:2.

Perseveré malgré l’opposition

14. Mem si enn sel sauterelle pa faire nou peur, ki nou kapav dire lor enn l’armée sauterelle?

¹⁴ Nou kapav aprann aussi ar bann sauterelle. Enn sel sauterelle ki mesure zis cinq centimetre longueur kitfois pa faire nou peur, mais enn l’armée sauterelle, oui. (Lire Proverbes 30:27.) Bann sauterelle ena reputation pou ena enn l’appetit vorace, ek enn l’armée sa bann insecte-la kapav devore bien vite enn karo ki enn planteur pré pou recolté. La Bible compare tapage enn l’armée insecte ki pé vini, parmi ena bann sauterelle, ar tapage bann char la guerre ek tapage bann la paille ki pé brulé. (Yoël 2:3, 5) Parfois bann dimoune inn faire bann difé pou essaye arrete enn l’armée sauterelle, mais souvent sa pa’nn servi nanyin. Kifer? Parski lekor bann sauterelle ki’nn mort teigne bann la flamme, ek apré le reste sauterelle contigne avancé sans ki personne kapav arrete zot. Mem si li pena ni enn le roi ni enn chef, enn l’armée sauterelle agir pareil couma enn l’armée bien organisé, ek zot reussi passe lor preské n’importe ki l’obstacle.d—Yoël 2:25.

15, 16. Couma bann proclamateur Royaume Bondié dan nou lepok zot pareil couma enn l’armée sauterelle?

¹⁵ Prophete Yoël ti compare l’activité bann serviteur Jéhovah ar travail bann sauterelle. Li ti ecrire: “Zot galopé pareil couma bann zom puissant. Zot grimpe enn muraille pareil couma bann soldat. Sakenn prend so prop chemin, zot pa change chemin. Zot pa pousse zot camarade. Zot contigne allé couma enn zom fort dan so la marche; ek mem si ena ki tombé a cause bann fleche difé, bann lezot pa arreté.”—Yoël 2:7, 8.

¹⁶ Sa prophetie-la decrire bien bann proclamateur Royaume Bondié dan nou lepok, pa vrai? Okenn “muraille” l’opposition pa finn kapav arrete zot predication. Au contraire, zot imite Jésus ki pa ti arrete faire volonté Bondié mem si beaucoup dimoune ti meprise li. (Is. 53:3) Li vrai ki certain chretien inn “tombé a cause bann fleche” kan zot inn mort couma bann martyre a cause zot la foi. Mais kan-mem, l’activité predication inn contigné, ek bann proclamateur pé contigne augmenté. En realité, souvent a cause persecution, beaucoup dimoune ki kitfois pa ti pou tann la bonne nouvelle, finn tann message lor Royaume Bondié. (Actes 8:1, 4) Dan ou ministere, eski ou perseveré pareil couma bann sauterelle—mem devant l’indifference ek l’opposition?—Héb. 10:39.

“Reste attaché ar seki bon”

17. Kifer la patte bann lezard kapav colle ar bann surface ki lisse?

¹⁷ Bann lezard pa parette affecté par la loi gravité. (Lire Proverbes 30:28.) En realité, pendant longtemps bann scientifik finn impressionné par capacité ki sa bann ti creature-la ena pou grimpe bien vite lor bann muraille ek mem lor bann plafond ki lisse, sans ki zot tombé. Couma enn lezard faire sa? So secret c’est pa ki li ena bann ventouse ou-soit enn certain qualité la colle dan so la patte. Lor chaque lé-doigt enn lezard ena bann ti pli kot ena plusieurs millier ti bosse ki ressemblé bann poil. Chaque bosse ena plusieurs centaine fibre ek boute sa bann fibre-la ressemblé enn soucoupe. La force ki tou sa bann fibre-la ensam produire, li assez pou tini plus ki poids lekor sa lezard-la—mem kan li sauvé li al vite ek li marche enba-la-haut lor enn vitre! Bann ki faire recherche zot bien etonné par capacité ki bann lezard ena, zot dire ki kapav servi bann materiaux synthetik ki imite la patte bann lezard pou faire bann la tresse collante bien fort.e

18. Couma nou kapav faire sur ki nou touletan “reste attaché ar seki bon”?

¹⁸ Ki nou kapav aprann ar bann lezard? La Bible donne nou sa conseil-la: “Ena degout pou seki mauvais, reste attaché ar seki bon.” (Rom. 12:9) Dan le monde Satan partout ena bann mauvais l’influence ki kapav faire nou perdi nou l’attachement ar bann principe biblik. Par exemple, si nou frequente bann dimoune ki pa suive bann la loi Bondié—ki li dan lekol ou-soit dan travail ou-soit mem a travers bann mauvais divertissement—sa kapav ena enn mauvais l’effet lor nou determination pou faire seki bon. Pa laisse sa arrive ou! Parole Bondié donne sa l’avertissement-la: “Pa pensé ki to trop sage.” (Prov. 3:7) Au contraire, suive sa conseil sage ki Moïse ti donne peuple Bondié dan le passé: “C’est pou Jéhovah to Bondié ki to bizin ena la crainte. C’est Li ki to bizin servi ek c’est ar Li ki to bizin reste attaché.” (Deut. 10:20) Si nou reste attaché ar Jéhovah, nou pou imite Jésus, ek enn verset ti dire lor Jésus: “To finn content la justice, ek to finn ena la haine pou desobeissance la loi.”—Héb. 1:9.

Bann leson ki nou aprann ar la creation

19. (a) Ki bann qualité Jéhovah ou finn trouvé dan creation? (b) Couma sagesse ki sorti kot Bondié kapav aide nou?

¹⁹ Couma nou finn trouvé, tou bann kitsoz ki Jéhovah inn faire montré nou so bann qualité ek nou kapav aussi aprann bann leson important grace a seki Li’nn crée. Plus nou examine de pré seki Jéhovah inn faire, plus nou etonné kan nou trouve so sagesse extraordinaire. Si nou prend compte sagesse ki sorti kot Bondié, sa pou faire nou pli heureux asterla ek sa pou protege nou dan l’avenir. (Eccl. 7:12) Oui personnellement, nou pou trouvé ki bann parole Proverbes 3:13, 18 zot vrai: “Heureux enn kikenn ki finn trouve la sagesse, ek enn kikenn ki gagne discernement. [La sagesse] li enn pié ki donne la vie bann ki attrape li, ek bann ki tini li ferme, pou appel zot heureux.”

[Note]

Eski ou rappel?

Ki bann leson pratik nou aprann ar . . .

• bann fourmi?

• bann daman?

• bann sauterelle?

• bann lezard?

[Zimage lor page 18]

Enn daman gagne protection parski li vive en groupe. Eski ou aussi ou faire pareil?

[Zimage lor page 20]

Pareil couma bann sauterelle, bann chretien perseveré

[Zimage lor page 20]

Pareil couma bann lezard ki coumadir reste collé ar bann muraille, bann chretien reste attaché ar seki bon

[Remerciement photo lor page 20]

Stockbyte/Getty Images