LESON 22
Kouma Ou Kapav Koz lor Bon Nouvel?
Amezir ki ou pe aprann bann verite ki ena dan Labib, kitfwa ou pe dir oumem, ‘Be tou dimounn bizin tann sa!’ Li vre, tou dimounn bizin tann sa! Me, kitfwa ou inpe per pou partaz avek lezot seki ou pe aprann. Nou pou gete kouma ou kapav sirmont sa laper-la ek koumans partaz bon nouvel ki ena dan Labib avek lazwa.
1. Kouma ou kapav partaz seki ou’nn aprann avek bann dimounn ki ou kone?
Bann disip Zezi ti dir: “Nou pa kapav aret koz lor bann kitsoz ki nou finn trouve ek tande.” (Zistwar Bann Apot 4:20, NW) Laverite ti ena boukou valer pou zot, akoz sa zot ti anvi partaz li avek maximum dimounn. Eski ou osi ou ena sa mem santiman-la? Si wi, rod bann lokazion pou partaz avek ou fami ek ou bann kamarad bann kitsoz ki ou’nn aprann, ek fer sa avek respe.—Lir Kolosien 4:6.
Bann lide pratik
Kan ou pe koz avek enn manb ou fami, ou kapav koz lor enn size Biblik kan ou dir: “Mo’nn aprann enn kitsoz interesan sa semenn-la.”
Partaz enn verse ankourazan avek enn kamarad ki malad ouswa ki strese.
Kan ou bann koleg travay pe pran ou nouvel, ou kapav dir zot seki ou’nn aprann dan ou letid Labib ouswa dan enn renion.
Montre ou bann kamarad sit Internet jw.org.
Invit lezot pou asiste ou letid Labib ouswa montre zot kouma zot kapav demann enn letid Labib lor jw.org.
2. Kifer li vo lapenn ki nou pres ansam avek bann manb lasanble?
Bann disip Zezi ti fer plis ki zis partaz bon nouvel avek bann dimounn ki zot ti kone. Zezi ti “avoy zot de par de devan li dan tou lavil” pou prese. (Lik 10:1) Sa fason prese-la li bien organize ek sa permet maximum dimounn pou tann bon nouvel lor Rwayom Bondie. Bann disip ti gagn plis lazwa kan zot ti pres ansam. (Lik 10:17) Eski ou osi, ou kapav fixe ou lobzektif pou pres avek bann manb lasanble?
ANOU GET INPE PLIS
Ou pou aprann kouma ou kapav sirmont ou laper ek gagn lazwa kan ou partaz bon nouvel avek lezot.
3. Zeova pou avek ou
Sertin anvi prese me zot gagn per seki dimounn pou dir ouswa kouma lezot pou reazir.
Eski ou gagn per pou partaz seki ou’nn aprann? Kifer ou ena sa santiman-la?
Zwe VIDEO-la, ek apre sa, get sa kestion-la ansam:
Kouma sa bann zenn Temwin Zeova la ti reisi sirmont zot laper?
Lir Izai 41:10, ek apre sa, get sa kestion-la ansam:
Kouma lapriyer kapav ed ou kan ou gagn per pou prese?
Eski ou ti kone?
Boukou Temwin Zeova ti panse ki zame zot ti pou gagn kouraz pou al prese. Par exanp, Sergey ti mank konfians an li ek ti trouv sa difisil pou koz avek lezot. Me get ki li ti dir apre ki li ti koumans etidie Labib: “Mem si mo ti per, mo ti koumans dir lezot seki mo ti aprann. Mo ti bien etone parski kan mo ti koz lor Labib avek lezot, sa ti ed mwa pou ena plis konfians. Ek kan mo ti koz lor mo bann krwayans sa ti fortifie mo lafwa.”
4. Ena respe
Avan ki ou partaz bon nouvel avek enn dimounn, ou bizin reflesi lor seki ou pou dir. Me li inportan osi ki ou reflesi lor kouma ou pou dir li. Lir 2 Timote 2:24, NW ek 1 Pier 3:15, 16, ek apre sa, get sa bann kestion-la ansam:
Kouma ou ti pou met an pratik sa bann verse-la kan ou koz lor Labib avek lezot?
Sertin manb ou fami ouswa ou bann kamarad kitfwa pa pou dakor avek ou. Ki ou kapav fer? Ek ki fode pa ou fer?
Kifer li pli bon ki ou koz ar zot avek respe, olie ki ou dir zot dan ki kitsoz zot bizin krwar?
5. Kan nou partaz bon nouvel sa donn nou lazwa
Zeova ti donn Zezi responsabilite pou partaz bon nouvel. Kouma Zezi ti konsider sa responsabilite-la? Lir Zan 4:34, ek apre sa, get sa bann kestion-la ansam:
Kan nou manz bann bon manze, sa ed nou pou kontign viv ek sa fer nou kontan. Kifer Zezi ti dir ki fer volonte Bondie, kouma par exanp prese, li koumadir manze?
Dapre ou, ki lazwa nou kapav gagne kan nou partaz bon nouvel?
Tips
Pandan renion lasemenn, not bann lide ki kapav ed ou pou koumans bann konversasion.
Demann dimounn ki fer ou letid, seki ou bizin fer pou ki ou kapav koumans fer bann devwar dan renion lasemenn. Sa bann devwar-la pou ed ou pou ena plis lasirans pou partaz seki ou’nn aprann avek lezot.
Servi lankadre “Sertin Dimounn Dir” ouswa “Sertin Kapav Demande” pou prepar ou pou reponn bann kestion ki bann dimounn abitie poze ek bann lobzeksion.
SERTIN KAPAV DEMANDE: “E, ki bon nouvel?”
Kouma ou kapav sezi sa lokazion-la pou dir dimounn-la seki ou’nn aprann dan ou letid Labib?
SEKI NOU’NN APRANN
Partaz bon nouvel avek lezot fer nou gagn lazwa, ek li kapav pli fasil ki seki ou ti pe panse.
Eski Ou Rapel?
Kifer nou bizin partaz bon nouvel avek lezot?
Kouma ou kapav fer sa avek respe?
Kouma ou kapav sirmont ou laper pou partaz seki ou pe aprann avek lezot?
DEKOUVER
Get kat fason bien sinp pou servi kart vizit jw.org pou partaz bon nouvel.
Examinn kat kalite ki kapav ed ou pou partaz bon nouvel.
“Eski To Pare pou ‘Lapes Dimoun’?” (Latour Degard, Septam 2020)
Gete kouma enn lexanp ki ena dan Labib kapav donn nou kouraz pou partaz bon nouvel mem si nou zenn.
Gete kouma ou kapav koz lor Labib avek bann manb ou fami ki pa konn Zeova.
“Tous Leker Nou Fami ki Pa Servi Jéhovah” (Latour Degard, 15 Mars 2014)