Kestion Bann Lekter

Kan eski bann gouvernman sa lemond-la pou anonse ki ena “lape ek sekirite”?

Kouma nou ti trouve dan “Kestion Bann Lekter” ki fek sorti dan enn Latour Degard,a Zeova biento pou met “so lide” dan leker ‘sa dis korn-la’ (tou bann gouvernman). Savedir ki zot pou donn zot pouvwar ek zot lotorite “bebet sovaz kouler rouz,” setadir l’Organisation des Nations unies (ONU). Enn lot nom pou sa bebet-la se “zimaz bebet sovaz.” (Rev. 13:14, 15; 17:3, 16, 17) Lerla, ‘sa dis korn-la’ ek sa bebet sovaz ki fek gagn pouvwar la, pou detrir tou bann fos relizion ki ena lor later. Me eski bann gouvernman pou anonse ki ena “lape ek sekirite”b avan ouswa apre destriksion fos relizion?—1 Tes. 5:3.

Avredir, nou pa vremem kone kan bann gouvernman pou anonse ki ena “lape ek sekirite.” Zezi plizir fwa inn dir so bann disip ki zot bizin “kontign veye,” ek si nou ti kone kan exakteman bann gouvernman ti pou fer sa lanons-la, nou pa ti pou bizin kontign veye. (Mat. 24:42; 25:13; 26:41) Aster-la, anou esey konpran pli bien sa profesi ki Zeova inn fer lapot Pol ekrir la.

Pol inn ekrir: “Kan bann-la pou dir: ‘Lape ek sekirite!’ lerla, enn sel kou, san ki zot atann enn destriksion pou vinn lor zot.” (1 Tes. 5:2, 3) Nou bann piblikasion souvan inn dir ki bann gouvernman pou fer lanons “lape ek sekirite” zis avan ki gran soufrans koumanse, ek gran soufrans koumanse avek destriksion Gran Babilonn, setadir lanpir mondial fos relizion. Nou ti dir osi ki, kan bann-la pou anonse ki ena “lape ek sekirite,” nou ti pou kone ki gran soufrans pe koumanse.

Selman, apre ki nou’nn bien reflesi lor la, nou’nn trouve ki kitfwa ena enn lot fason pou konpran sa profesi-la. Li posib osi ki bann gouvernman pou anonse ki ena “lape ek sekirite” apre destriksion fos relizion. Kifer nou dir sa? Anou examinn sa bann kestion-la.

Ki responsabilite fos relizion finn ena dan bann lager? Labib dir: “Kot li [‘sa gran prostitie-la,’ setadir Gran Babilonn] finn trouv disan . . . bann ki finn touye lor later.” (Rev. 17:1, 5; 18:24) Toutlong listwar, fos relizion finn inplik li dan bann lager, ek akoz li, finn ena boukou violans ek bann milyon dimounn inn mor. Alor, fos relizion li plis enn zouti laviolans ek lager, ki enn zouti lape ek sekirite. Ek akoz sa, li lozik pou panse ki bann gouvernman pou bizin detrir Gran Babilonn avan, pou ki apre zot kapav fer lanons “lape ek sekirite.” Selman, nou pa kapav san poursan sir.

Ki pou arive apre lanons “lape ek sekirite”? Pol dir: “Enn sel kou, [“lerlamem,” NTKM] san ki zot atann enn destriksion pou vinn lor zot.” (1 Tes. 5:3) Not pou letid pou sa verse-la dir: “Isi, Pol pe rod dir ki pou ena bien tigit letan ant lanons ‘lape ek sekirite’ ek destriksion bann ki fer sa lanons-la, ek li posib osi ki sa arive deswit, enn deryer lot.” Alor, pou ki destriksion bann gouvernman arive deswit apre ki zot fer lanons “lape ek sekirite,” li lozik pou panse ki zot pou fer sa lanons-la apre destriksion fos relizion.

Kouma bann serviter Zeova pou reazir kan sa pou arive? Pol dir: “Mo bann frer, zot pa dan nwarte, pou ki sa zour-la pran zot par sirpriz parey kouma lizour pran bann voler par sirpriz.” (1 Tes. 5:4) Alor, si bann gouvernman fer lanons “lape ek sekirite” apre destriksion fos relizion, bann serviter Zeova pou kone ki destriksion bann gouvernman bien-bien pre. Parkont, pou sa bann gouvernman-la, zot destriksion pou vini kouma enn voler, parski li pou arive “enn sel kou, san ki zot atann.”

Enn kitsoz nou kapav sir, se ki biento ‘sa dis korn-la’ ek sa bebet sovaz ki fek gagn pouvwar la, pou detrir tou bann fos relizion. Se lerla ki gran soufrans pou koumanse. Nou kone osi ki pou ariv enn moman kot bann gouvernman pou fer lanons “lape ek sekirite.” Kan eski sa pou arive? Dan sa lartik-la, nou’nn koz lor de posibilite. Premierman, li posib ki zot fer sa lanons-la avan destriksion fos relizion. Selman, zot pou fer sa lanons-la avan ki zot detrir bann fos relizion. Deziemman, li posib ki bann gouvernman fer sa lanons-la apre ki zot fini detrir bann fos relizion. Dan toule-de ka, nou pou bizin atann pou kone seki pou arive. Bien souvan, se pandan ouswa apre ki enn profesi realize, ki nou konpran li pli bien.—Konpar ar Zan 12:16.

An-atandan, seki pli inportan, se pa kan bann gouvernman pou fer lanons “lape ek sekirite,” me se plito ki nou res fidel ar Zeova. Alor, anou “res lor nou gard ek gard nou bon sans” pou ki nou kapav prepar nou pou seki pou arive, mem si nou pa kone kouma li pou arive.—1 Tes. 5:6.