Frer ek Ser Aze—To Ena Boukou Valer pou Lasanble

Kitfwa twa osi to nepli kapav fer sertin kitsoz ki to ti pe kapav fer kan to ti zenn. Ek mem si to kone ki to’nn res fidel ar Zeova pandan boukou lane, kan to konpar seki to’nn fer pou Li dan lepase ar seki to pe kapav fer aster-la, kitfwa to santi twa dekouraze. Si to ena sa santiman-la, ki to kapav fer pou to gard to lazwa?

SEKI ZEOVA ANVI TO FER

Demann tomem, ‘Ki Zeova anvi mo fer?’ Bann parol ki trouv dan Deteronom 6:5 kapav rekonfort twa. Sa verse-la dir: “To bizin kontan Zeova to Bondie avek tou to leker, tou to lavi, ek tou to lafors.”

Sa verse-la montre ki Zeova anvi ki to servi Li avek tou to leker, tou to lavi, ek tou to lafors. Savedir ki fode pa to konpar twa ar lezot, ek ki fode pa to konpar seki to pe fer aster-la ar seki to ti pe kapav fer avan.

Reflesi lor la: Kan to ti pli zenn, kitfwa to ti pe fer to maximum pou Zeova, dapre to sitiasion sa lepok-la. Me ki to pe fer pou Zeova aster-la? Kitfwa to ankor pe fer to maximum pou Zeova, dapre to sitiasion aster-la. Kan to reflesi lor la, savedir ki dan lepase to ti pe fer to maximum pou Zeova ek azordi to ankor pe fer to maximum pou Li.

TO LEXPERYANS KAPAV ED LEZOT

Reflesi lor sa osi: Olie ki to zis pans bann kitsoz ki to nepli kapav fer, reflesi lor bann lokazion ek bann fason ki to kapav ed lezot. Aster-la ki to pli vie, to kapav fer sertin kitsoz ki to pa ti kapav fer kan to ti pli zenn. Par exanp, to kapav:

Partaz to lexperyans ar lezot. Reflesi lor seki Labib dir dan sa bann verse-la:

Lerwa David: “Mo ti enn zenom ek aster-la mo’nn vinn vie, me mo pa finn trouv enn dimounn zis ki’nn abandone, ni so bann zanfan ki pe rod dipin.”—Ps. 37:25.

Zozwe: “Aster-la, gete! Mo pre pou mor, ek zot bien kone avek tou zot leker ek tou zot lavi ki dan tou bann bon promes ki Zeova zot Bondie inn fer, pena enn sel ki pa finn akonpli. Tou finn realize pou zot. Pena enn sel parol ladan ki pa finn akonpli.”—Zozwe 23:14.

Kitfwa to’nn deza dir bann kitsoz koumsa pou ankouraz lezot. David ek Zozwe plizir fwa ti viv sa bann kitsoz-la, ek parski zot ti ena lexperyans, zot bann parol ti ena enn pli gran lefe lor lezot.

Si sa fer lontan ki to pe servi Zeova, to kapav koz lor tou seki to’nn trouv Zeova fer pou twa ek pou lezot. Eski to rapel enn moman dan to lavi kot to ti trouv Zeova ed so bann serviter dan enn fason extraordiner? Partaz sa ar bann frer ek ser! Sa kapav ena enn bon lefe lor zot. Kan to partaz to lexperyans ar lezot, sa kapav bien ankouraz zot.—Rom. 1:11, 12.

Enn lot fason ki to kapav ankouraz lezot, se kan to asiste bann renion an prezansiel, tanki to kapav. Kan to vinn Lasal, to kapav ankouraz to bann frer ek ser, ek zot kapav ankouraz twa zot osi. Connie, ki nou ti mansione avan, dir: “Kan mo asiste bann renion an prezansiel, sa ed mwa pou pa dekouraze. Ar sa kantite lamour ki mo gagne kan mo vinn Lasal la, kouma mo kapav dekouraze! Mo fer zefor pou montre mo bann frer ek ser mo rekonesans kan mo donn zot bann ti kado, ek mo fer mo maximum pou kontign servi Zeova ansam ar zot.”

ZEOVA APRESIE TOU SEKI TO FER POU LI

Labib koz lor boukou dimounn ki Zeova ti bien kontan, mem si akoz zot sitiasion, zot pa ti kapav fer kantite ki zot ti anvi pou servi Li. Anou pran lexanp Simeon, ki ti bien vie kan Zezi ti ne. Kan Simeon ti vinn dan tanp, sirman li ti trouv bann zenn zom ki ti pe fer bann travay inportan dan tanp. Ek parski li ti nepli kapav servi Zeova parey kouma sa bann zenn-la, kitfwa li ti panse ki li pa ti ena boukou valer pou Zeova. Selman, Zeova pa ti trouv li koumsa. Li ti trouve ki Simeon “ti enn zom drwat ek [ki] li ti ena enn gran respe pou Bondie,” ek Zeova ti donn li privilez pou trouv Zezi, ki ti ankor enn ti-baba. Zeova ti osi servi Simeon pou predir ki Zezi ti pou vinn Lemesi! (Lik 2:25-35) Pou Zeova, se pa kantite lafors fizik ki Simeon ti ena ki ti inportan. Seki ti inportan pou Zeova, se Simeon so gran lafwa. Labib dir ki “lespri sin ti pe gid” Simeon.

Twa osi, mem si to nepli kapav fer boukou kitsoz dan to servis pou Zeova, to kapav sir ki to fidelite ena boukou valer pou Li. Labib dir ki Bondie “aksepte don ki [enn kikenn] done dapre seki li ena, pa dapre seki li pena.”—2 Kor. 8:12.

Alor, konsantre twa lor seki to kapav fer. Par exanp, reflesi lor bann diferan fason ki to kapav prese, mem si se zis pou enn tigit letan. To kapav osi ankouraz to bann frer ek ser kan to telefonn zot ouswa to avoy zot enn ti kart. Bann ti kitsoz ki to fer avek boukou lamour, kapav bien ankouraz bann frer ek ser, sirtou parski se enn kikenn kouma twa, ki pe servi Zeova depi boukou lane, ki pe fer sa pou zot.

Sertin frer ek ser aze nepli kapav fer otan pou Zeova. Par exanp, get sa zoli lexperyans ki’nn arive dan Les Lafrik la, dan lankadre “Sa Finn Sap So Lavi.”

Pa bliye ki to lafwa ek to fidelite kapav ankouraz lezot. To enn zoli lexanp landirans, ek to kapav sir ki ‘Bondie pa inzis pou bliye seki to’nn fer ek lamour ki to’nn montre pou so nom kan to’nn servi bann ki sin ek ki to pe kontign servi bann-la.’—Ebre 6:10.

FER TOU SEKI TO KAPAV POU ED LEZOT

Dapre bann resers, kan bann vie dimounn ed lezot, sa ed zot pou ena enn pli bon lasante fizik ek mantal, ek zot viv pli lontan.

Biensir, mem si zot fer bann bon kitsoz pou lezot, sa pa vedir ki zot pa pou tom malad ouswa ki zot pa pou gagn bann lezot difikilte ki zot kapav gagne parski zot vie. Se akoz pese ki nou’nn erite ar Adan ki nou vinn vie ek nou mor, ek se zis Rwayom Bondie ki pou kapav rezoud sa problem-la.—Rom. 5:12.

Me kanmem sa, kan zot kontign fer seki Zeova demann zot, kouma par exanp kan zot kontign ed lezot pou aprann konn Li, sa ranforsi zot lesperans ek sa kapav mem ede pou ki zot ena enn bon lasante. Alor, frer ek ser aze, pa bliye ki seki to fer pou Zeova ena boukou valer pou Li ek ki to enn zoli lexanp lafwa pou to bann frer ek ser.