LARTIK LETID 22
KANTIK 15 Loue Premie-Ne Zeova!
Kifer Nom Zeova Bien Inportan pou Zezi?
“Mo finn fer zot konn to nom ek mo pou kontign fer sa.”—ZAN 17:26.
PWIN PRINSIPAL
Dan sa lartik-la, nou pou gete seki Zezi ti pe rod dir kan li ti dir ki li’nn fer konn nom Zeova. Nou pou trouve osi kouma Zezi inn montre ki Zeova Li sin ek ki tou seki Satan inn dir lor Zeova li fos.
1-2. (a) Lanwit avan so lamor, ki Zezi ti fer? (b) Ki nou pou examine dan sa lartik-la?
ZEDI aswar le 14 Nizan lane 33 Nou Lepok, Zezi ti selebre Repa Lesegner ar so bann zapot ki fidel. Li ti kone ki plitar dan sa lanwit-la, Zida ti pou trayir li ek so bann lennmi ti pou tortir li ek touy li. Akoz sa, apre ki li ti fini manze ar so bann zapot, li ti dir bann-la boukou kitsoz pou ankouraz zot. Ek avan ki zot ale, Zezi ti fer enn lapriyer ki bien inportan. Nou trouv sa lapriyer-la dan Zan sapit 17.
2 Dan sa lartik-la, nou pou gete (1) seki nou kapav aprann ar sa lapriyer-la konsernan seki ti pe trakas Zezi avan so lamor, ek (2) seki ti vremem inportan pou Zezi kan li ti lor later.
“MO FINN FER ZOT KONN TO NOM”
3. Ki Zezi ti dir konsernan nom Zeova, ek ki li ti pe rod dir? (Zan 17:6, 26)
3 Dan so lapriyer, Zezi ti dir: “Mo finn fer zot konn to nom.” Nou kone ki sa ti bien inportan pou Zezi parski de fwa li ti dir sa dan so lapriyer. (Lir Zan 17:6, 26.) Me ki Zezi ti pe rod dir? Eski li ti fer zot kone ki nom Bondie se Zeova? Non, parski bann disip Zezi ti bann Zwif ek zot ti deza konn nom Bondie. Anplis, ena nom Bondie apepre 7,000 fwa dan bann Lekritir Ebre. Alor, kan Zezi ti dir, “Mo finn fer zot konn to nom,” li pa ti pe rod dir ki li ti ansegn so bann disip ki nom Bondie se Zeova. Li ti pe rod dir ki li ti ansegn zot ki kalite Bondie Zeova ete. Li ti ed so bann disip pou konn Zeova pli bien, setadir pou konn proze ki Zeova ena pou later ek pou bann dimounn, pou konn so bann zoli kalite, ek pou kone seki Li’nn fer ek seki Li pou fer pou zot. Zis Zezi tousel ki konn Zeova sa kantite-la!
4-5. (a) Kouma nom enn kikenn kapav ena plis linportans pou nou? Donn enn lexanp pou explike. (b) Kouma nom Zeova ti vinn pli inportan pou bann disip Zezi?
4 Anou pran enn lexanp pou explik sa. Fer koumadir ena enn ansien dan to lasanble ki apel David ek ki enn dokter. To konn sa frer-la depi plizir lane. Me enn zour, to lavi an danze ek to bizin fer enn gro loperasion. Kan to al lopital, se David ki fer to loperasion ek ki sap to lavi. Eski to pa pou plis kontan David ankor? Depi sa zour-la, sak fwa ki to tann so nom, to pans seki li’nn fer pou twa! Li nepli zis sa ansien ki to kone depi bien lontan la, me li osi sa dokter ki’nn sap to lavi la.
5 Dan mem fason, bann disip Zezi ti deza konn nom Zeova. Me sa nom-la ti vinn pli inportan pou zot parski Zezi ti ed zot pou konpran pli bien kisann-la Zeova ete. Kouma Zezi ti fer sa? Zezi ti imit so Papa dan tou seki li ti fer ek tou seki li ti dir. Alor, kan bann disip ti trouv fason ki Zezi ti ansegne ek fason ki li ti azir ar bann dimounn, zot ti aprann “konn” Zeova pli bien.—Zan 14:9; 17:3.
“TO NOM, NOM KI TO’NN DONN MWA”
6. Kan Zezi ti dir ki Zeova ti donn li So nom, ki li ti pe rod dir? (Zan 17:11, 12)
6 Dan so lapriyer, Zezi ti priye pou so bann disip, ek li ti dir: “Vey lor zot akoz to nom, nom ki to’nn donn mwa.” (Lir Zan 17:11, 12.) Eski Zezi ti pe rod dir ki aster-la ti bizin apel li Zeova? Non, parski kan Zezi ti koz lor nom Zeova, li ti dir Zeova ki se “to nom.” Alor, Zezi pa ti pe rod pran nom Zeova. Dan sa verse-la, kan Zezi dir, “Nom ki to’nn donn mwa,” ki li ti pe rod dir? Premierman, Zezi ti pe rod dir ki li reprezantan Zeova; li Zeova so Portparol. Li ti vinn lor later ek li ti fer bann mirak “lor nom [so] Papa.” (Zan 5:43; 10:25) Ek deziemman, nom Zezi vedir “Zeova Delivre.” Savedir ki dan sinifikasion nom Zezi, ena nom Zeova.
7. Servi enn lexanp pou explike kouma Zezi ti kapav koz lor nom Zeova.
7 Anou pran enn lexanp pou explik sa. Enn anbasader reprezant dirizan enn pei ek li koz lor nom sa dirizan-la. Alor, kan sa anbasader-la koze, li ena mem lotorite ki sa dirizan-la. Dan mem fason, Zezi ti ena lotorite pou koz lor nom Zeova, parski li ti reprezant Zeova.—Mat. 21:9; Lik 13:35.
8. Avan mem ki Zezi ti vinn lor later, kifer Zeova ti kapav dir ki Zezi ti “pe azir lor [So] nom”? (Exod 23:20, 21)
8 Labib apel Zezi “Laparol” parski Zeova ti servi li pou dir bann anz ek bann dimounn seki zot ti bizin kone ek pou donn zot bann instriksion. (Zan 1:1-3) Kan bann Izraelit ti dan dezer, Zezi kitfwa ti sa anz ki Zeova ti avoye pou pran zot swin la. Ek kan Zeova ti dir bann Izraelit obeir sa anz-la, Li ti dir zot: “Parski li pe azir lor mo nom.”a (Lir Exod 23:20, 21.) Zeova ti dir zot sa, parski Zezi ti pe koz lor So nom, ek ki Zezi li personaz prinsipal ki sanktifie nom Zeova ek ki montre ki tou seki Zeova fer, li drwat.
“PAPA, GLORIFIE TO NOM”
9. Ki kantite nom Zeova ti inportan pou Zezi? Explike.
9 Kouma nou’nn trouve, avan mem ki Zezi vinn lor later, nom Zeova ti bien inportan pou li. Ek kan li ti lor later, Zezi ti montre par so bann aksion ek so bann parol, ki kantite nom Zeova ti inportan pou li. Inpe avan so lamor, li ti dir Zeova: “Papa, glorifie to nom.” Lerla, deswit Zeova ti dir li ar enn lavwa bien for depi lesiel: “Mo’nn glorifie li ek mo pou glorifie li ankor.”—Zan 12:28.
10-11. (a) Kouma Zezi ti glorifie nom Zeova? (Get zimaz osi.) (b) Kifer bizin sanktifie nom Zeova ek defann so repitasion?
10 Zezi osi ti glorifie nom so Papa. Kouma li ti fer sa? Li ti fer bann dimounn konn bann zoli kalite ki Zeova ena ek li ti koz lor bann kitsoz extraordiner ki Zeova inn fer. Me li ti osi fer enn lot kitsoz ankor pou glorifie nom Zeova. Zezi ti bizin sanktifie nom so Papa, setadir montre ki nom Zeova li sin. Li ti bizin osi defann repitasion so Papa, setadir montre ki tou seki Zeova inn fer li drwat. Zezi ti montre ki sa bann kitsoz-la ti bien inportan pou li. Li ti fer sa kan li ti montre so bann disip kouma pou priye. Li ti dir: “Nou Papa ki dan lesiel, ki to nom sanktifie.”—Mat. 6:9.
11 Kifer bizin sanktifie nom Zeova ek defann so repitasion? Parski dan zardin Eden, Satan ti dir bann foste lor Zeova. Satan ti pretann ki Zeova Li enn manter ek ki Li ti anpes Adan ek Ev gagn bann bon kitsoz. (Zen. 3:1-5) Kan li ti fer sa, Satan ti pe rod dir ki Zeova enn move Dirizan. Sa bann fos lakizasion-la ti gat repitasion Zeova ek ti sali so nom. Apre sa, dan lepok Zob, Satan ti pretann ki bann dimounn servi Zeova par lintere. Li ti mem dir ki bann dimounn pa vremem kontan Zeova ek ki zot pou aret servi Li si zot gagn bann difikilte. (Zob 1:9-11; 2:4) Akoz sa, ti bizin ki inpe letan pase pou montre kisann-la ki vremem enn manter, Zeova ouswa Satan.
Zezi ti montre so bann disip ki li bien inportan ki zot sanktifie nom Bondie (Get paragraf 10)
“MO DONN MO LAVI”
12. Ki kitsoz Zezi ti aksepte fer parski li kontan nom Zeova?
12 Zezi kontan Zeova, akoz sa li ti anvi fer tou seki li kapav pou sanktifie nom Zeova ek pou defann so repitasion. Zezi ti mem pre pou donn so lavi pou sa!b (Zan 10:17, 18) De premie dimounn ki ti parfe lor later, ti vir zot ledo ar Zeova ek zot ti swiv Satan. Parkont, Zezi li, li ti aksepte vinn lor later pou montre ki li kontan Zeova, ek li ti montre sa kan li ti obeir Zeova par so bann parol ek so bann aksion. (Ebre 4:15; 5:7-10) Ziska so lamor lor enn poto, Zezi ti res fidel ar Zeova. (Ebre 12:2) Se koumsa ki li’nn montre ki li kontan Zeova ek ki li kontan So nom.
13. Kifer Zezi, plis ki ninport kisann-la, ti kapav montre ki Satan enn manter? (Get zimaz osi.)
13 Kan li ti lor later, Zezi ti montre par so bann parol ek so bann aksion ki se Satan ki enn manter, pa Zeova. (Zan 8:44) Zezi konn Zeova pli bien ki ninport kisann-la. Alor, si enn parmi bann lakizasion ki Satan ti fer lor Zeova ti vre, Zezi ti pou kone. Me Zezi ti bien deside pou defann repitasion so Papa. Mem kan Zeova ti tir so proteksion lor li, Zezi ti aksepte mor ek res fidel anver Zeova, olie ki li dezobeir Li.—Mat. 27:46.c
Zezi inn montre par so bann parol ek so bann aksion ki se Satan ki enn manter, pa Zeova (Get paragraf 13)
“MO’NN FINI TRAVAY KI TO’NN DONN MWA”
14. Kouma Zeova ti rekonpans Zezi parski li ti res fidel anver Li?
14 Dan lapriyer ki li ti fer avan so lamor, Zezi ti dir: “Mo’nn fini travay ki to’nn donn mwa pou fer.” Zezi ti sir ki Zeova ti pou rekonpans li parski li ti res fidel anver Li. (Zan 17:4, 5) Ek Zezi ti ena rezon pou ena konfians dan Zeova, parski kan li ti mor, Zeova pa ti les li pouri dan tom. Li ti resisit li ek Li ti donn li enn pli gran pozision dan lesiel. (Zist. 2:23, 24; Fil. 2:8, 9) Avek letan, Zezi inn vinn lerwa ek li’nn koumans regne dan Rwayom Bondie. Ki sa Rwayom-la ti pou fer? Kan Zezi ti montre so bann disip kouma pou priye, dan deziem parti sa lapriyer-la li ti dir zot: “Ki to Rwayom vini. Ki to [Zeova] volonte fer lor later parey kouma dan lesiel.”—Mat. 6:10.
15. Ki kitsoz ankor Zezi pou akonpli?
15 Biento, Zezi pou al fer lager kont bann lennmi Bondie ek li pou detrir zot pandan lager Armagedon. (Rev. 16:14, 16; 19:11-16) Apre sa, li pou zet Satan dan “trou san fon,” kot li pou konfine ek kot li pa pou kapav fer nanye. (Rev. 20:1-3) Lerla, pandan Regn Mil An, Zezi pou met lape lor later ek pou fer bann dimounn vinn parfe. Li pou osi resisit bann mor ek li pou fer later vinn enn paradi. Lerla, proze Zeova pou akonpli!—Rev. 21:1-4.
16. Kouma lavi pou ete alafin Regn Mil An Zezi Kris?
16 Kouma lavi pou ete alafin Regn Mil An Zezi Kris? Tou dimounn pou parfe. Bann dimounn pou nepli bizin demann pardon pou zot pese ek zot pou nepli bizin laranson. Zot nepli pou bizin bann 144,000 pou azir kouma bann pret pou zot, ek zot nepli pou bizin Zezi kouma zot Gran Pret pou ki zot kapav vinn kamarad ar Zeova. Ek “dernie lennmi, lamor [ki nou’nn erite ar Adan], pou detrir net.” Bann tom pou vid parski bann ki’nn mor pou’nn fini resisite. Wi, tou dimounn lor later pou parfe.—1 Kor. 15:25, 26.
17-18. (a) Ki pou arive alafin Regn Mil An Zezi Kris? (b) Ki Zezi pou fer kan li pou fini regne? (1 Korintien 15:24, 28) (Get zimaz osi.)
17 Ki pou arive ankor alafin Regn Mil An Zezi Kris? Personn pou nepli ena okenn dout ki Zeova Li sin ek ki tou seki Li fer, li drwat. Kifer? Dan zardin Eden, Satan ti pretann ki Zeova enn manter ek ki Li enn Dirizan ki pena lamour. Me depi sa lepok-la, bann serviter Zeova plizir fwa inn sanktifie so nom ek inn defann so repitasion. Alor, alafin Regn Mil An, zot tou pou kone ki tou seki Satan inn dir lor Zeova li fos. Personn pa pou ena okenn dout ki Zeova Li enn Papa ki ena boukou lamour.
18 Apre Regn Mil An Zezi Kris, tou kreatir dan lesiel ek lor later, pou kone ki tou seki Satan ti dir lor Zeova ti fos. Me ki Zezi pou fer kan li pou fini regne? Eski li pou swiv lexanp Satan ek rebel kont Zeova? Non! (Lir 1 Korintien 15:24, 28.) “Li pou remet Rwayom dan lame” Zeova, savedir ki li pou soumet ar so Papa. Wi, Zezi pou aksepte retourn tou lotorite ki so Papa inn donn li. Li pou fer sa parski li kontan Zeova.
Alafin Regn Mil An, Zezi “pou remet Rwayom dan lame” Zeova (Get paragraf 18)
19. Kouma nou kone ki nom Zeova bien inportan pou Zezi?
19 Alor, kifer Zeova inn donn Zezi So nom? Se parski Zezi inn reprezant Li dan enn fason parfe. Nom Zeova bien inportan pou Zezi. Kan li ti lor later, li ti aksepte mor pou sa nom-la. Ek alafin Regn Mil An, li pou aksepte retourn tou lotorite ki so Papa inn donn li. Me kouma nou kapav swiv lexanp Zezi? Nou pou reponn sa kestion-la dan prosin lartik.
KANTIK 16 Loue Jah pou Garson Ki Li’nn Swazire
a Parfwa, bann lezot anz osi ti reprezant Zeova kan zot ti anons bann mesaz lor so nom. Se pou sa rezon-la ki parfwa Labib dir ki Zeova pe koze, alor ki an realite se enn anz ki pe koz dan So plas. (Zen. 18:1-33) Mem si Labib dir ki Moiz ti gagn Lalwa ar Zeova, bann lezot verse montre ki Zeova ti servi bann anz pou donn Moiz sa Lalwa-la. Sa bann anz-la ti pe koz lor nom Zeova.—Lev. 27:34; Zist. 7:38, 53; Gal. 3:19; Ebre 2:2-4.
b Lamor Zezi inn osi donn bann dimounn posibilite pou viv pou touletan.
c Get “Kestion Bann Lekter” dan Latour Degard Avril 2021, p. 30-31.