LARTIK LETID 11
KANTIK 57 Pres ar Tou Sort Kalite Dimounn
Ena enn Gran Dezir pou Prese Parey Kouma Zezi
“Lesegner . . . ti avoy zot de par de avan li dan tou bann lavil ek landrwa kot limem li ti pou ale.”—LIK 10:1.
PWIN PRINSIPAL
Dan sa lartik-la, nou pou gete kouma nou kapav ena enn gran dezir pou prese parey kouma Zezi, ek nou pou get kat kitsoz ki kapav ed nou pou fer sa.
1. Kifer bann serviter Zeova bien diferan ar bann lezot dimounn ki dir ki zot Kretien?
BANN serviter Zeova ena enn gran dezir pou pres bon nouvel ek zot fer boukou zefor pou fer sa. Akoz sa, zot bien diferan ar bann lezot dimounn ki dir ki zot Kretien. (Tit 2:14) Me parfwa, li kapav arive ki nou mank motivasion pou prese. Enn ansien ki travay dir dan so lasanble, ti dir: “Parfwa, mo pa anvi prese.” Kitfwa twa osi to ena mem santiman ki sa ansien-la!
2. Kifer parfwa nou kapav trouv sa difisil pou prese?
2 Kitfwa nou plis kontan bann lezot form servis olie ki nou pres bon nouvel. Kifer nou dir sa? Parski kan par exanp, nou partisip dan bann konstriksion ek mintenans bann Lasal Renion, kan nou ed bann frer ek ser ki pe soufer akoz enn katastrof natirel, ouswa kan nou pran letan pou ankouraz lezot, nou trouv pli vit bon lefe ki sa ena lor zot, ek sa donn nou boukou lazwa. Anplis, kan nou travay ansam ar nou bann frer ek ser, nou resanti lape ek lamour, ek nou kone ki zot bien rekonesan pou seki nou fer pou zot. Parkont, si sa fer plizir lane ki nou pe pres dan mem teritwar, kitfwa bann dimounn dan sa teritwar-la pa ekout nou ouswa zot pa kontan nou mesaz. Nou kone osi ki plis lafin pe koste, plis bann dimounn pou opoz zot ar nou mesaz. (Mat. 10:22) Me ki kitsoz kapav ed nou pou res bien aktif dan predikasion ek pou kontign ogmant nou dezir pou prese?
3. Dan lexanp ki trouv dan Lik 13:6-9, ki nou aprann lor Zezi?
3 Zezi ti bien kontan prese, ek nou kapav aprann boukou ar so lexanp. Kan li ti lor later, li ti fer boukou zefor pou pres ar maximum dimounn. Plis letan ti pase, plis li ti ogmant so laktivite predikasion. (Lir Lik 13:6-9.) Dan enn lexanp, Zezi ti konpar so laktivite ar enn planter rezin ki ti travay dir pandan trwa-z-an pou okip enn pie fig ki pa ti pe raport okenn frwi. Dan mem fason, pandan trwa-z-an, Zezi ti pres avek bann Zwif, me laplipar parmi zot pa ti vinn so bann disip. Selman, parey kouma sa planter rezin ki pa ti abandonn so pie fig la, Zezi pa ti bes lebra ek li pa ti diminie so laktivite kan bann dimounn pa ti ekout li. Okontrer, li ti fer plis zefor ankor pou tous zot leker.
4. Sit kat kitsoz ki nou pou aprann ar lexanp Zezi.
4 Dan sa lartik-la, nou pou trouve kouma Zezi ti bien aktif dan predikasion, sirtou pandan dernie sis mwa ki li ti lor later. (Get « Après cela » not pou letid pou Lik 10:1, an Franse.) Azordi, nou osi nou kapav res bien aktif dan predikasion kan nou swiv seki Zezi ti ansegne ek kan nou imit li. Aster-la, anou get kat kitsoz ki nou kapav aprann ar Zezi: (1) Li ti fer seki Zeova anvi li fer, (2) li ti konpran bann profesi Labib ek li ti azir an-akor avek zot, (3) li ti sir ki Zeova ti pou soutenir li, ek (4) li ti gard lespwar ki sertin dimounn ti pou ekout li.
LI TI FER SEKI ZEOVA ANVI LI FER
5. Kouma Zezi ti montre ki li ti fer seki Zeova anvi li fer?
5 Zezi ti fer so maximum pou pres “bon nouvel lor Rwayom” parski li ti kone ki Bondie ti anvi ki li fer sa travay-la. (Lik 4:43) Pres bon nouvel ti kitsoz pli inportan dan so lavi. Pandan bann dernie mwa ki li ti lor later, li ti mem al “dan enn lavil apre lot ek dan enn vilaz apre lot” pou ansegn bann dimounn. (Lik 13:22) Li ti osi form bann lezot disip pou pres ansam avek li.—Lik 10:1.
6. Ki lien ena ant predikasion ek bann lezot travay ki lorganizasion Zeova fer? (Get zimaz osi.)
6 Azordi osi, pres bon nouvel se travay pli inportan ki Zeova ek Zezi anvi nou fer. (Mat. 24:14; 28:19, 20) Avredir, tou bann travay ki lorganizasion Zeova fer, ena enn lien ar predikasion. Par exanp, nou konstrir bann Lasal Renion pou ki bann dimounn avek ki nou’nn prese vinn ador Zeova. Travay ki fer dan bann Betel osi soutenir travay predikasion dan bann teritwar. Kan ena bann katastrof, nou pa zis donn nou bann frer ek ser seki zot bizin, me nou osi ed zot pou repran zot bann laktivite spiritiel, kouma par exanp predikasion. Kan nou rapel ki predikasion se travay pli inportan ki Zeova anvi nou fer, nou pou ena enn gran dezir pou prese regilierman. János, enn ansien dan Ongri, dir: “Mo fer zefor pou rapel ki ninport ki travay ki nou fer dan lorganizasion, sa pa ranplas predikasion, parski predikasion se travay pli inportan ki nou ena pou fer.”
Azordi, predikasion bon nouvel se travay pli inportan ki Zeova ek Zezi anvi nou fer (Get paragraf 6)
7. Kifer Zeova anvi ki nou kontign prese? (1 Timote 2:3, 4)
7 Kan nou fer zefor pou trouv bann dimounn parey kouma Zeova trouv zot, sa ogmant nou dezir pou prese. Zeova anvi ki maximum dimounn tann bon nouvel ek aprann laverite lor Li. (Lir 1 Timote 2:3, 4.) Akoz sa, Li form nou pou ki nou kapav partaz sa bon nouvel-la, parski sa kapav sap lavi bann dimounn. Par exanp, brosir Lamour Motiv Nou—Pou Fer Bann Disip montre nou kouma nou kapav koumans bann konversasion ar bann dimounn pou ki zot etidie Labib ek vinn bann disip Zezi. Mem si bann dimounn pa aksepte nou mesaz deswit, kitfwa zot pou gagn lokazion pou fer li avan lafin gran soufrans. Dan lavenir, kitfwa zot pou rapel seki nou ti dir zot ek kitfwa sa pou fer zot anvi servi Zeova. Selman, pou ki sa arive, fode ki nou kontign prese.
LI TI KONPRAN BANN PROFESI LABIB EK LI TI AZIR AN-AKOR AVEK ZOT
8. Parski li ti konn bien bann profesi Labib, kouma sa inn ed Zezi pou servi bien so letan?
8 Zezi ti konpran kouma bann profesi Labib ti pou realize. Li ti kone ki li ti pou prese pandan zis trwa-z-an edmi. (Dan. 9:26, 27) Gras-a bann profesi, li ti osi kone kan ek kouma li ti pou mor. (Lik 18:31-34) Ek parski li ti kone seki ti predir lor li, Zezi ti servi so letan dan meyer fason posib. Se pou sa rezon-la ki li ti fer so maximum pou prese, pou ki li kapav terminn travay ki li ti ena pou fer.
9. Kan nou konpran bann profesi Labib, kouma sa ed nou pou kontign ena enn gran dezir pou prese?
9 Kan nou reflesi lor bann profesi Labib ki pe realize dan nou lepok ek bann profesi ki pou realize dan lavenir, sa kapav ed nou pou kontign ena enn gran dezir pou prese. Gras-a bann profesi, nou kone ki lafin bien pre. Labib ti predir kouma bann dimounn ti pou ete ek seki ti pou arive dan bann dernie zour. Nou pe trouv sa bann profesi-la realize azordi. Labib ti osi predir ki lerwa disid ek lerwa dinor ti pou lager kont zot kamarad “dan lepok lafin.” Nou konpran ki sa profesi-la pe realize kan nou trouve kouma Pwisans Mondial Anglo-Ameriken ek Larisi ek so bann alie, pe opoz zot ar zot kamarad. (Dan. 11:40) Nou konpran osi ki lipie sa stati ki mansione dan Daniel 2:43-45 la, reprezant Pwisans Mondial Anglo-Ameriken. Kan nou etidie bann profesi Labib, nou konpran ki biento Rwayom Bondie pou detrir tou bann gouvernman ki ena lor later. Tou sa bann profesi-la montre ki nou pe viv lepok lafin. Alor, nou bizin servi bien nou letan ek fer nou maximum pou pres bon nouvel.
10. Kouma bann profesi Labib kapav ankouraz twa pou kontign prese?
10 Gras-a bann profesi Labib, nou ena enn zoli mesaz ki nou anvi partaz ar lezot. Carrie, enn ser ki res Repiblik Dominikenn, dir: “Kan mo pans lor bann zoli promes ki Zeova inn fer, sa motiv mwa pou partaz sa avek lezot.” Li dir osi: “Kan mo trouve kouma bann dimounn dan problem azordi, mo rann mwa kont ki sa bann promes-la, li pa zis pou mwa, me li pou zot osi.” Bann profesi Labib ankouraz nou pou kontign prese parski nou kone ki Zeova pe ed nou pou kontign fer sa travay-la. Leila, ki res Ongri, dir: “Izai 11:6-9 montre nou ki Zeova kapav ed ninport kisann-la pou sanze. Alor, sa motiv mwa pou partaz bon nouvel ar bann dimounn ki mo panse pa pou ekout mwa.” Christopher, enn frer ki res Zanbi, dir: “Parey kouma ti predir dan Mark 13:10, nou trouv bon nouvel pe prese partou lor later, ek pou mwa, se enn gran privilez pou partisip dan realizasion sa profesi-la.” Ki bann profesi Labib ki ankouraz twa pou kontign prese?
LI TI SIR KI ZEOVA TI POU SOUTENIR LI
11. Kifer Zezi ti sir ki Zeova ti pou ed li pou kontign ena enn gran dezir pou prese? (Lik 12:49, 53)
11 Zezi ti sir ki Zeova ti pou ed li pou kontign ena enn gran dezir pou prese. Mem si li ti pe koz avek respe kan li ti pe prese, Zezi ti kone ki bon nouvel lor Rwayom Bondie ti pou fer sertin dimounn ankoler, ek ki boukou ti pou opoz zot ar sa mesaz-la. (Lir Lik 12:49, 53.) Bann sef relizie pa ti kontan mesaz ki Zezi ti pe prese. Akoz sa, plizir fwa zot ti esey touy li. (Zan 8:59; 10:31, 39) Selman, Zezi ti kontign prese parski li ti kone ki Zeova ti pe soutenir li. Li ti dir: “Mo pa tousel, me mo Papa ki’nn avoy mwa li avek mwa. . . . Li pa’nn abandonn mwa, parski mo touletan fer bann kitsoz ki fer li plezir.”—Zan 8:16, 29.
12. Kouma Zezi ti prepar so bann disip pou kontign prese mem si zot ti pou gagn persekision?
12 Zezi ti rapel so bann disip ki Zeova ti pou soutenir zot. Plizir fwa, li ti rasir zot ki Zeova ti pou ed zot, mem kan zot ti pou gagn persekision. (Mat. 10:18-20; Lik 12:11, 12) Zezi ti ankouraz so bann disip pou “res lor zot gard,” parski li ti kone ki boukou ti pou opoz zot ar bon nouvel. (Mat. 10:16; Lik 10:3) Li ti dir zot ki si bann dimounn pa anvi ekout zot, pa fors zot. (Lik 10:10, 11) Li ti dir zot osi ki, kan zot ti pou gagn persekision, zot ti pou bizin sove ale. (Mat. 10:23) Mem si Zezi ti bien devwe dan predikasion ek ki li ti sir ki Zeova ti pou ed li, li ti evit bann sitiasion ki danzere kan li ti kapav.—Zan 11:53, 54.
13. Kifer to kapav sir ki Zeova pou soutenir twa?
13 Azordi, boukou dimounn opoz zot ar mesaz ki nou prese. Se akoz sa ki nou bizin led Zeova pou kontign pres bon nouvel ar bann dimounn. (Rev. 12:17) Kifer to kapav sir ki Zeova pou soutenir twa? Anou get lapriyer ki Zezi ti fer dan Zan sapit 17. Dan sa lapriyer-la, Zezi ti demann Zeova pou vey lor so bann zapot, ek Zeova ti reponn so lapriyer. Kouma nou konn sa? Dan liv Zistwar Bann Zapot, nou trouve kouma Li’nn ed bann zapot Zezi pou kontign prese malgre bann persekision. Dan so lapriyer, Zezi ti osi demann Zeova pou vey lor tou bann ki ti pou ena lafwa dan seki so bann zapot ti pou ansegne, ek twa osi to form parti ladan. Zeova pe kontign reponn sa lapriyer ki Zezi ti fer la; Li pou ed twa parey kouma Li ti ed bann zapot Zezi.—Zan 17:11, 15, 20.
14. Kouma nou kone ki nou kapav res aktif dan predikasion mem dan bann moman difisil? (Get zimaz osi.)
14 Plis lafin pe koste, plis nou pou gagn difikilte pou pres bon nouvel. Selman, Zezi inn rasir nou ki nou pou kontign gagn led ki nou bizin pou res aktif dan predikasion. (Lik 21:12-15) Parey kouma Zezi ek so bann disip, nou pa fors bann dimounn pou ekout nou, ek nou pa rant dan bann diskision initil avek zot. Mem dan bann pei kot nou laktivite interdi, bann frer ek ser inn reisi pres bon nouvel parski zot inn kont lor Zeova, pa lor zot prop lafors. Dan premie siek, Zeova ti donn so bann serviter lafors, ek azordi osi Li donn nou lafors pou ki nou “kapav akonpli predikasion afon,” dan fason ki Li Li anvi. (2 Tim. 4:17) To kapav sir ki, si to kont lor Zeova, to pou ena enn gran dezir pou prese.
Mem kan nou laktivite interdi, bann proklamater fer bien atansion ek zot trouv bann fason pou pres bon nouvel (Get paragraf 14)a
LI TI GARD LESPWAR KI SERTIN DIMOUNN TI POU EKOUT LI
15. Ki kitsoz montre ki Zezi ti sir ki ti pou ena bann dimounn ki ti pou aksepte bon nouvel?
15 Zezi ti sir ki ti pou ena bann dimounn ki ti pou ekout mesaz bon nouvel. Sa ti ed li pou res pozitif ek pou kontign prese. Par exanp, ver lafin lane 30 Nou Lepok, li ti trouve ki boukou dimounn ti anvi ekout mesaz bon nouvel, ek li ti konpar zot ar enn karo ki’nn pare pou rekolt. (Zan 4:35) Apepre enn an apre, li ti dir so bann disip: “Rekolt-la gran.” (Mat. 9:37, 38) Ek enn lot fwa ankor, li ti dir: “Rekolt-la gran . . . Sipliy Proprieter karo pou avoy bann travayer pou ramas rekolt.” (Lik 10:2) Zezi ti sir ki ti pou ena bann dimounn ki ti pou aksepte bon nouvel, ek kan zot ti fer sa, sa ti rann li zwaye.—Lik 10:21.
16. Kouma bann lexanp ki Zezi ti servi kapav ed nou pou res pozitif kan nou prese? (Lik 13:18-21) (Get zimaz osi.)
16 Zezi ti ed so bann disip pou kontign ena enn gran dezir pou prese, kan li ti rapel zot ki zot ti pou gagn bann bon rezilta. Li ti servi de lexanp pou ansegn zot sa. (Lir Lik 13:18-21.) Dan premie lexanp-la, Zezi ti konpar mesaz lor Rwayom Bondie ar enn ti lagrin moutard ki ti pou grandi ek vinn enn gran pie. Savedir ki boukou dimounn ti pou aksepte bon nouvel ek ki nanye pa ti pou kapav anpes sa arive. Ek dan deziem lexanp ki li ti servi, li ti konpar mesaz Rwayom Bondie ar levin. Li ti servi sa lexanp-la pou montre ki mesaz lor Rwayom Bondie ti pou prese dan boukou landrwa lor later, ek ki gras-a sa, boukou dimounn ti pou fer bann sanzman mem si lezot pa ti pou trouv sa bann sanzman-la deswit. Par sa bann lexanp-la, Zezi ti anvi ki so bann disip konpran ki mesaz ki zot ti pe prese ti pou ed boukou dimounn.
Parey kouma Zezi, nou sir ki sertin dimounn pou aksepte nou mesaz (Get paragraf 16)
17. Kan sa konsern nou predikasion, ki bann rezon nou ena pou res pozitif?
17 Kan nou reflesi kouma travay predikasion pe ed boukou dimounn dan lemond antie, sa ankouraz nou pou kontign prese. Par exanp, toule lane, bann milyon dimounn asiste Komemorasion Lamor Zezi ek etidie Labib avek nou. Ena osi bann milye dimounn ki pran batem ek ki koumans prese ansam avek nou. Avredir, nou pa kone komie dimounn ankor pou aksepte nou mesaz, me nou kone ki Zeova pe rasanble enn gran lafoul ki biento pou “travers gran soufrans.” (Rev. 7:9, 14) Zeova, Limem “Proprieter karo,” ek Li sir ki boukou dimounn pou kontign aksepte bon nouvel. Se akoz sa ki nou bizin kontign prese.
18. Kan bann dimounn get nou, ki kitsoz nou anvi zot trouve?
18 Bann vre disip Zezi finn touletan montre enn gran dezir pou pres bon nouvel. Kan bann dimounn ti trouv bann zapot prese ar kouraz ek avek tou zot leker, boukou dimounn “ti konpran ki sa [bann-la] ti avek Zezi.” (Zist. 4:13) Nou osi, nou anvi pres bon nouvel ar kouraz ek avek tou nou leker. Koumsa, bann dimounn pou trouve ki nou ena enn gran dezir pou prese parey kouma Zezi.
KANTIK 58 Rod Bann Dimounn Ki Kontan Lape
a DESKRIPSION ZIMAZ: Lor filing, enn frer pe pres avek enn misie san ki lezot remarke.