“Zot bizin pré pou faire tou seki bon”
1 Avant ki Jésus ti commence enn nouveau campagne predication, li ti prend le temps pou prepare so bann disciple. (Mat. 10:5-14) Mem si nou tou nou occupé, si nou prend zis deux-trois minute pou prepare-nou avant nou al preché porte-en-porte, sa pou aide nou pou gagne bann bon resultat.—2 Cor. 9:6.
2 Couma pou preparé: Enn bon preparation vedir d’abord ki nou konn bien publication ki nou pense pou presenté. Nou bizin pense aussi bann dimoune dan nou territoire. Ki bann sujet ki tracasse zot? Ki croyance religieux bann dimoune dan sa l’endroit-la ena? Nou kapav guette bann modele presentation ki ena dan Ministère du Royaume ek dan livre Comment raisonner à partir des Écritures pou gagne bann l’idée.
3 Seki pou aide nou encore, c’est kan nou suive bien bann demonstration ki faire dan reunion service. A mesure ki nou konn bien servi nou presentation, nou pou bizin moins le temps pou preparé. Selman, si chaque fois avant nou al predication nou reflechi lor seki nou pou dire ek nou contigne ameliore nou presentation, nou pou pli efficace. Nou bizin aussi prend le temps pou verifié ki dan nou sac predication ena tou bann publication ki nou pou bizin.
4 Ki pou aide nou rappel nou presentation? Kan nou pratik nou presentation fort, c’est enn fason ki pou aide nou pou rappel bien seki nou envie dire. Certain content pratik zot presentation pendant zot l’etude familial. Lezot trouvé ki sa aide zot beaucoup kan zot ecrire enn ti resumé seki zot pou dire lor enn ti boute papier ek zot jette enn ti coup d’oeil lor la zis avant ki zot arrive devant la porte.
5 Bann bienfait: Kan nou prepare-nou bien, sa faire nou vinn pli efficace ek augmente nou la joie dan ministere. Nou pli relax ek nou moins stressé kan nou devant enn la porte. Nou kapav donne enn pli grand l’attention dimoune-la au lieu ki nou tracasse-nou lor seki nou pou dire. En plus, kan nou konn bien seki ena dan bann publication, sa pou aide nou pou ena plus l’enthousiasme kan nou pou presente zot.
6 La Bible donne nou sa l’encouragement-la: “Zot bizin pré pou faire tou seki bon.” (Tite 3:1) Ki travail ki pli bon ki preche la bonne nouvelle? Kan nou prepare-nou bien, nou montré respé pou sa dimoune ki’nn accepté pou ecoute nou-la, ek pou Jéhovah, Bondié ki nou representé.—Is. 43:10.