“Prend mo joug lor zot”
1 Dan enn le monde ki rempli ar pression ek tracas, nou finn konn enn vrai soulagement kan nou finn accepté l’invitation bien touchant ki Jésus inn faire pou trouve reconfort enba so joug. (Mat. 11:29, 30) Accepté joug Jésus, setadir ki nou vinn so bann disciple, implik ki nou participe dan enn travail ki pa toujours facile mais ki faire nou gagne reconfort aussi. Sa implik ki nou preche la bonne nouvelle lor Royaume Bondié ek aide lezot pou trouve reconfort ensam avek nou enba joug Jésus, enn joug ki doux.—Mat. 24:14; 28:19, 20.
2 Nou ministere faire nou gagne reconfort: Jésus pa ti demann so bann disciple ajoute so fardeau ar seki zot ti deja pé sarié. Li ti invite zot pou change zot charge ki ti bien lourd ar seki pou li, ki ti leger. Nou nepli crasé avek bann tracas ek desespoir ki ena dan sa le monde-la; ni nou rinté pou gagne bann richesse ki pa garanti nanyin. (Luc 21:34; 1 Tim. 6:17) Mem si nou occupé ek nou bizin travail pou gagne seki nou bizin toulé-jour, nou l’adoration pou Bondié passe en premier dan nou la vie. (Mat. 6:33) Si nou garde enn bon l’attitude lor seki pli important, nou pou touletan trouve predication couma enn kitsoz ki reconforte nou, pa couma enn fardeau.—Phil. 1:10.
3 Li normal ki nou content koz lor bann kitsoz ki bien ena valeur pou nou. (Luc 6:45) Pou tou bann chretien, Jéhovah ek bann benediction ki Li’nn promette so Royaume pou amené, ena beaucoup valeur pou zot. Alors, sa faire nou di-bien kan nou koz lor “bann bon nouvelle lor bann bon kitsoz” ek nou laisse tou bann tracas ki nou gagné dan nou la vie toulé-jour de coté kan dan predication. (Rom. 10:15) Bien sur, plus nou faire enn kitsoz, plus nou vinn pli efficace pou faire li ek nou gagne plus la joie. Alors, plus nou passe le temps dan predication, si nou kapav, nou pou gagne encore plus reconfort. Ek nou gagne vrai-mem enn grand l’encouragement kan bann dimoune accepté nou message! (Actes 15:3) Mem kan nou joinde bann dimoune ki pa interessé ou-soit ki opposé, nou predication pou encourage nou lor plan spirituel si nou pa blié ki nou bann zeffort faire Jéhovah plaisir ek ki n’importe ki bon resultat nou kapav gagné, c’est grace a so benediction.—Actes 5:41; 1 Cor. 3:9.
4 Kan nou accepté l’invitation Jésus, nou ena privilege pou servi cote a cote avek li couma bann Témoins de Jéhovah. (Is. 43:10; Rév. 1:5) Pena nanyin ki kapav faire nou gagne plus reconfort ki sa!