“Montré ki zot ena reconnaissance”
1 Kan Jésus ti gueri dix lepreux, zis enn sel parmi zot ki ti retourné pou remercié li. Jésus ti demann li: “Toulé-dix inn vinn pur, pa vrai? Alors, kot neuf lezot-la été?” (Luc 17:11-19) Li vrai-mem important ki nou montré ki nou reconnaissant pou chaque joli don ek cadeau parfait ki nou gagné avek nou Papa ki dan le ciel, Jéhovah, ki content nou ek ki genereux!—Col. 3:15; Jacq. 1:17.
2 Pou ki kitsoz nou bizin ena reconnaissance? Nou reconnaissant pou la ranson ki pli grand cadeau ki Bondié inn faire l’humanité. (Jean 3:16) Nou reconnaissant aussi ki Jéhovah finn attire nou vers Li. (Jean 6:44) L’unité ki ena parmi tou bann chretien, li enn lot raison kifer nou ena reconnaissance. (Ps. 133:1-3) Surement ou kapav pense encore lezot don ki Jéhovah finn donne nou. Jamais nou pa pou envie vinn ingrat couma sa bann Israélite ki ti blié tou seki Jéhovah ti faire pou zot-la!—Ps. 106:12, 13.
3 Montré ou reconnaissance: Mem si kitfois toulé-dix lepreux ti ena reconnaissance pou seki Jésus ti faire pou zot, zis enn ki ti montré so reconnaissance. (Luc 17:15) Nou, nou kapav montré nou reconnaissance kan nou participe avek zele dan nou ministere. Si nou vrai-mem reconnaissant pou tou seki nou Papa ki content nou inn faire, nou leker pou pousse nou pou imite so l’amour ek so generosité, kan nou koz Li avek lezot. (Luc 6:45) Ek kan nou koz avek lezot lor bann ‘kitsoz extraordinaire ek bann pensée ki Jéhovah ena envers nou,’ nou l’amour ek nou reconnaissance pou Li pou grandi.—Ps. 40:5.
4 Aide lezot pou montré zot reconnaissance: Nou bizin rod bann l’occasion pou aide nou bann zenfant ek nou bann etudiant pou developpe reconnaissance. Bann parent ena beaucoup l’occasion pou faire sa, par exemple kan zot observe bann kitsoz ki Jéhovah inn crée, ensam avek zot bann zenfant. (Rom. 1:20) Kan nou pé conduire l’etude, nou kapav demann nou etudiant: “Ki sa point-la montré nou lor personnalité Jéhovah?” A mesure ki reconnaissance etudiant-la grandi, so l’amour ek so determination pou faire Jéhovah plaisir aussi pou augmenté.
5 Pendant sa bann dernier jour-la, beaucoup dimoune ingrat ek pena reconnaissance. (2 Tim. 3:1, 2) Surement sa faire Jéhovah vrai-mem plaisir pou trouve so bann serviteur ki devoué manifesté zot reconnaissance kan zot participe dan predication avek zele!—Jacq. 1:22-25.