Asiste Reynion Regilyerman—Se enn Priorite
1 Bann fami Kretyin fer zefor pu asiste tu bann reynion; zot konsider sa kuma enn priorite. Me, eski nu luvraz lakaz, nu travay uswa nu devwar lekol pe kumans pran letan ki nu rezerve normalman pu al ador Jéhovah? Si nu pran kont lopinyon Jéhovah, sa pu ed nu pu respekte nu bann priorite.—1 Sam. 24:6; 26:11.
2 Dan lepase, enn zom Israélite ti inyor volonterman lopinyon Jéhovah; li ti al ramas dibwa enn zur Sabbat. Petet li ti panse ki li ti pe fer sa pu so fami, uswa so aksyon pa ti usi grav ki sa. Me par fason ki Jéhovah ti ziz sa zom-la, Li ti montre ki sa ti enn kitsoz byin grav. Wi, Jéhovah pa kontan kan nu fer lezot kitsoz dan ler ki nu rezerve normalman pu ador Li.—Nomb. 15:32-36.
3 Nu Bizin Anlev Bann Obstak: Buku gayn difikilte pu asiste tu reynion akoz zot travay. Me, ena finn truv mwayin pu sirmont sa problem-la: zot inn koz avek zot patron, zot inn fer laranzman avek zot koleg travay, zot inn rod enn lot travay pli apropriye, uswa zot inn sinplifye zot lavi. Pa bizin dir, Jéhovah byin apresye kan so bann serviter fer sa bann kalite sakrifis-la, pu ador Li.—Héb. 13:16.
4 Devwar lekol usi kapav vinn enn obstak pu asiste reynion. Me, get seki enn tifi ti dir: “Avan al reynion, mo fer inpe devwar, ek kan mo returne mo kontiyn leres.” Li kapav arive ki aswar, apre reynion, bann zanfan pa reysi konplet tu zot devwar lekol. Dan sa ka-la, sertin paran finn explik bann profeser ki zot fami oblize asiste bann reynion Kretyenn, parski se enn priorite pu zot.
5 Si ena korperasyon ek enn bon organizasyon dan lakaz, sa pu permet la fami ariv reynion aler. (Prov. 20:18) Mem bann ti zanfan kapav aprann pu abiye ek prepar zot par zotmem, afin ki tu dimunn kit lakaz dan enn ler presi. Par zot bon legzanp, bann paran kapav grav dan leker zot zanfan, linportans bann reynion.—Prov. 20:7.
6 Pli ale, bann presyon dan sa lemond-la pe ogmante. Alor, li byin inportan ki nu asiste reynion regilyerman. Wi, anu kontiyn pran kont lopinyon Jéhovah ek fer bann reynion vinn nu priorite.—Héb. 10:24, 25.