Kestyon Ki Suleve

◼ Ki bann prekosyon bizin pran kan nu donn temwaynaz bann dimunn ki dan prizon?

Dan lemond antye ena apepre wit milyon dimunn dan prizon. Parmi ena sertin ki montre enn lintere pu bon nuvel. (1 Tim. 2:4) Sak mwa, enn filyal gayn apepre 1,400 let ar bann prizonye ek bann manb zot fami ki demann bann piblikasyon uswa enn vizit personel. Dan Moris usi nu gayn let bann prizonye ki demann bann piblikasyon ek vizit bann Temwin Zeova. Li vre ki buku prizonye montre enn lintere sinser. Me lexperyans finn montre ki sertin fer sanblan zot interese, ek zot rod servi lepep Bondye dan zot lavantaz personel. Akoz sa, nu tu bizin pran sa bann prekosyon la kan nu donn temwaynaz bann ki dan prizon.

Dan buku ka, bann prizonye gayn temwaynaz par let. Fode pa ki bann ser ekrir bann prizonye zom, mem si se avek lobzektif pu donn enn led spirityel. Se zis bann frer kalifye ki bizin pran sa responsabilite la. Kapav swazir bann ser kalifye pu ekrir bann prizonye fam ki montre enn lintere sinser pu laverite ki ena dan Labib. Fode pa avoy larzan uswa bann kado personel bann prizonye, mem si zot demann nu fer sa.

Kan enn kikenn ki dan prizon montre lintere, bizin donn kongregasyon ki dan landrwa kot sa prizon la truve, so non ek so ladres. Lapliparditan, bann frer ki kalifye dan sa landrwa la zot kone ki pu fer dan diferan sityasyon ki kapav arive.

Bann frer ki deziyne kapav fer bann reynion avek bann prizonye. Kumsa plizir prizonye kapav etidye an mem tan. Me fode pa fer bann levennman spesyal dan prizon kot bann proklamater ek bann prizonye asosye ansam san okenn restriksyon. Anplis, li pa tro bon ki bann proklamater vizit enn prizon ninport kan zot anvi, ek asosye zot avek bann prizonye.

Nu bizin “fer atansyon parey kuma bann serpan, me res inosan kuma bann pizon” kan nu partaz bon nuvel avek bann ki dan prizon.—Mat. 10:16.