Kestyon Ki Suleve

◼ Kifer eski bizin fer atansyon kan donn temwaynaz atraver let?

Donn temwaynaz atraver let li enn metod ki, pandan enn long peryod letan, finn montre ki li efikas pu partaz labonn nuvel. Me bann levennman resan dan lemond finn fer bann dimunn vinn mefyan pu uver let ki zot pa tro kone. Suvan bann dimunn dut bann lanvlop ki zot pa kone kot sorti, uswa ki pena ladres dimunn ki’nn anvway let la, sirtu si finn ekrir ar lamin ek si bann lanvlop la gro. Bann dimunn kapav zet sa kalite let la san ki zot uver li. Kuma eski nu kapav evite ki sa arive?

Si posib, let ek lanvlop tulede bizin tipe alamasinn. Lor lanvlop la bizin ena non dimunn la. Pa zis ekrir: “Dimunn ki res la.” Anplis, tuletan ekrir u ladres par deryer. Si u pa kapav donn u ladres personel, donn u non ek ladres Lasal DiRwayom. Pa ekrir let san ki u donn u non. Prezant umem. U kapav explike ki u pe partisip dan enn travay volonter internasyonal. Mansyone ki u enn Temwin Zeova, si u zize ki sa apropriye. Les dimunn la kone ki u pe ekrir li olye ki u vizit li personelman. Ekrir parey kumadir u pe koz ar li fas-a-fas.

U kapav adapte enn prezantasyon ki sorti dan liv Comment raisonner uswa servi enn prezantasyon ki dan enn Nu Minister DiRwayom resan. Sertin proklamater sinpleman explike ki nu ena enn program gratis pu reponn bann kestyon Labib. Lerla, zot sit tem bann sapit dan enn piblikasyon ki nu servi pu fer letid. Sertin dimunn pa dispoze pu lir enn long let ki enn etranze finn avoye. Alor kitfwa li saz ki u ekrir enn let kurt. Terminn let la avan ki dimunn la kumans fatige ar lir li. Li ti pu bon si u met enn linvitasyon reynion ansam avek let la.

Sertin pwin ki u bizin rapel kan u ekrir enn let: (1) Let la bizin prop, ek an ord. (2) Mem si lanvlop la perdi, dimunn la pu tuzur ena non ek ladres sa kikenn ki finn ekrir let la. (3) Bizin sit klerman ek direkteman lobzektif sa let la dan premye paragraf mem. (4) Kan nu abord enn panse prinsipal, kumans enn nuvo paragraf. (5) Akoz so lobzektif, fode pa let la tro amikal, ni tro ofisyel usi. Dan tu let ki u ekrir, vey lor lortograf, gramer, ponktyasyon, ek byinsir propte. Si u fer sa, u let ek mesaz ki ena ladan pu gard so dinite. Par deryer lanvlop la, tuzur donn enn ladres—li preferab ki u met u prop ladres. Fode zame servi ladres filyal—Get Réponses à vos questions (Kestyon Ki Suleve) dan Nu Minister DiRwayom Novam 1996 an Franse.

Sa bann konsey la pu ed nu pu byin servi bann let pu partaz labonn nuvel avek lezot.