Delivré dan bann piege sa kikenn ki maye zoiseau-la

“[Jéhovah] Li-mem pou delivré toi dan piege sa kikenn ki maye zoiseau-la.”—PSAUME 91:3.

1. Kisannla “sa kikenn ki maye zoiseau-la,” ek kifer li dangereux?

TOU bann vrai chrétien bizin faire face ar enn grand danger. Enn kikenn ki pli intelligent ek pli sournois ki n’importe ki humain, pé rod gagne zot pou devore zot. Dan la Bible en français, Psaume 91:3 appel li “l’oiseleur,” “sa kikenn ki maye zoiseau-la.” Kisannla sa l’ennemi-la? Depuis so numero le 1^er juin 1883, La Tour de Garde inn faire nou koné ki sa l’ennemi-la, c’est Satan le Diable. Sa l’ennemi puissant-la servi tou qualité trik ki li kapav, pou mette bann serviteur Jéhovah dan l’erreur ek faire zot tombe dan so bann piege pareil couma enn kikenn ki maye zoiseau installe bann piege pou maye zot.

2. Kifer la Bible compare Satan ar enn kikenn ki maye zoiseau?

² Dan le passé, bann dimoune ti maye zoiseau pou kapav ecoute zot chanté, pou admire zot bann joli plume, ek aussi pou mange zot ek pou offert zot en sacrifice. Mais dan zot nature-mem bann zoiseau faire bien attention, zot farouche ek li difficile pou trappe zot. Alors dan lepok biblik, enn kikenn ki ti maye zoiseau ti bizin premierement etudié bien bann zoiseau ki li ti envie mayé. Li ti bizin etudié bien zot bann l’habitude ek seki ti faire zot different avek bann lezot zoiseau. Lerla, li ti invente tou qualité trik pou maye zot. Kan la Bible compare Satan ar enn kikenn ki maye zoiseau, sa aide nou pou comprend bann method ki li servi. Satan etudié nou enn par enn. Li observe nou bann l’habitude ek nou personnalité ek li mette bann piege sournois devant nou pou li kapav maye nou vivant. (2 Timothée 2:26) Tombe dan so piege vedir la ruine pou nou lor plan spirituel ek sa pou kapav amenn destruction lor nou. Alors pou nou protege nou, nou bizin bien reconette bann different method ki Satan servi pou maye nou dan so piege.

3, 4. Kan eski bann tactik Satan pareil couma tactik enn lion ek kan eski zot couma tactik enn cobra?

³ Ecrivain sa psaume-la servi bann comparaison bien vivant pou koz lor bann tactik ki Satan servi. Li compare zot ar bann tactik enn jeune lion ou-soit bann tactik enn cobra. (Psaume 91:13) Pareil couma enn lion, parfois Satan attak nou direct en face par moyen persecution ou-soit bann la-loi ki sorti kont bann serviteur Jéhovah. (Psaume 94:20) Sa bann qualité l’attak-la kapav faire certain tombé. Mais pli souvent, sa bann attak direct-la ena enn l’effet contraire ek sa faire peuple Bondié vinn pli soudé. Mais couma eski Satan attaké couma enn cobra?

⁴ Satan le Diable beaucoup pli intelligent ki bann zom. Li servi sa l’intelligence-la pou lance bann l’attak ki nou pa attann ek ki mortel pareil couma enn serpent ki ena poison, attaké a partir enn place kot li pé cachiette. Dan sa fason-la, Satan finn reussi empoisonne l’esprit certain serviteur Bondié. Li’nn reussi faire zot faire so volonté dan place volonté Jéhovah. Sa finn ena bann resultat terrible. Heureusement, nou pa dan l’ignorance concernant bann l’intention Satan. (2 Corinthiens 2:11) Asterla, anou examine quatre parmi bann piege mortel ki “sa kikenn ki maye zoiseau-la” servi.

La crainte pou bann dimoune

5. Kifer “tremblé devant bann zom,” li enn piege ki efficace?

⁵ Satan, “sa kikenn ki maye zoiseau-la,” konn bien sa desir normal ki nou ena pou ki lezot accepté nou-la. Bann chrétien pena leker dur ek zot pa indifferent ar pensée ek sentiment lezot dimoune. Satan konn sa, ek li content pou joué lor la. Par exemple, li servi enn piege efficace pou faire certain serviteur Bondié tombé—li faire zot “tremblé devant bann zom.” (Proverbes 29:25) Parfois a cause la crainte pou dimoune, bann serviteur Bondié suive lezot pou faire bann kitsoz ki Jéhovah condamné ou-soit zot pa faire seki Parole Bondié demandé. Sa montré ki zot finn tombe dan piege “sa kikenn ki maye zoiseau-la.”—Ézékiel 33:8; Jacques 4:17.

6. Cite enn l’exemple ki montré couma enn jeune kapav tombe dan piege “sa kikenn ki maye zoiseau-la.”

⁶ Par exemple, enn jeune kapav cedé a cause bann pression ki so bann camarade lekol mette lor li, ek fume enn cigarette. Kitfois kan sa jeune-la ti sorti kot li sa jour-la, li pa ti ena sa ditou dan so l’esprit. Mais enn tipé plitar li pé faire enn kitsoz ki pa bon pou so la-santé ek aussi enn kitsoz ki Bondié pa content. (2 Corinthiens 7:1) Couma li’nn tenté? Kitfois li’nn commence ena bann mauvais frequentation ek li’nn peur ki bannla pa accepté li. Jeune, pa laisse “sa kikenn ki maye zoiseau-la” tente toi ek faire toi tombe dan so piege! Pou evité ki Satan maye toi vivant, faire attention pou pa cedé mem dan bann ti kitsoz. Prend compte l’avertissement biblik pou evite bann mauvais frequentation.—1 Corinthiens 15:33.

7. Couma eski Satan kapav amenn certain parent pou perdi zot l’equilibre spirituel?

⁷ Bann parent chrétien prend bien serieux responsabilité biblik ki zot ena pou donne zot famille seki zot bizin lor plan materiel. (1 Timothée 5:8) Mais l’objectif Satan, c’est pou faire bann chrétien perdi zot l’equilibre dan sa domaine-la. Kitfois certain ena l’habitude pou mank bann reunion parski zot cedé kan bann patron mette pression lor zot pou faire overtime. Kitfois zot peur pou demann congé pou assisté tou bann session enn l’assemblée district kot zot pou adore Jéhovah ensam avek zot bann frere. Pou protege nou kont sa piege-la, nou bizin “faire Jéhovah confiance.” (Proverbes 3:5, 6) En plus, kan nou pa blié ki nou tou forme partie dan famille Bondié ek ki Li’nn prend l’engagement pou prend nou soin, sa pou aide nou pou garde nou l’equilibre. Parent, eski ou ena la foi ki, si ou faire volonté Jéhovah, Li pou trouve enn maniere pou prend ou ek ou famille soin? Ou-soit eski Satan pou maye ou vivant dan so piege ek faire ou faire seki li envie parski ou ena la crainte pou bann dimoune? Nou encourage ou pou examine sa bann question-la dan la priere.

Materialisme

8. Couma eski Satan servi materialisme pou attire bann dimoune?

⁸ Satan servi materialisme aussi pou gagne nou dan so piege. System commercial sa lé-monde-la souvent propose bann plan ki promette bann dimoune ki zot kapav vinn riche vite sans ki zot faire grand zeffort. Mais sa bann plan-la kapav malhonnete, ek sa kapav mem trompe certain serviteur Bondié. Parfois certain dan congregation kapav dire: “Travail dur. Kan to arrive enn point kot to senti-toi en securité lor plan materiel, lerla to kapav relax ek profite la vie. Lerla to kapav mem faire pionnier.” Certain dan congregation ki tire enn l’avantage materiel ar zot bann frere ek soeur kapav ena sa qualité mauvais raisonnement-la. Mais reflechi bien lor sa raisonnement-la. Eski li pa pareil couma raisonnement sa zom riche ki pa ti ena “okenn bon sens” dan parabole ki Jésus ti donné-la?—Luc 12:16-21.

9. Kifer certain chrétien kapav tombe dan enn piege kan zot envie gagne bann kitsoz materiel?

⁹ Satan dirige sa mauvais system-la dan enn fason ki pousse bann dimoune pou envie gagne kitsoz. Sa desir-la kapav finalement prend tou place dan la vie enn chrétien, touffe la parole ek faire li “pa rapporte okenn fruit.” (Marc 4:19) La Bible encourage nou pou contente-nou ar mangé ek linge. (1 Timothée 6:8) Mais, beaucoup tombe dan piege “sa kikenn ki maye zoiseau-la” parski zot pa applik sa conseil-la ar zot-mem. Eski c’est l’orgueil ki kitfois faire zot pensé ki zot bizin adopté enn certain niveau la vie? Ki nou kapav dire lor nou personnellement? Eski nou desir pou possede bann kitsoz materiel faire nou mette l’interet vrai l’adoration dan deuxieme place? (Haggaï 1:2-8) Malheureusement, kan zot inn passe par bann difficulté economik, certain finn sacrifié zot spiritualité pou kapav garde sa niveau la vie ki zot ti’nn habitué ena-la. Sa qualité l’attitude materialiste-la faire “sa kikenn ki maye zoiseau-la” bien plaisir!

Bann divertissement ki gate nou l’esprit

10. Ki chaque chrétien bizin examiné?

¹⁰ “Sa kikenn ki maye zoiseau-la” servi enn lot tactik. Li envie diminué capacité ki nou tou nou ena pou reconette seki bon ek seki mauvais. Zordi le monde divertissement influencé par mem mentalité ki ti ena dan Sodome ek Gomorrhe. Mem bann reportage ki passé dan l’information lor television ek ki ena dan bann magazine montré beaucoup violence ek faire bann dimoune ena enn pli grand l’interet pou bann plaisir sexuel. Enn bon partie divertissement ki ena dan journal, television, radio ek lor Internet, diminué capacité ki bann dimoune ena pou “faire difference entre seki bon ek seki mauvais.” (Hébreux 5:14) Mais rappel bann parole ki Jéhovah ti dire a travers prophete Isaïe: “Malheur pou bann ki pé dire ki seki bon, li mauvais ek seki mauvais, li bon!” (Isaïe 5:20) Eski “sa kikenn ki maye zoiseau-la” inn influence ou fason pensé dan enn maniere sournois grace a bann divertissement ki gate l’esprit? Li important ki sakenn examine li-mem.—2 Corinthiens 13:5.

11. Ki l’avertissement La Tour de Garde ti donné concernant bann serie ki passé lor television ek ki raconte bann zistoire d’amour?

¹¹ Ena preské 25 an, avek bonté La Tour de Garde ti mette bann vrai adorateur Bondié en garde kont bann serie ki passé lor television ek ki raconte bann zistoire d’amour.a Li ti koz lor l’effet bien sournois ki sa bann serie ki bien populaire-la ena: “Si enn dimoune pé rod l’amour, li kapav servi sa couma enn excuse pou ena enn mauvais conduite. Par exemple, enn jeune fille ki celibataire ek ki enceinte dire enn camarade: ‘Mais mo content Victor. Pa faire nanyin. . . . Ena enn zenfant pou li, sa-mem kitsoz ki pli important pou moi!’ Sa joli ti la-musik bien douce ki pé joué kan li dire sa bann parole-la empeche ou trouvé ki conduite sa jeune-la li immoral. Ou aussi ou content Victor. Ou chagrin sa jeune fille-la aussi. Ou ‘comprend’ li. Enn telespectateur ki plitar ti realisé ki li ti ena enn mauvais raisonnement, ti dire ki ‘li etonnant couma nou kapav trouve bann excuse. Nou koné ki l’immoralité pa bon. . . . Pourtant mo ti rann-moi compte ki dan mo l’esprit mo ti pé prend part bann dimoune ki immoral.’ ”

12. Ki kitsoz montré ki sa l’avertissement kont certain program ki donné dan television-la, li encore appliké zordi?

¹² Depuis ki sa bann lartik-la inn parette dan La Tour de Garde, sa bann qualité film immoral-la inn plus augmenté. Dan beaucoup pays, sa bann film-la passe lor television 24 heure lor 24. Bann missié, bann madame ek mem bann adolescent pé touletan rempli zot l’esprit ek zot leker ar sa qualité divertissement-la. Mais fodé pa nou embete nou-mem par bann fausse raisonnement. Li pa pou bon si nou pensé ki bann divertissement immoral, zot pa pli pire ki seki nou trouvé dan la vie toulé-jour. Eski enn chrétien kapav ena enn bon raison pou choisir pou laisse-li diverti par bann dimoune ki jamais li pa ti pou invité kot li?

13, 14. Ki certain inn dire pou montré couma zot inn tire profit ar bann l’avertissement ki ti donné concernant television?

¹³ Beaucoup finn gagne bann bienfait kan zot inn prend compte sa l’avertissement ki “l’esclave fidel et avisé” finn donné-la. (Matthieu 24:45-47) Apré ki zot inn lire sa conseil biblik ki bien direct-la, certain finn ecrire pou dire couma sa bann lartik-la ti’nn touche zot personnellement.b Enn soeur ti avoué: “Sa ti faire 13 an ki mo ti esclave sa bann serie-la. Mo ti pensé ki parski mo ti assisté bann reunion ek mo ti participe de temps en temps dan predication, nanyin pa ti pou arrive moi. Pourtant mo ti adopté mem l’attitude le monde ki ena dan sa bann film-la; ki si enn mari maltraite so femme ou-soit si femme-la senti ki so mari pa content li, li gagne enn excuse pou faire l’adultere—c’est mari-la ki responsable. Alors kan mo ti ena sentiment ki ‘mo ti ena enn excuse,’ mo ti faire l’adultere ek mo ti faire peché kont Jéhovah ek kont mo conjoint.” Sa madame-la ti exclu. Finalement, li ti reconette so peché, li ti repenti ek li ti reintegré. Bann lartik ki ti donne l’avertissement lor danger ki bann serie lor television kapav ena, ti donne li la force pou refuse diverti-li avek bann kitsoz ki Jéhovah pa content ditou.—Amos 5:14, 15.

¹⁴ Sa bann lartik-la ti transforme la vie enn lot lecteur. Li ti dire: “Mo ti ploré kan mo ti lire sa bann lartik-la, parski mo ti rann-moi compte ki mo leker ti nepli complet envers Jéhovah. Mo ti promette mo Bondié ki mo pou nepli esclave sa bann serie-la.” Apré ki li ti exprime so reconnaissance pou sa bann lartik-la, enn soeur ti reconette ki li aussi, li ti esclave sa bann film-la ek li ti ecrire: “Mo ti demann-moi . . . si sa ti kapav affecté mo relation avek Jéhovah. Couma mo ti kapav ‘camarade avek sa qualité dimoune-la’ ek en mem temps camarade avek Jéhovah?” Si ena 25 an, sa bann film-la ti gate leker bann dimoune, ki l’influence zot ena zordi? (2 Timothée 3:13) Nou bizin faire attention ar sa piege ki Satan servi kan li mette tou sa bann forme divertissement-la devant nou: ki li bann serie ki passé lor television ek ki raconte bann zistoire d’amour, ou-soit bann joué video ki violent ou-soit bann video clip ki immoral.

Bann desaccord entre chrétien

15. Couma eski Satan maye certain vivant?

¹⁵ Satan servi bann desaccord entre chrétien couma enn piege pou crée division parmi bann serviteur Jéhovah. Mem ki privilege nou ena dan congregation, nou kapav tombe dan sa piege-la. Satan reussi maye certain vivant parski zot laisse bann desaccord troublé la-paix ek l’unité ki ena dan sa paradi spirituel extraordinaire ki Jéhovah inn crée-la.—Psaume 133:1-3.

16. Couma Satan inn rod troublé nou l’unité dan enn fason sournois?

¹⁶ Pendant Premier Guerre mondial, Satan ti rod detruire partie l’organisation Jéhovah ki lor la terre par bann l’attak direct. Mais li pa finn reussi. (Révélation 11:7-13) Depuis sa, li’nn rod troublé nou l’unité dan enn fason sournois. Kan nou laisse bann desaccord entre frere troublé nou l’unité, nou donne Satan pié. Kan nou faire sa, nou kapav empeche l’esprit saint agir couma bizin dan nou la-vie personnel ek aussi dan congregation. Si sa arrivé, Satan pou content parski si la paix ek l’unité dan congregation troublé mem enn tigit, sa affecté predication.—Éphésiens 4:27, 30-32.

17. Ki bizin faire pou reglé enn desaccord?

¹⁷ Ki ou kapav faire si ou ena bann desaccord avek enn lot chrétien? Li vrai ki tou situation pa pareil. Mais, mem si kapav ena beaucoup raison kifer bann problem developpé, pena okenn raison pou ki sa bann desaccord-la pa reglé. (Matthieu 5:23, 24; 18:15-17) Conseil ki nou gagné dan Parole Bondié, li inspiré ek li parfait. Kan nou applik bann principe la Bible, zot touletan reussi. Zot touletan marché!

18. Kifer kan nou imite Jéhovah, sa pou aide nou pou reglé bann desaccord avek nou bann frere?

¹⁸ Jéhovah “disposé pou pardonné” ek Li donne “vrai pardon.” (Psaume 86:5; 130:4) Kan nou imite Jéhovah, nou montré ki nou so bann zenfant ki Li bien content. (Éphésiens 5:1) Nou tou nou faire peché ek nou bien bizin pardon Jéhovah. Alors nou bizin faire attention si nou senti ki nou ena tendance pou pa pardonné. Nou kapav vinn pareil couma sa esclave dan parabole Jésus-la. Li ti refuse cancel dette so camarade ki ti esclave pareil couma li. Pourtant so dette ti bien tigit comparé ar dette ki li, li ti ena envers so maitre ek ki so maitre ti’nn fini cancel. Kan maitre-la ti konn seki ti’nn passé, li ti jette sa esclave-la dan prison parski li pa ti oulé cancel dette so camarade. Jésus ti termine sa parabole-la avek sa bann parole-la: “Coumsa-mem mo Papa ki dan le ciel pou traite zot, si sakenn pa pardonne so frere avek tou so leker.” (Matthieu 18:21-35) Kan nou medite lor sa parabole-la ek nou maziné comié fois Jéhovah inn pardonne nou avek tou so leker, sa pou surement aide nou kan nou pé essaye reglé enn desaccord avek enn frere!—Psaume 19:14.

En securité dan “l’endroit secret sa Kikenn ki Pli Grand-la”

19, 20. Couma eski nou bizin considere “l’endroit secret” Jéhovah ek so “l’ombrage” pendant sa lepok dangereux-la?

¹⁹ Nou pé vive enn lepok ki dangereux. Surement Satan ti pou fini detruire nou tou si Jéhovah pa ti protege nou avek amour. Alors pou nou pa tombe dan piege “sa kikenn ki maye zoiseau-la,” nou bizin reste dan enn l’endroit symbolik kot nou kapav gagne protection. Sa vedir ki nou bizin “reste dan l’endroit secret sa Kikenn ki Pli Grand-la,” ek “gagne enn place pou resté dan l’ombrage Tout-Puissant.”—Psaume 91:1.

²⁰ Fodé ki nou touletan considere bann rappel ek conseil ki Jéhovah donne nou couma enn protection. Fodé pa nou pensé ki zot pé prive nou. Nou tou nou bizin faire face ar enn kikenn ki envie devore nou, enn kikenn ki beaucoup pli intelligent ki n’importe ki humain. Sans l’aide Jéhovah, personne pa pou kapav evite tombe dan so piege. (Psaume 124:7, 8) Alors anou prié Jéhovah pou ki Li delivré nou dan bann piege sa “kikenn ki maye zoiseau-la”!—Matthieu 6:13.

[Note]

Eski ou rappel?

• Kifer “tremblé devant bann zom,” sa li enn piege ki kapav amenn la mort?

• Couma eski Satan attire nou avek materialisme?

• Couma eski Satan finn maye certain dan piege bann divertissement ki gate l’esprit?

• Ki piege Satan servi pou troublé nou l’unité?

[Zimage, page 29]

Certain inn tombe dan piege parski zot inn “tremblé devant bann zom”

[Zimage, page 30]

Eski ou diverti-ou avek bann kitsoz ki Jéhovah pa content ditou?

[Zimage, page 31]

Ki ou kapav faire si ou ena bann desaccord avek enn lot frere?