Fixé nou l’esprit lor tou bann bon kitsoz dan l’organisation Jéhovah
“Oui, nou pou vrai-mem satisfait ar tou bann bon kitsoz ki ena dan to lakaz.”—PSAUME 65:4.
1, 2. (a) Ki l’effet bann disposition en rapport avek temple ti pou ena lor peuple Bondié? (b) Ki David ti faire pou soutenir construction temple?
DAVID, li enn parmi bann dimoune pli extraordinaire ki mentionné dan bann l’Écriture hébraïque. Li ti enn berger, enn musicien, enn prophete ek enn lé-roi ki ti mette tou so confiance en Jéhovah. Li ti tellement attaché ar Jéhovah ki sa ti faire li envie monte enn lakaz pou Bondié. Sa lakaz-la ou-bien sa temple-la ti pou vinn centre vrai l’adoration en Israël. David ti koné ki bann disposition en rapport avek sa temple-la, ti pou amenn la joie ek bann benediction lor peuple Bondié. A cause sa li ti chanté: “Heureux sa kikenn ki toi [Jéhovah] to choisir-la ek ki to faire vinn pré pou li reste dan to la-cour. Oui, nou pou vrai-mem satisfait ar tou bann bon kitsoz ki ena dan to lakaz, to temple ki saint.”—Psaume 65:4.
2 Jéhovah pa ti permette David pou en charge construction so lakaz. C’est Salomon ki ti gagne sa privilege-la. David pa ti plaigné parski Jéhovah ti donne enn lot dimoune sa privilege ki li ti tellement envie gagné-la. Seki ti pli important pou li, c’est construction sa temple-la. Li ti montré ki li ti soutenir sa projet-la avek tou so leker kan li ti donne Salomon bann plan ki Jéhovah ti donne li. En plus, David ti organise bann millier Lévite en plusieurs division pou servi dan temple. Li ti aussi faire don enn grand quantité l’or ek l’argent pou construction temple.—1 Chroniques 17:1, 4, 11, 12; 23:3-6; 28:11, 12; 29:1-5.
3. Ki l’attitude bann serviteur Bondié ena envers bann disposition ki prend en rapport avek vrai l’adoration?
3 Bann Israélite fidel ti soutenir bann disposition en rapport avek vrai l’adoration ki ti faire dan temple Bondié. En tant ki bann serviteur Jéhovah zordi, nou aussi nou soutenir bann disposition en rapport avek vrai l’adoration dan so l’organisation lor la terre. Kan nou faire sa, nou montré ki nou ena mem l’attitude ki David. Nou pa bann dimoune ki habitué plaigné. Au contraire, nou fixé nou l’esprit lor tou bann bon kitsoz dan l’organisation Jéhovah. Eski ou finn deja reflechi lor tou bann raison ki nou ena pou nou reconnaissant? Anou examine certain.
Nou reconnaissant envers bann ki dirige nou
4, 5. (a) Couma “l’esclave fidel et avisé” rempli so mission? (b) Ki sentiment certain Témoins ena pou mangé spirituel ki zot gagné?
4 Nou ena bann bon raison pou nou reconnaissant envers “l’esclave fidel et avisé” ki Jésus inn etabli lor so bann di-bien ki lor la terre. Bann chrétien oint ki forme sa group esclave-la dirige predication la bonne nouvelle, organise bann reunion, ek publié bann publication ki basé lor la Bible, dan plus ki 400 langue. Dan le monde entier, plusieurs million dimoune bien reconnaissant ki zot pé kapav profite sa ‘mangé spirituel ki zot gagné dan l’heure ki bizin-la.’ (Matthieu 24:45-47) Pena okenn raison pou nou plaigné lor sa sujet-la.
5 Sa faire plusieurs l’année, ki Elfi, enn Témoin de Jéhovah agé, pé gagne enn grand reconfort ek enn grand soutien kan li mette en pratik bann conseil biblik ki trouve dan bann publication ki l’esclave fidel donne nou. Avek enn grand reconnaissance, sa soeur-la ti ecrire: “Ki mo ti pou faire sans l’organisation Jéhovah?” Peter et Irmgard, enn couple chrétien, zot aussi, zot pé servi Jéhovah pendant beaucoup l’année. Irmgard dire ki li bien reconnaissant pou tou bann publication ki li gagné dan “l’organisation Jéhovah, [enn l’organisation] ki rempli ar l’amour ek ki prend [nou] soin.” Parmi sa bann publication-la, ena aussi ki’nn faire pou bann dimoune ki dan enn situation difficile, couma par exemple bann ki ena problem pou trouvé ek pou tendé.
6, 7. (a) Couma l’activité ki faire dan tou bann congregation dan le monde entier, dirigé? (b) Ki certain finn dire concernant l’organisation Jéhovah lor la terre?
6 ‘L’esclave fidel,’ li representé par College central bann Témoins de Jéhovah. College central c’est enn ti group frere oint ki servi dan bureau central bann Témoins de Jéhovah, ki trouve Brooklyn, New York. College central etabli bann serviteur Jéhovah ki ena l’experience dan bann filiale, pou dirige l’activité 98,000 congregation ki ena dan le monde. Dan sa bann congregation-la, ena bann zom ki rempli bann condition mentionné dan la Bible, ki’nn nommé couma bann ancien ek bann assistant ministeriel. (1 Timothée 3:1-9, 12, 13) C’est avek amour ki sa bann ancien-la dirige peuple Bondié ki lor zot charge. Li vrai-mem enn grand benediction pou forme partie dan sa peuple-la ek pou konn l’amour ek l’unité ki ena parmi ‘la famille international nou bann frere’!—1 Pierre 2:17; 5:2, 3.
7 Au lieu ki zot plaigné, bann chrétien souvent dire ki quantité zot apprecié bann conseil spirituel ki zot gagné ar bann ancien. Prend l’exemple Birgit, enn chretienne ki ena plus ki 30 an ek ki marié. Kan li ti enn adolescent, li ti ena bann mauvais frequentation ek li ti manké faire enn peché grave. Mais bann ancien ti donne li bann conseil bien clair, ek bann frere ek soeur ti bien soutenir li. Tousala ti aide li pou sap dan enn situation ki ti pou kapav faire li beaucoup di-tort. Ki Birgit ressenti asterla? Li dire: “Mo bien reconnaissant ki mo encore dan l’organisation Jéhovah zordi; c’est enn l’organisation extraordinaire.” Andreas, ki ena 17 an dire: “Sa c’est vrai-mem l’organisation Jéhovah, pena pli bon l’organisation ki sa dan le monde!” Eski nou aussi, nou pa bizin reconnaissant pou tou bann bon kitsoz ki ena dan l’organisation Jéhovah lor la terre?
Bann ki dirige nou, zot imparfait
8, 9. Couma bann dimoune dan lepok David ti agir, ek couma David ti reagir dan sa bann situation-la?
8 Bien-sur, bann frere ki’nn etabli pou dirige vrai l’adoration, zot imparfait. Zot tou faire erreur, ek certain bizin faire beaucoup zeffort pou control zot bann faiblesse ki enraciné. Eski sa bizin agace nou? Non. En Israël, mem bann zom ki ti gagne bann grand responsabilité ti faire bann erreur bien grave. Par exemple, kan David ti encore jeune, le roi Saül ti demann li vinn joué la musik pou calmé li. Plitar, li ti rod touye David, ek David ti bizin sauvé pou sap so la-vie.—1 Samuel 16:14-23; 18:10-12; 19:18; 20:32, 33; 22:1-5.
9 Ti ena lezot Israélite ki ti vinn bann traitre. Par exemple Yoab, chef l’armée David, ti touye Abner, enn famille bien proche ar lé-roi Saül. Absalom ti faire enn complot kont David, so papa, pou li vinn lé-roi. Ek Ahithophel, conseiller ki ti bien proche ar David, ti trahir li. (2 Samuel 3:22-30; 15:1-17, 31; 16:15, 21) Pourtant David pa ti vinn amer, li pa ti plaigné ek li pa ti abandonne vrai l’adoration. C’est lé-contraire ki li ti faire. Kan li ti dan sa bann l’epreuve-la, li ti reste attaché ar Jéhovah ek li ti garde enn bon l’attitude. Li ti ena mem l’attitude ki kan li ti pé sauvé a cause le roi Saül. Sa lepok-la David ti chanté: “Donne moi to faveur, Ah Bondié, donne moi to faveur, parski c’est en toi ki mo finn rod protection; ek enba to lezel, mo rod protection ziska ki bann malheur passé.”—Psaume 57:1.
10, 11. Ki ti arrive Gertrud kan li ti jeune, ek ki li ti dire lor faiblesse bann serviteur Bondié?
10 Nou pena okenn raison pou nou plaigné ki ena bann traitre dan l’organisation Jéhovah zordi. Ni Jéhovah, ni bann ange, ni bann ancien ki couma bann berger spirituel, pa tolere bann mauvais dimoune ki bann traitre dan congregation. Mais, nou tou nou bizin faire face ar l’imperfection—nou prop l’imperfection ek l’imperfection lezot serviteur Bondié.
11 Gertrud, ti enn soeur ki ti’nn servi Jéhovah pendant bien longtemps. Kan li ti jeune, certain ti accuse li ki li ti enn espion ek pa enn serviteur a plein temps. Couma li ti reagir? Eski Gertrud ti plaigné parski certain ti traite li coumsa? Non. Enn tipé lé-temps avant li mort, en 2003, alors ki li ti ena 91 an, li ti reflechi lor so la-vie ek li ti dire: “Sa l’experience-la, ek bann lezot kitsoz ki finn arrive moi, finn montré moi ki malgré bann erreur ki certain faire, Jéhovah dirige so grand travail, ek Li servi bann dimoune imparfait pou faire sa.” Kan li ti bizin faire face ar l’imperfection lezot serviteur Bondié, Gertrud ti prié Jéhovah avek tou so leker.
12. (a) Ki mauvais l’exemple certain chrétien dan premier siecle inn laissé? (b) Lor ki kitsoz fodé nou fixé nou l’esprit?
12 Mem bann serviteur ki bien fidel ek ki bien devoué, zot imparfait. Alors, si enn ancien ou-soit enn assistant ministeriel faire enn erreur, anou contigne faire “tou kitsoz sans plaigné.” (Philippiens 2:14) Li pou bien triste si nou suive mauvais l’exemple certain chrétien ki ti dan congregation premier siecle! Dapré disciple Jude, dan sa lepok-la, bann fausse enseignant ti pé “meprise bann ki ti ena l’autorité ek zot ti pé koz en mal lor bann ki Bondié ti donne la gloire.” En plus, zot ti pé ‘grogné, ek zot ti pé plaigne lor zot sort dan la vie.’ (Jude 8, 16) Fodé pa ki nou suive mem chemin ki bann dimoune ki content plaigné. Au contraire, anou fixé nou l’esprit lor tou bann bon kitsoz ki nou gagné ar “l’esclave fidel et avisé.” Anou apprecié tou bann bon kitsoz ki ena dan l’organisation Jéhovah ek “contigne faire tou kitsoz sans plaigné.”
“Sa langage-la choquant”
13. Couma certain ti reagir kan zot ti tann bann l’enseignement Jésus?
13 Alors ki certain dan premier siecle ti plaigné kont bann frere ki ti etabli dan congregation, ti ena lezot ki ti plaigné kont bann l’enseignement Jésus. Guette seki Jésus ti dire dan Jean 6:48-69: “Enn kikenn ki mange mo la-chair ek ki boire mo di-sang, ena la vie eternel.” Kan zot ti tann sa, “beaucoup parmi so bann disciple . . . ti dire: ‘Sa langage-la choquant; Kisannla kapav ecoute sa?’ ” Jésus ti koné ki “so bann disciple ti pé plaigné lor sa sujet-la.” En plus, “a cause sa, beaucoup parmi so bann disciple ti retourne ar bann kitsoz ki ti derriere, ek zot ti nepli oulé marche avek li.” Mais pa tou disciple ki ti plaigné. Guetté ki ti arrivé kan Jésus ti demann so 12 zapotre: “Eski zot envie allé zot aussi?” L’apotre Pierre ti reponn: “Seigneur, ar kisannla nou pou allé? C’est toi ki ena bann parole la vie eternel; ek nou finn croire ek nou finn koné ki c’est to-mem sa Kikenn ki Saint, ki Bondié inn envoyé-la.”
14, 15. (a) Kifer ena ki critik fason ki explik certain l’enseignement biblik? (b) Ki nou kapav aprann ar seki ti arrive Emmanuel?
14 Dan lepok modern, ena enn tigit serviteur Bondié ki pa’nn satisfait ar fason ki explik certain l’enseignement biblik, ek zot inn plaigné kont l’organisation Jéhovah lor la terre. Kifer sa arrivé? Souvent c’est parski zot pa bien comprend fason ki Bondié agir. Tigit par tigit, nou Createur faire so bann serviteur konn la verité. C’est a cause sa ki parfois, nou bizin corrige fason ki nou comprend la Bible. La plupart serviteur Jéhovah content kan zot gagne sa bann eclaircissement-la. Mais certain “declare-zot trop juste” ek sa bann changement-la agace zot. (Ecclésiaste 7:16) Sa arrivé parski certain ena l’orgueil, ek lerla zot commence developpe enn l’esprit l’independance. Mais n’importe ki raison ki derriere sa, li bien dangereux ki nou ena l’habitude plaigné, parski sa kapav faire nou retourne dan le monde ek suive so bann pratik.
15 Emmanuel par exemple, ti enn Témoin de Jéhovah ki ti commence critik seki li ti lire dan bann publication ki “l’esclave fidel et avisé” donne nou. (Matthieu 24:45) Li ti arrete lire bann publication ek finalement, li ti dire bann ancien ki li nepli envie reste enn Témoin de Jéhovah. Mais enn tipé lé-temps apré, li ti rann-li compte ki bann l’enseignement l’organisation Jéhovah, zot vrai-mem exact. Li ti contacté bann Témoins, li ti reconette so erreur, ek li ti reintegré couma enn Témoin de Jéhovah dan congregation. Sa finn faire li retrouve so la-joie.
16. Ki kapav aide nou pou tire bann doute lor certain l’enseignement chrétien?
16 Ki nou pou faire si nou tenté pou plaigné parski nou ena bann doute lor certain l’enseignement ki nou gagné dan l’organisation Jéhovah? Dan sa cas-la, anou ena patience. Li possible ki avek le temps, ‘l’esclave fidel’ pou publié kitsoz ki reponn nou bann question ek ki faire nou bann doute disparette. Li bon aussi ki nou rod l’aide bann ancien dan congregation. (Jude 22, 23) La priere, l’etude personnel, ek frequentation bann frere ek soeur spirituel, kapav aide nou aussi pou tire nou bann doute. Sa bann kitsoz-la kapav aide nou aussi pou plus apprecié bann verité biblik ki fortifié nou la-foi, ek ki nou finn aprann par moyen ki Jéhovah servi pou communik avek so peuple.
Anou garde enn l’attitude positif
17, 18. Au lieu ki nou plaigné, ki l’attitude nou bizin ena, ek kifer?
17 Bann dimoune imparfait ena tendance pou faire peché, ek li possible ki certain ena l’habitude pou plaigné pou nanyin. (Genèse 8:21; Romains 5:12) Mais si nou prend l’habitude pou plaigné, nou pou mette en danger nou relation avek Jéhovah. Alors, nou bizin control tou tendance pou plaigné.
18 Au lieu ki nou plaigné a cause bann kitsoz ki passé dan congregation, li bon ki nou garde enn l’attitude positif. Li bon aussi ki nou suive enn program ki garde nou occupé, joyeux, equilibré, ki faire nou ena respé pou Bondié ek ena enn la foi solid. (1 Corinthiens 15:58; Tite 2:1-5) Jéhovah control tou seki passé dan so l’organisation ek Jésus konn tou seki pé passé dan chaque congregation, pareil couma dan premier siecle. (Révélation 1:10, 11) Anou ena patience ek nou compte lor Jéhovah ek lor Jésus Christ, chef congregation. Zot kapav servi bann frere responsable pou corrige bann kitsoz ki bizin corrigé.—Psaume 43:5; Colossiens 1:18; Tite 1:5.
19. Avant ki Royaume Bondié dirige tou kitsoz lor la terre, lor ki kitsoz nou bizin fixé nou l’esprit?
19 Pa reste beaucoup lé-temps pou ki la fin sa lé-monde-la vini. Kan sa pou arrivé, Royaume messianik pou dirige tou kitsoz ki lor la terre. Alors ki nou pé attann sa lepok-la, li bien important ki sakenn parmi nou garde enn l’attitude positif! Sa pou aide nou pou remark bann qualité nou bann frere ek soeur spirituel au lieu ki nou guette zis zot bann defaut. Si nou fixé nou l’esprit lor bon coté zot personnalité, sa pou faire nou heureux. Lerla, nou pa pou fatigue-nou moralement, tellement nou plaigné. Au contraire nou pou encouragé ek nou pou vinn fort lor plan spirituel.
20. Ki benediction nou pou gagné si nou ena enn l’attitude positif?
20 Si nou ena enn l’attitude positif, sa pou aide nou pou rappel tou bann benediction ki nou gagné parski nou dan l’organisation Jéhovah. C’est sel l’organisation dan le monde ki fidel envers pli grand lé-Roi dan l’univers. Ki ou pensé lor la ek lor privilege ki ou ena pou adore sel vrai Bondié, Jéhovah? Nou souhaité ki ou ena mem sentiment ki David, ki ti chanté: “Toi, Celui ki ecoute la priere, oui tou dimoune pou vinn vers toi. Heureux sa kikenn ki toi [Jéhovah] to choisir-la ek ki to faire vinn pré pou li reste dan to la-cour. Oui, nou pou vrai-mem satisfait ar tou bann bon kitsoz ki ena dan to lakaz, to temple ki saint.”—Psaume 65:2, 4.
[Revision, page 17]
• Kifer nou bizin reconnaissant envers bann ki dirige congregation?
• Couma nou bizin reagir si bann frere responsable faire erreur?
• Couma nou bizin considere bann eclaircissement ki nou gagné dan fason ki nou comprend la Bible?
• Ki kapav aide enn chrétien ki ena bann doute?
[Zimage, page 14]
David ti donne Salomon bann plan pou construire temple, ek li ti soutenir vrai l’adoration avek tou so leker
[Zimage, page 17]
Bann ancien dan congregation content pou aide lezot lor plan spirituel