Kuma Nu Bizin Konsider Bann Dimunn Amezir Ki Zur Zeova Pe Aprose?
“Zeova pa tarde pu realiz so promes, . . . me Li ena pasyans avek zot parski Li pa anvi ki personn detrir, me okontrer Li anvi ki tu dimunn repanti.”—2 PYER 3:9.
1, 2. (a) Kuma eski Zeova konsider bann dimunn zordi? (b) Ki bann kestyon nu kapav poz numem?
ZEOVA finn donn so bann serviter enn gran travay: “fer . . . bann disip.” (Matye 28:19) Amezir ki nu ranpli sa misyon la ek nu atann “gran zur Zeova,” nu bizin konsider bann dimunn parey kuma Zeova konsider zot. (Sefanya 1:14) Me kuma eski Li konsider zot? Lapot Pyer dir: “Zeova pa tarde pu realiz so promes, kuma sertin kapav panse. Me, Li ena pasyans avek zot parski Li pa anvi ki personn detrir, me okontrer Li anvi ki tu dimunn repanti.” (2 Pyer 3:9) Pu Bondye, sak dimunn ena enn posibilite pu repanti. Li “anvi ki tut sort kalite dimunn sove ek reysi gayn enn konesans egzak lor laverite.” (1 Timote 2:4) Wi, sa fer Zeova enn gran plezir kan ‘enn kikenn kit so move semin ki li ti pe swiv, ek li kontiyn viv!’—Ezekyel 33:11.
2 Eski personelman nu ena mem lopinyon ki Zeova lor bann dimunn? Eski parey kuma Li, nu konsider sak dimunn, ninport ki ras uswa nasyon li ete, kuma enn kikenn ki kapav vinn enn ‘muton dan So patiraz’? (Psom 100:3; Akt 10:34, 35) Anu get de legzanp ki pu montre nu linportans pu ena mem lopinyon ki Zeova. Dan tulede ka, enn destriksyon ti pe aprose, ek Zeova ti fer so bann serviter kone alavans seki ti pu arive. Sa bann legzanp la, zot sirtu inportan pu nu, alor ki nu pe atann gran zur Zeova.
Abraam Ti Ena Mem Lopinyon Ki Zeova
3. Kuma Zeova ti konsider bann abitan Sodom ek Gomor?
3 Premye legzanp konsern fidel serviter Bondye, Abraam, ek de lavil ranpli ar mesanste, Sodom ek Gomor. Kan Zeova ti tann “konplint lor Sodom ek Gomor,” deswit Li pa ti detrir sa bann lavil la ek zot bann abitan. Avan, Li ti fer enn lanket. (Zenez 18:20, 21) Li ti avoy de anz dan Sodom, ek laba, zot ti gayn enn plas pu reste kot Lot. Lanwit ki sa de anz la ti arive, “bann zom dan lavil . . . , depi so ti garson ziska so zom aze, zot tu, dan enn laful, ti’nn antur lakaz [Lot].” Zot ti anvi gayn bann relasyon omosexyel avek sa bann anz la. Li kler ki kondisyon imoral degrade sa bann abitan la ti montre ki zot ti merit destriksyon. Me malgre sa, bann anz la ti dir Lot: “Eski to ena kikenn ankor dan sa lavil la? Enn zann, to bann garson ek to bann tifi ek tu dimunn ki pu twa, fer zot sorti dan sa lavil la!” Wi, Zeova ti donn sertin abitan sa lavil la, posibilite pu sov zot lavi. Me finalman, se zis Lot ek so de tifi ki’nn sape dan sa destriksyon la.—Zenez 19:4, 5, 12, 16, 23-26.
4, 5. Kifer eski Abraam ti pled pu bann abitan Sodom? Eski so lopinyon lor sa bann dimunn la ti an armoni avek lopinyon Zeova?
4 Asterla, anu return lepok kot Zeova ti fer Abraam kone ki Li ti pe al fer enn lanket dan lavil Sodom ek Gomor. Lerla, Abraam ti sipliy Zeova: “Sipoze ena sinkant dimunn drwat dan sa lavil la. Eski to pu detrir zot, ek to pa pu pardonn bann abitan sa landrwa la mem si ena sinkant dimunn drwat laba? Non, pa kapav pans enn kitsoz kumsa lor twa ek panse ki to pu azir dan sa fason la. Eski to pu tuy enn dimunn drwat ansam avek enn move dimunn, pu ki lerla dimunn drwat ek dimunn move tulede konn mem sor! Non, pa kapav pans enn kitsoz kumsa lor twa. Eski Ziz later antye pa pu fer seki drwat?” De fwa, Abraam ti dir “pa kapav pans enn kitsoz kumsa lor twa.”. Par so lexperyans, Abraam ti kone ki Zeova pa ti pu detrir dimunn drwat ansam avek move dimunn. Ebyin zisteman, Zeova ti dir Abraam ki Li pa ti pu detrir Sodom si ti ena “sinkant dimunn drwat dan sa lavil la.” Abe lerla, Abraam finn kontiyne demann Zeova: ‘Be si ena 40 . . . , si ena 30 . . . ,’ ziska ki sif la ariv 10.—Zenez 18:22-33.
5 Eski Zeova ti pu ekut siplikasyon Abraam, si lopinyon Abraam pa ti an armoni avek So prop lopinyon? Sirman pa! Antan ki “kamarad Zeova,” sirman Abraam ti byin konn lopinyon Zeova ek li ti partaz So lopinyon. (Zak 2:23) Kan Zeova ti turn so latansyon ver Sodom ek Gomor, Li ti dispoze pu pran kont seki Abraam ti demann Li. Kifer? Parski nu Papa ki dan lesyel “pa anvi ki personn detrir, me okontrer Li anvi ki tu dimunn repanti.”
Lopinyon Yona lor Bann Dimunn, Ti Byin Diferan
6. Kuma eski bann abitan Niniv ti reazir kan zot ti tann mesaz ki Yona ti proklame?
6 Asterla, anu get dezyem legzanp: legzanp Yona. Sa fwa la, se lavil Niniv ki ti pu detrir. Profet Yona ti gayn lord pu proklame ki mesanste sa lavil la ti’nn ‘mont ziska Zeova.’ (Yona 1:2) Si nu kont usi bann ti landrwa ki ti otur Niniv, nu kapav dir ki li ti enn gran lavil. “Ti bizin mars trwa zur pu kapav travers [sa lavil la].” Kan finalman Yona ti obeir Zeova ek li ti al Niniv, li ti dir plizir fwa: “Dan ankor selman karant zur, Niniv pu detrir.” Kan zot ti tann sa, “bann zom Niniv ti kumans ena lafwa dan Bondye, zot ti res karem ek zot ti met bann latwal sak lor zot.” Mem lerwa Niniv ti repanti.—Yona 3:1-6.
7. Kuma eski Zeova ti konsider latitid bann Ninivit ki ti’nn repanti?
7 Nu truv enn gran diferans avek fason ki bann abitan Sodom zot, zot ti reazir! Kuma eski Zeova ti konsider bann abitan Niniv ki ti’nn repanti? Yona 3:10 dir: “Vre Bondye ti regret maler ki Li ti dir Li pu amenn lor zot; ek Li pa’nn fer sa arive.” Zeova ‘ti regrete’ ansesans ki Li ti sanz so fason azir anver bann Ninivit parski zot ti’nn aret zot move kondwit. Me anrealite, Bondye pa’nn sanz so bann prinsip, me plito so desizyon, kan Li finn truv bann Ninivit repanti.—Malaki 3:6.
8. Kifer eski Yona ti bude?
8 Kan Yona ti’nn konpran ki Niniv pa ti pu detrir, eski li ti truv bann kitsoz parey kuma Zeova truve? Non, parski Labib dir nu: “Me sa pa ti fer Yona plezir ditu, ek li ti kumans bwi ar koler.” Ki Yona ti fer ankor? Labib dir: “Li ti priye Zeova ek li ti dir: ‘A! Zeova, pa sa ki mo ti pe dir, kan mo ti dan mo peyi? Ala kifer mo ti sove, mo ti al Tarsis. Parski mo ti kone ki to enn Bondye ki ena konpasyon ek mizerikord, to pa ankoler vit, to ena enn gran lamur fidel, ek to regret maler.’ ” (Yona 4:1, 2) Yona ti konn bann kalite Zeova. Me selman, dan sa moman la, li ti bude ek li pa ti partaz mem lopinyon ki Bondye lor bann Ninivit ki ti’nn repanti.
9, 10. (a) Ki leson Zeova finn fer Yona tire? (b) Kifer eski nu kapav dir ki sirman apre, Yona ti ena mem lopinyon ki Zeova lor bann Ninivit?
9 Yona ti kit Niniv, li ti ale. Li ti ranz enn ti kabann pu li kasyet soley “ziska ki li truve ki pu ariv sa lavil la.” Ek la, Zeova ti les enn lalyann grandi pu ki sa donn Yona lonbraz. Me, landemin, plant la finn sek. Sa finn fer Yona ankoler. Alor, Zeova dir li: “Twa, to pe sagrin sa lalyann la . . . Be mwa, eski mo pa bizin sagrin Niniv, enn gran lavil kot ena plis ki san-vin mil zom ki pa konn diferans ant zot drwat ek zot gos, ek sa san konte, sa gran kantite zanimo domestik ki ena laba?” (Yona 4:5-11) Wi, ala enn gran leson ki Yona finn bizin aprann lor fason ki Zeova konsider bann dimunn!
10 Labib pa rakonte kuma Yona ti reazir apre ki Zeova ti’nn dir li ki Li sagrin bann dimunn dan Niniv. Me selman, li kler ki Yona ti sanz so lopinyon lor bann Ninivit, parski sinon, Zeova pa ti pu servi li pu ekrir sa resi inspire la.
Ki Latitid U Ena?
11. Kuma eski Abraam sirman ti pu konsider bann dimunn ki viv dan nu lepok?
11 Zordi, enn lot destriksyon pe aprose—destriksyon sa move lemond la, pandan gran zur Zeova. (Lik 17:26-30; Galat 1:4; 2 Pyer 3:10) Si Abraam ti vivan zordi, kuma eski li ti pu konsider bann dimunn ki pe viv dan sa lemond ki pre pu detrir la? Sirman li ti pu trakase pu bann ki pankor tann ‘labonn nuvel lor rwayom’ Bondye. (Matye 24:14) Plizir fwa, Abraam ti sipliy Bondye pu bann dimunn drwat ki ti kapav ena dan Sodom. Ebyin zordi usi, kitfwa ena ankor dimunn ki pre pu rezet bann prinsip sa lemond la, si zot gayn posibilite pu repanti ek pu servi Bondye. Alor, eski nu trakase personelman pu sa bann dimunn la?—1 Zan 5:19; Revelasyon 18:2-4.
12. Kifer eski li fasil pu devlop mem latitid ki Yona ti ena, anver bann dimunn ki nu zwenn dan teritwar? Me, ki nu kapav fer pu sanz sa latitid la?
12 Li normal ki nu anvi truv mesanste fini enn fwa lor later. (Abakuk 1:2, 3) Me, li byin fasil pu devlop mem latitid ki Yona. Avredir, parey kuma Yona, nu’si nu riske pa pran kont bann dimunn ki ankor kapav repanti. Sa kapav arive sirtu, si tuletan dan predikasyon nu zwenn bann dimunn ki indiferan, ki opoze ubyin mem ki agresif kan nu pres avek zot. Kitfwa usi, nu nepli pran kont bann dimunn ki Zeova ena ankor pu tire dan sa move lemond la. (Romin 2:4) Donk, li bon ki nu egzaminn numem seryezman. Si nu truve ki nu finn devlop, mem enn tipe, latitid ki Yona ti ena okumansman anver bann Ninivit, ki nu bizin fer? Nu bizin priye Zeova pu Li ed nu ena mem lopinyon ki Li.
13. Kifer eski nu kapav dir ki Zeova montre lintere anver bann dimunn zordi?
13 Zeova montre enn lintere anver bann dimunn ki pankor servi Li. Ek Li ekut siplikasyon so bann serviter ki’nn angaz zot lavi pu servi Li. (Matye 10:11) Wi, Li pu ekut zot lapriyer ek “Li pu fer ansort ki lazistis aplike.” (Lik 18:7, 8) Pa fini, Zeova pu realiz tu so bann promes ek so bann proze, dan ler ki Li’nn deside. (Abakuk 2:3) Lerla, Li pu anlev tu mesanste ki ena lor later, parey kuma Li ti detrir Niniv kan so bann abitan ti rekumans fer seki move.—Naum 3:5-7.
14. Ki nu bizin pe fer pandan ki nu pe atann gran zur Zeova?
14 Byinto sa move lemond la pu disparet pandan gran zur Zeova. Me anatandan, eski nu pu kontiyn atann avek pasyans ek res byin okipe pu fer volonte Bondye? Nu pa kone ki kantite ankor travay predikasyon pu bizin fer avan ki zur Zeova vini. Nu pena bann detay lor la. Me, seki nu kone, se ki avan lafin vini, labonn nuvel lor Rwayom Bondye pu prese lor later ziska ki Bondye satisfe. Ek sirman, nu pu pran kont bann “kitsoz dezirab” ki ankor bizin rantre, amezir ki Zeova kontiyn ranpli so lakaz avek laglwar.—Agai 2:7.
Nu Bann Aksyon Montre Nu Latitid
15. Ki kapav fer nu plis apresye travay predikasyon?
15 Li posib ki nu viv dan enn landrwa kot bann dimunn pa tro interese ar nu predikasyon, ek nu sityasyon pa permet nu al res dan enn landrwa kot bizin plis proklamater. Me sipoze ki dan nu teritwar, kapav ankor gayn dis dimunn avan lafin vini. Eski nu panse ki li vo lapenn pu rod sa dis la? Zezi ti ena “pitye” pu bann laful “parski zot ti maltrete ek zot ti byin dezespere parey kuma bann muton ki pena berze?” (Matye 9:36) Kan nu etidye Labib ek nu lir avek buku latansyon bann lartik dan Latur Degard ek dan Réveillez-vous !, nu konpran pli byin sityasyon kritik sa lemond la. Lerla, sa kapav fer nu truv plis nesesite pu pres labonn nuvel. Enn lot kitsoz ki kapav ed nu, se kan nu byin servi bann piblikasyon ki “esklav fidel ki ena bon zizman” donn nu. Avredir, kan nu servi bann piblikasyon kumsa, sa kapav ed nu pu konvink dimunn pli fasilman dan bann teritwar kot nu prese regilyerman.—Matye 24:45-47; 2 Timote 3:14-17.
16. Kuma eski nu kapav gayn pli bon rezilta dan nu minister?
16 Nu bizin tuzur ena enn lintere pu bann dimunn ki ankor kapav aksepte mesaz Labib ek gayn lavi. Lerla, nu pu mem dispoze pu sanz nu bann ler predikasyon ek nu bann metod pu kapav pres avek bann dimunn dan nu teritwar. Eski nu pa truve ki buku dimunn pa la kan nu pas kot zot? Alor, nu kapav gayn pli bon rezilta dan nu minister, si nu varye ler ek landrwa kot nu prese. Normalman, kan bann peser al lapes, zot ale dan enn ler kot zot pu kapav gayn pwason. Eski nu’si nu pa bizin fer parey dan nu lapes spirityel? (Mark 1:16-18) Kifer eski nu pa sey prese dan lasware uswa par telefonn, si lalwa permet? Sertin finn truve ki bann parking, bann lafwar ek bann lagar bis, zot bann bon plas pu ‘lapes.’ Kan nu sezi bann lokazyon pu donn temwaynaz informel, nu montre ki nu ena mem latitid ki Abraam anver bann dimunn.
17. Dan ki bann fason nu kapav ankuraz bann misyoner ek lezot ki pe servi dan bann peyi etranze?
17 Enn gran kantite dimunn pankor tann mesaz lor Rwayom Bondye. Par nu predikasyon, nu montre nu lintere pu sa bann dimunn la. Me, apar nu predikasyon, eski ena lezot fason kot nu kapav montre sa lintere la, san mem ki nu sorti kot nu? Wi. Par egzanp, eski nu konn bann misyoner uswa bann serviter aplintan ki pe servi dan enn lot peyi? Nu kapav ekrir zot pu dir ki nu apresye zot travay. Me, kuma eski kan nu fer sa, nu pe montre nu lintere pu bann dimunn an zeneral? Ebyin, nu bann parol lankurazman ek felisitasyon, kapav fortifye sa bann misyoner la pu kontiyn zot servis. Ek lerla, zot kapav ed pli buku dimunn ankor pu gayn enn konesans laverite. (Ziz 11:40) Nu kapav usi priye pu bann misyoner ek pu bann dimunn ki swaf laverite dan lezot peyi. (Efezyin 6:18-20) Enn lot fason pu montre nu lintere pu bann dimunn, se kan nu fer bann kontribisyon pu travay ki bann Temwin Zeova pe fer dan lemond antye.—2 Korintyin 8:13, 14; 9:6, 7.
Eski U Dispoze pu Demenaze?
18. Ki sertin Kretyin finn fer pu avans bann lintere Rwayom dan peyi kot zot viv?
18 Sertin finn demenaze ek zot finn al res dan bann landrwa kot bizin plis proklamater. Ek zot pa finn fer bann sakrifis dan vid parski zot inn rekonpanse pu zot zefor. Lezot pa finn demenaze, me zot inn aprann enn lot lang pu donn enn led spirityel bann etranze ki’nn imigre dan zot peyi. Byinsir, zot usi zot bann zefor finn rekonpanse. Par egzanp, set Temwin Zeova ti pe ed bann imigran Sinwa dan enn lavil dan Texas, an Amérique. Pu Memoryal lamor Zezi, an 2001, sa bann Temwin la ti akeyir 114 dimunn. Bann proklamater ki pe ed bann grup kumsa, finn truve ki zot teritwar inn pre pu rekolt.—Matye 9:37, 38.
19. Ki li rekomande pu fer si u pans al servi dan enn lot peyi?
19 Petet u ek u fami panse ki zot ena posibilite pu al res dan enn landrwa kot bizin plis proklamater. Me byinsir, dabor li bon ki zot ‘asize pu kalkil depans’. (Lik 14:28) Wi, sa li byin inportan sirtu si enn dimunn pans pu al res dan enn lot peyi. Li bon ki sa dimunn la poz limem sa bann kestyon la: ‘Eski mo pu kapav sutenir mo fami lor plan finansye? Eski mo pu kapav gayn enn viza ki apropriye pu res dan sa peyi la? Eski mo koz lang sa peyi la? Ubyin, eski mo dispoze pu aprann sa lang la? Eski mo finn pans klima ek kiltir ki ena laba? Eski mo pu vremem vinn enn ‘led ki fortifye’ lezot, uswa plito enn fardo pu bann frer ki laba?’ (Kolosyin 4:10, 11) Pu kone ki kantite bezwin ena dan sa peyi kot u pe pans ale la, li tuzur bon ki u ekrir filyal bann Temwin Zeova ki okip laktivite predikasyon dan sa rezyon la.a
20. Kuma eski enn zenn Kretyin finn depans limem pu servi so bann frer ek lezot dan enn peyi etranze?
20 Enn Kretyin ki ti partisip dan konstriksyon bann Lasal DiRwayom dan Japon, ti aprann ki ti bizin bann travayer kalifye pu konstrir enn lasal dan Paraguay. Parski li ti selibater ek li ti zenn, avek tu so lafors, li finn al dan sa peyi la. Pandan wit mwa, li finn travay aplintan lor sa proze la; avredir, li tusel ti travayer aplintan. Pandan so sezur laba, li finn aprann Espanyol ek li finn diriz bann letid Labib. Li finn truve ki byin bizin bann proklamater dan sa peyi la. Mem si li’nn real Japon apre, li pa’nn tarde pu return Paraguay. Li’nn vinn ede pu rasanble bann dimunn dan sa mem Lasal DiRwayom ki li ti donn kudmin pu konstrir la.
21. Ki kitsoz ki bizin okip plis nu lespri alor ki nu pe atann gran zur Zeova?
21 Bondye pu asir Li ki travay predikasyon fer dan enn fason konple, an armoni avek so volonte. Zordi, Li pe akseler sa dernye rekolt spirityel la. (Izai 60:22) Alor ki nu pe atann zur Zeova, anu partisip avek zel dan sa travay rekolt la. Ek anu kontiyn konsider bann dimunn parey kuma nu Bondye ki ranpli ar lamur, Li konsider zot.
[Notes]
a Li difisil pu aport enn led apropriye si u al dan enn peyi kot travay predikasyon interdi uswa kot ena bann restriksyon. Okontrer, si u fer sa, u kapav kre problem pu bann proklamater ki pe deza pres laba an kasyet.
Eski U Rapel?
• Alor ki nu pe atann zur Zeova, kuma eski nu bizin konsider bann dimunn?
• Kuma Abraam ti konsider bann dimunn drwat ki ti kapav ena dan Sodom?
• Kuma eski Yona ti konsider bann abitan Niniv ki ti’nn repanti?
• Kuma eski nu kapav montre ki nu partaz lopinyon Zeova lor bann dimunn ki pankor tann labonn nuvel?
[Zimage page 16]
Abraam ti konsider bann dimunn parey kuma Zeova
[Zimage page 17]
Alafin, Yona ti gayn mem lopinyon ki Zeova lor bann Ninivit ki ti’nn repanti
[Zimage page 18]
Lintere pu bann dimunn pus nu pu sanz nu bann ler ek nu bann metod pu pres labonn nuvel