“Pran Plis Kont Bann Kitsoz Ki U Finn Tande”

“Nu bizin pran plis kont bann kitsoz ki nu finn tande, pu ki nu pa al fer nofraz, parey kuma enn bato.”—EBRE 2:1.

1. Donn bann legzanp pu montre ki kapav ariv nu enn maler si nu pa pran kont.

ZIS an Amérique, bann aksidan loto tuy preske 37,000 dimunn sak lane. Bann exper dir ki si bann sofer ti fer inpe plis atansyon seki pe pase lor semin, pa ti pu ena tu sa bann aksidan la. Sertin sofer les zot distrer kan zot get bann lafis ki ena lor semin uswa kan zot servi zot portab. Ena lezot ki pran labitid pu manze kan zot pe kondir. Me dan tu sa bann sityasyon la, nu truve ki, kapav ariv nu enn maler si nu pa pran kont.

2, 3. Ki konsey Pol ti donn bann Kretyin Ebre, ek kifer eski zot ti bizin sa konsey la?

² Preske 2000 an avan ki invant loto, Lapot Pol ti koz lor enn kitsoz ki ti distrer bann Kretyin Ebre ek ki ti fer zot gayn maler. Pol ti montre byin ki Zezi, ki ti deza resisite, ti gayn enn pozisyon pli siperyer ki bann anz, parski li ti pe asiz dan kote drwat Bondye. Apre sa, li finn dir: “Ala kifer nu bizin pran plis kont bann kitsoz ki nu finn tande, pu ki nu pa al fer nofraz, parey kuma enn bato.”—Ebre 2:1.

³ Me kifer eski bann Kretyin Ebre ti bizin “pran plis kont bann kitsoz ki zot ti tande” lor Zezi? Se parski, preske 30 an finn pase depi ki Zezi ti nepli lor later. Pandan so labsans, sertin finn kumans les zot antrene par relizyon Zwif, zot ansyin relizyon. Donk, zot finn kumans elwayne ar vre relizyon.

Zot Ti Bizin Pran Plis Kont

4. Kifer eski sertin Kretyin Ebre ti’nn tante pu return dan relizyon bann Zwif?

⁴ Kifer eski enn Kretyin ti pu tante pu return dan relizyon bann Zwif? Se parski sa kalite ladorasyon la ti baze lor bann kitsoz vizib, alor ki dan sertin fason, relizyon ki Kris ti etabli ti byin diferan. Zot ti kapav truv bann pret ek zot ti kapav santi loder bann sakrifis ki ti pe brile. Li vre ki bann Kretyin ti ena enn Gran Pret, setadir Zezi Kris, me depi plis ki 30 an li ti nepli lor later. (Ebre 4:14) Zot ti ena enn tanp, me selman li ti truv dan lesyel. (Ebre 9:24) Bann Kretyin ti bizin sirkonsi “zot leker par lespri,” ek sa ti byin diferan avek seki ti etabli dan Lalwa. (Romin 2:29) Donk, pu bann Kretyin Ebre, relizyon bann Kretyin ti kumans vinn flu.

5. Kuma eski Pol finn montre ki fason adore ki Zezi ti etabli, ti buku pli siperyer ki fason adore dapre Lalwa?

⁵ Bann Kretyin Ebre ti bizin realiz enn kitsoz byin inportan konsernan relizyon ki Zezi ti etabli. Li ti baze plis lor lafwa ki lor bann kitsoz ki zot ti pe truve. Akoz sa, li ti pli siperyer ki Lalwa ki Bondye ti done par Moiz. Pol ti ekrir: ‘Si disan bann buk ek bann toro ek lasann bann ti vas ki ti fane lor bann dimunn ki’nn fer pese, ti vremem fer zot vinn sin ziska ki zot laser vinn prop. Alor, komye plis disan Kris, ki par enn lespri eternel, ti ofer limem ar Bondye, san okenn defo, kapav pirifye nu konsyans pu bann move aksyon ki nu’nn fer, pu nu servi Bondye?’ (Ebre 9:13, 14) Wi, pardon ki zot ti gayne grasa lafwa ki zot ti ena dan sakrifis Zezi, ti buku pli siperyer dan plizir fason, ki bann sakrifis ki ti pe ofer kan zot ti ankor pe swiv Lalwa.—Ebre 7:26-28.

6, 7. (a) Kifer eski li ti byin inportan ki bann Kretyin Ebre ‘pran kont bann kitsoz ki zot ti tande’?(b) Kan Pol ti ekrir sa let la pu bann Ebre, ki kantite letan ti reste avan ki Zerizalem detrir? (Get not)

⁶ Ena enn lot rezon kifer bann Kretyin Ebre ti bizin pran byin kont bann kitsoz ki zot ti tande lor Zezi. Li ti anonse ki Zerizalem pu detrir. Li ti dir: “Bann zur pu arive kan to bann lennmi pu antur twa avek enn poto dibwa pwint ek zot pu anserkle twa. Zot pu fer twa sufer par tu kote. Ek zot pu zet twa ek tu to bann zanfan ki andan twa. Pa pu ena enn sel ros ki pu res an plas, parski to pa finn rekonet letan kan ti vizit twa.”—Lik 19:43, 44.

⁷ Kan sa ti pu arive? Zezi pa ti revel zur ek ler ki sa ti pu arive. Me li finn donn sa konsey la: “Kan zot truv Zerizalem anture par bann larme ki pe kanpe, zot pu kone ki so destriksyon finn koste. Lerla, fode ki bann ki dan Zide sove al dan montayn. Ek fode ki bann ki dan sant lavil sorti ale, ek fode pa ki bann ki dan lakanpayn vinn dan lavil.” (Lik 21:20, 21) Trant-an finn pase depi ki Zezi finn dir sa bann parol la. Pandan tu sa letan la, sertin Kretyin finn aret atann ek finn aret pran kont. Zot ti parey kumadir enn sofer ki pa pe pran kont, ek ki finn les li distrer. Maler ti pe atann zot si zot pa ti pu sanz zot fason panse. Ki zot sanze uswa non, destriksyon Zerizalem ti deryer laport!a Erezman, konsey ki Pol ti’nn donn zot, ti kuma enn rapel pu bann Kretyin dan Zerizalem ki ti pe dormi lor plan spirityel.

“Pran Plis Kont” Zordi

8. Kifer eski nu bizin “pran plis kont” bann lanseynman ki truv dan Parol Bondye?

⁸ Parey kuma sa bann Kretyin premye syek la, nu’si nu bizin “pran plis kont” bann lanseynman ki truv dan Parol Bondye. Kifer? Parski nu’si nu pu bizin fer fas ar enn destriksyon ki pe koste. Ek sa destriksyon la pu afekte lemond antye, pa zis enn peyi. (Revelasyon 11:18; 16:14, 16) Byinsir, nu pa kone ki zur, ni ki ler Zeova pu fer sa. (Matye 24:36) Me selman, nu truv bann profesi dan Labib pe realize. Sa montre, dan enn fason byin kler, ki nu pe viv dan “bann dernye zur.” (2 Timote 3:1-5) Donk, nu bizin veye ki nanyin pa distrer nu. Nu bizin pran kont seki Parol Bondye dir ek res lor nu gard. Se selman kan nu fer sa ki nu pu “reysi sape dan tu bann kitsoz ki pu bizin arive.”—Lik 21:36.

9, 10. (a) Kuma eski nu kapav pran kont bann kitsoz spirityel? (b) Kuma eski Parol Bondye li enn ‘lalanp pu nu lipye’ ek ‘enn lalimyer pu nu larut’?

⁹ Dan sa lepok difisil la, kuma eski nu kapav montre ki nu pe “pran plis kont” bann kitsoz spirityel? Enn fason, se kan nu asiste tu bann reynion Kretyin ek bann lasanble. Nu bizin vinn usi bann bon etidyan Labib, kumsa nu pu kapav vinn pli pros ar Zeova, sa kikenn ki finn fer ekrir Labib la. (Zak 4:8) Si nu fer tusala ek nu gayn konesans Zeova, nu pu parey kuma enn ekrivin Psom ki finn dir Bondye: “To parol li enn lalanp pu mo lipye, ek enn lalimyer pu mo larut.”—Psom 119:105.

¹⁰ Labib, li parey kuma enn ‘lalimyer pu nu larut’ kan li fer nu konn bann lintansyon Bondye pu lavenir. Li usi enn ‘lalanp pu nu lipye,’ setadir li kapav ekler nu semin kan nu bizin fer fas ar bann problem byin-byin difisil. Se akoz sa ki li byin inportan ki nu “pran plis kont” bann kitsoz ki nu tande dan reynion, ek kan nu lir Parol Bondye personelman. Sa bann ranseynman ki nu gayne la pu ed nu pu pran bann bon desizyon ki pu fer Zeova plezir ek pu fer so leker kontan. (Proverb 27:11; Izai 48:17) Me kuma eski nu kapav konsantre inpe plis dan bann reynion ek pandan nu letid personel, pu ki nu profit byin tu bann kitsoz ki Bondye donn nu?

Ogmant U Konsantrasyon dan Bann Reynion

11. Kifer eski li kapav byin difisil pu ekute dan bann reynion?

¹¹ Parfwa, li kapav difisil pu ekut byin dan bann reynion. Zis nu tann enn zanfan kriye uswa nu truv enn kikenn ki’nn vinn tar ki pe rod enn plas, samem ase pu kas nu konsantrasyon. Apre enn long zurne travay, li kapav arive usi ki nu byin fatige. Kitfwa sa kikenn ki pe koze la, li pa enn extra bon orater, ek san ki nu realize, nu pe kumans pans lezot kitsoz, uswa mem nu pe dormi. Me li pu bon ki nu amelyor nu konsantrasyon dan bann reynion, parski se la, kot nu gayn bann ranseynman ki byin-byin inportan. Me kuma eski nu kapav fer sa?

12. Kuma eski li kapav pli fasil pu ekut byin dan bann reynion?

¹² Suvan, si nu’nn prepar nu byin, li pli fasil pu ekute dan bann reynion. Alor, kifer eski u pa rezerv inpe letan pu prepar bann size ki pu egzamine dan reynion? Defwa, nu bizin zis detrwa minit tulezur pu lir ek medit lor enn parti bann sapit pu lektir Labib sak semenn. Si nu organiz nu byin, nu kapav truv letan pu prepar Letid Liv ek Letid Latur Degard. Me, ninport ki kalite program nu fer, ena enn kitsoz ki sir: Preparasyon pu ed nu pu ekut byin bann size ki pu egzamine dan reynion.

13. Ki kitsoz ki kapav ed nu pu ekut byin dan bann reynion?

¹³ Anplis, ena finn truve ki zot ekut pli byin kan zot asiz devan dan lasal. Ena bann lezot mwayin ki kapav anpes nu lespri pu distrer. Par egzanp, nu kapav get orater la pandan so diskur, kan pe lir enn tex, nu kapav swiv li dan nu prop Labib, ek nu pran bann not. Me ena enn kitsoz ki pli inportan ki tu sa bann teknik la. Nu bizin prepar nu leker. Nu bizin rapel ki, rezon prinsipal kifer nu rasanble ansam avek nu bann frer ek ser, se pu servi Zeova. (Psom 26:12; Lik 2:36, 37) Bann reynion zot byin inportan parski se enn mwayin kot nu nuri nu lor plan spirityel. (Matye 24:45-47) Anplis, dan bann reynion, nu gayn lokazyon pu ‘ankuraz nu kamarad pu ena lamur ek pu fer bann bon travay.’—Ebre 10:24, 25.

14. Ki kitsoz ki fer enn bon reynion?

¹⁴ Sertin kitfwa ena tandans pu panse ki, kalite enn reynion depann lor kapasite bann orater. Si bann orater la byin konn anseyne, zot pu dir “Mo finn gayn enn bon reynion.” Me si bann orater la pa tro ena sa kapasite la, zot pu dir lekontrer. Li vre ki, tu bann ki ena enn size dan reynion bizin fer tu seki zot kapav pu anseyn byin, ek sirtu tus leker bann ki pe ekute. (1 Timote 4:16) Me, fode pa ki nu, ki pe ekute, nu vinn tro kritik. Li vre ki, kapasite anseyne bann orater li byin inportan, me se pa zis sa ki fer enn bon reynion. Eski u pa dakor ki seki bizin pli inportan pu nu, se pa si orater la pe fer so diskur byin, me plito kuma nu, nu pe ekute? Kan nu pe asiste bann reynion ek kan nu ekute, nu pe ador Zeova an akor avek so volonte. Se sa ki fer enn bon reynion. Si nu ena enn dezir pu gayn konesans ki Bondye pe donn nu, nu pu profit byin bann reynion, ki orater la li enn bon orater uswa non. (Proverb 2:1-5) Wi, anu fer tu pu “pran plis kont” seki pe dir dan bann reynion.

Tir Maximem Profi dan Letid Personel

15. Kuma eski nu kapav tir profi kan nu etidye ek kan nu medite?

¹⁵ Nu kapav tir buku profi kan nu ‘pran plis kont’ dan nu letid personel ek kan nu medite. Kan nu lir Labib ek bann lezot piblikasyon ek nu reflesi lor seki nu finn lir, nu gayn bann bon lokazyon pu grav laverite Parol Bondye dan nu leker. Ek apre, sa pu ena enn gran linflyans lor nu fason panse ek nu fason azir. Wi, sa pu ed nu pu kontan fer volonte Zeova. (Psom 1:2; 40:8) Donk, si nu’le tir maximem profi kan nu pe etidye, nu bizin devlop nu kapasite pu konsantre. Me li pa fasil pu konsantre! Enn ti kitsoz kapav kas nu konsantrasyon. Par egzanp, enn ti tapaz, uswa enn kut telefonn. Uswa li kapav arive ki nu pa kapav konsantre pandan enn long peryod letan. Nu kapav asize devan nu latab avek bann bon lintansyon pu al etidye. Me enn ti moman apre, nu lespri fini al lwin. Donk, kuma eski nu kapav “pran plis kont” kan nu pe etidye Parol Bondye personelman?

16. (a) Kifer eski li inportan ki nu fer enn program pu nu letid personel? (b) Kuma eski nu kapav truv enn letan pu nu etidye Parol Bondye?

¹⁶ Li ti pu bon ki nu fer enn program ek nu rod enn bon plas kot nu pu byin kapav etidye. Me li vre ki, pu laplipar parmi nu, nu ena byin tigit letan pu numem. Kitfwa nu ena santiman ki bann sityasyon ki arive tulezur pe ris nu, parey kuma enn bato dan enn larivyer kot ena enn gro kuran. Wi, kumadir nu bizin lager kont sa kuran la, pu truv enn ti moman trankil pu etidye. Nu pa kapav atann ki enn kut kumsa nu pu gayn enn ti letan. Okontrer, nu bizin kontrol sa sityasyon la, ek rod enn moman pu etidye. (Efezyin 5:15, 16) Ena sertin ki rezerv enn ti letan gramatin kot zot pa tro distrer, pu zot etidye. Ena lezot ki truve ki zot gayn plis lokazyon aswar pu etidye. Me ena enn kitsoz ki pli inportan: Nu bizin pa bliye ki li neseser ki nu gayn konesans lor Bondye ek so garson. (Zan 17:3) Wi, anu fer enn program pu nu letid personel, ek respekte sa program la.

17. Ki vedir medite, ek ki profi nu kapav gayne kan nu medite?

¹⁷ Medite vedir reflesi byin lor bann kitsoz ki nu’nn aprann kan nu’nn etidye. Ek sa li enn kitsoz ki byin inportan. Kan nu medite, sa ed nu pu grav bann panse Bondye dan nu leker. Sa ed nu usi pu gete kuma nu kapav aplik konsey Labib. Kumsa nu pu vinn ‘bann kikenn ki pratik seki ena dan Labib, pa bann kikenn ki zis tande.’ (Zak 1:22-25) Anplis, kan nu medite nu vinn pli pros ar Zeova. Kifer? Parski nu kapav reflesi lor so bann kalite ek truve kuma bann piblikasyon ki nu pe etidye montre sa byin.

18. Ki nu bizin fer pu ki kan nu medite nu kapav tir buku profi?

¹⁸ Pu nu kapav tir maximem profi kan nu pe etidye ek kan nu pe medite, nu bizin pa les nanyin distrer nu lespri. Pu nu kapav rapel bann nuvo ranseynman kan nu pe medite, nu bizin eliminn tu bann kitsoz dan lavi tulezur ki kapav distrer nu. Pu nu medite, nu bizin letan ek nu bizin tusel. Me, nu santi nu regayn lafors kan nu pran nuritir spirityel ek delo laverite ki truv dan Parol Bondye.

19. (a) Ki finn ed sertin pu ogmant zot kapasite pu konsantre dan zot letid personel? (b) Kuma eski nu bizin konsider letid, ek ki byinfe nu pu gayne dan sa laktivite byin inportan la?

¹⁹ Me ki u pu fer si u pa kapav konsantre pandan enn long peryod letan ek ki enn ti moman apre u lespri fini al lwin? Sertin finn truve ki zot kapav ogmant zot kapasite pu konsantre si dusma-dusma zot ogmant kantite letan ki zot pase pu etidye. Nu lobzektif se pa pu bakle nu letid, me se plito pu pran ase letan pu etidye. Nu bizin devlop enn gran lintere dan seki nu pe etidye. Ek nu kapav servi sa gran varyete piblikasyon ki esklav fidel finn donn nu la, pu nu fer bann resers. Nu tir buku profi kan nu egzaminn “bann kitsoz profon lor Bondye.” (1 Korintyin 2:10) Si nu fer sa, sa pu ogmant nu konesans lor Bondye ek pu devlop nu kapasite pu konpran. (Ebre 5:14) Si nu vinn bann bon etidyan Labib, nu pu vinn usi bann ki “byin kalifye pu anseyn lezot.”—2 Timote 2:2.

20. Kuma eski nu kapav devlop ek gard enn bon relasyon avek Bondye Zeova?

²⁰ Asiste bann reynion ek etidye personelman pu ed nu buku pu devlop ek gard enn bon relasyon avek Zeova. Avredir, se samem santiman la ki enn ekrivin Psom ti ena. Li ti dir Bondye: “Ki kantite mo vremem kontan to lalwa! Pandan tutlong lazurne, li res dan mo panse.” (Psom 119:97) Wi, anu asiste tu bann reynion ek bann lasanble. Ek anu truv letan pu nu etidye Labib ek medit lor la. Si nu “pran plis kont” Parol Bondye, nu pu gayn buku rekonpans.

[Not anba paz]

Eski U Ankor Rapel?

• Kifer eski sertin Kretyin Ebre ti pe elwayne ar vre relizyon?

• Kuma eski nu kapav ekut byin dan bann reynion?

• Ki pu ed nu pu tir profi dan nu letid Labib personel ek kan nu medite?

[Zimaz lor paz 9]

Bann Kretyin Ebre ti bizin atann ek vey destriksyon Zerizalem ki ti deryer laport

[Zimaz lor paz 11]

Bann paran kapav ed zot bann zanfan pu tir profi dan bann reynion Kretyin