Bondié beni Abraham ek so famille

JÉHOVAH ti koné ki so Garson ki Li pli content ti pou bizin souffert ek mort enn jour. Prophetie ki ti trouve dan Genèse 3:15, mentionne sa dan enn fason indirect. Couma Bondié ti pou kapav faire bann dimoune comprend ki quantité sa la mort-la ti pou coute Li? La Bible aide nou pou comprend sa a travers l’exemple enn papa ek so garson. Bondié ti demann Abraham pou sacrifié Isaac, so garson ki li ti bien content.

Abraham ti ena enn grand la foi. Rappel ki Bondié ti promette li ki Sauveur, ou-soit Descendance ki ti annoncé, ti pou sorti dan descendance Isaac. Abraham ti pé al sacrifié so prop garson pareil couma Bondié ti demann li, parski li ti sur ki Bondié ti pou ressuscite Isaac, si bizin. Mais enn ange ti arrete Abraham zis a temps. Bondié ti felicite Abraham parski li ti paré pou sacrifié seki ti ena plus valeur pou li ek Bondié ti repete sa promesse ki Li ti faire ar sa zom fidele-la.

Plitar, Isaac ti gagne deux garson, Ésaü ek Jacob. Jacob pa ti pareil couma Ésaü. Li ti content bann kitsoz spirituel ek Bondié ti recompense li. Bondié ti change nom Jacob ti faire li vinn Israël, ek 12 garson Israël ti vinn bann chef tribu Israël. Mais couma sa famille-la ti vinn enn grand nation?

Enn serie l’evenement ti’nn commencé kan la plupart bann garson Jacob ti jaloux zot ti frere Joseph. Zot ti vann li couma enn esclave, ek li ti retrouve-li en Égypte. Mais Bondié ti beni sa jeune homme ki ti fidele ek ki ti ena courage-la. Joseph ti gagne bann grand l’epreuve. Mais finalement, Pharaon, le roi l’Égypte, ti choisir li ek ti donne li enn grand l’autorité. Sa ti tombe bien, parski enn famine ti pousse Jacob pou envoye certain so bann garson en Égypte pou acheté mangé. Ek kisannla ki ti en charge tou bann mangé? Joseph! Apré enn reunion rempli ar l’emotion ek surprise avek so bann frere ki ti repenti, Joseph ti pardonne zot ek ti prend bann disposition pou ki tou so famille vinn en Égypte. Zot ti gagne pli bon place dan pays pou zot resté, kot zot ti pou contigne augmenté ek prosperé. Joseph ti comprend ki c’est Bondié ki ti dirige sa bann l’evenement-la pou realise So bann promesse.

Jacob ki’nn vinn vié, ti mort en Égypte, entouré avek tou so famille ki ti pé contigne grandi. Zis avant li mort, li ti annoncé ki sa Sauveur, ou-soit sa Descendance ki ti promette-la, ti pou vinn enn Chef bien fort ki ti pou né dan descendance so garson, Juda. Avant so la mort, plusieurs l’année plitar, Joseph ti annoncé ki enn jour, Bondié ti pou faire famille Jacob quitte l’Égypte.

—Basé lor Genèse chapitre 20 ziska 50; Hébreux 11:17-22.