Enn Nouveau lé-Monde Ki Bondié Finn Promette
LA BIBLE, Parole Bondié, donne nou enn l’espoir kan li dire: “D’après so promesse, nou pé atann nouveau lé-ciel ek enn nouveau la-terre kot pou éna la justice.”—2 Pierre 3:13.
Ki été “nouveau lé-ciel”? La Bible associé le ciel avec gouvernement. (Actes 7:49) “Nouveau lé-ciel” li enn nouveau gouvernement ki pou dirige la terre. Li “nouveau” parski li pou remplace bann gouvernements ki existé zordi, et parski sa pou marque enn nouveau pas dans l’accomplissement volonté Bondié. C’est pou sa royaume-la ki Jésus ti enseigne nou pou prié. (Matthieu 6:10) Étant donné ki c’est enn royaume ki’nn établi par Bondié ek ki li trouve dans le ciel, sa gouvernement-la appelle “le royaume des cieux.”—Matthieu 7:21.
Ki été “nouveau la-terre”? Li pa enn nouveau planète la-Terre, parski la Bible dire clairement ki la terre pou toujours habité. “Nouveau la-terre” représente plutôt enn nouveau société dimoune. Li pou nouveau parski bann méchants pou’nn fini détruire. (Proverbes 2:21, 22) Tou bann ki pou vive lor la terre sa l’époque-la, pou honore zot Créateur ek zot pou obéir Li. Zot pou vive en accord avec séki Li demann zot. (Psaume 22:27) Zordi, bann dimoune de différent nations, pé gagne l’occasion aprann séki Bondié pé demann zot et pou vive en harmonie avec so bann la-lois ek principes. Eski ou pé faire sa?
Dans le monde nouveau ki Bondié inn promette nou, tou dimoune pou respecté So règne. Eski ou l’amour pou Bondié pousse ou pou obéir Li? (1 Jean 5:3) Eski ou façon vive dans ou lakaz, dans travail ou-soit dans l’école, montré ki ou content Bondié?
Dans le monde nouveau, tou dimoune pou uni ensemble pou adore seul vrai Bondié. Eski ou pé adore Créateur le ciel ek l’univers? Eski l’adoration ki ou pé donne Bondié, pé vrémem faire ou vive dans l’unité avec lézot adorateurs dans tou bann nations, races ek langues?—Psaume 86:9, 10; Isaïe 2:2-4; Tsephania 3:9.
[L’encadré page 17]
Kisannla Sa Bondié Ki’nn Promette Sa Bann Kitsoz-La?
Limem Créateur le ciel ek la terre. C’est Limem ki Jésus Christ ti identifié couma “seul vrai Bondié.”—Jean 17:3.
La plupart dimoune adore bann bondié ki zotmem zot inn inventé. Beaucoup pou prosterne devant bann zimages ki pourtant péna la vie. Éna ki glorifié bann organisations, bann philosophies matérialiste, ou-soit zot propre désirs. Et mem si certains prétann servi la Bible, zot pa pé honore nom celui ki la Bible identifié couma “vrai Bondié.”—Deutéronome 4:35.
Le Créateur dire concernant Limem: “Moi mo Jéhovah. C’est sa mo nom.” (Isaïe 42:5, 8) Sa nom-la aparette plus ki 7,000 fois dans la Bible, dans so bann langues original. Jésus ti enseigne so bann disciples pou prié: “Nou Papa ki dans le ciel, ki to nom sanctifié.”—Matthieu 6:9.
Ki qualité personnalité vrai Bondié éna? Li dire ki Li “éna la miséricorde ek compassion, [Li] pa en colère vite, et [Li] rempli ar bonté de coeur ek la vérité.” Et Li pa pou manqué pou puni bann ki désobéir so bann commandements volontairement. (Exode 34:6, 7) Kan nou examine façon ki Bondié finn agir avec bann dimoune toute longue l’histoire, nou trouvé ki vrémem Bondié éna sa bann qualités-la.
Nou bizin sanctifié so nom ek sanctifié aussi personnalité ki éna derrière sa nom-la; oui, nou bizin considère sa couma sacré. En tant ki Créateur ek Souverain l’Univers, Bondié mérite nou l’obéissance ek tou nou l’adoration. Eski ou pé donne Li sa personellement?
[L’encadré/Zimage page 18]
Ki Changements “Nouveau lé-Ciel ek Nouveau la-Terre” Pou Amené?
La terre pou vinn enn Paradis Luc 23:43
Tou nations, tou races, Jean 13:35;
tou langues pou vive couma Révélation 7:9, 10
enn seul famille dans l’amour
Pou éna la paix partout lor la terre Psaume 37:10, 11;
ek enn vrai sécurité pou tou dimoune Mika 4:3, 4
Sakenn pou faire enn travail Isaïe 25:6;
ki donne satisfaction; pou éna Isaïe 65:17, 21-23
mangé en abondance
Maladie, tristesse, ek la mort Isaïe 25:8;
pou éliminé Révélation 21:1, 4
Le monde pou uni dans l’adoration Révélation 15:3, 4
vrai Bondié
[L’encadré/Zimage page 19]
Eski Ou Pou Gagne Sa Bann Bénédictions-La?
Bondié pa kapav koz menti!—Tite 1:2.
Jéhovah dire: “[Mo] parole . . . pa pou retourne vers moi sans résultat, mais li pou vrémem réalise séki mo oulé, et sans faute li pou réussi tou séki mo envoye li faire.”—Isaïe 55:11.
Jéhovah pé déjà crée “nouveau lé-ciel ek enn nouveau la-terre.” Gouvernement ki Li finn établi dans le ciel, finn fini commence régné. Li’nn fini pose base enn “nouveau la-terre.”
Après ki li fini mentionne bann kitsoz extraordinaire ki l’humanité pou bénéficié grâce à “nouveau lé-ciel ek nouveau la-terre,” Révélation cite bann paroles Bondié, nou Souverain l’Univers: “Guetté! Mo pé faire tou kitsoz vinn nouveau.” Li ajouté: “Écrire, parski sa bann paroles-la zot fidèle ek vrai.”—Révélation 21:1, 5.
Question capital ki nou bizin pose nou asterlà, c’est: Eski nou pé faire bann changements nécessaire pou nou mérite enn place dans sa “nouveau la-terre” ki pou dirigé par “nouveau lé-ciel”?