Eski U Ena enn Lespri ki Zame Pa Mor?

ESKI ena lavi apre lamor? Pandan plizir milye banane, sa kestyon la finn met bann dimunn dan konfizyon. Pandan bann lepok ki finn traverse, dan tu sosyete bann dimunn finn reflesi lor sa size la ek alafin, zot finn aksepte diferan krwayans.

Buku dimunn krwar dan enn “lespri” ki kontiyn viv apre lamor. Kan enn dimunn mor, eski vremem ena enn kitsoz dan dimunn la ki kit so lekor ek ki kontiyn viv? Ki ete lespri ki dan enn dimunn vivan? Ki ariv lespri kan nu mor? Labib, Parol ki Bondye finn fer ekrir, donn bann repons vre ek bann repons ki satisfer nu.

Ki Ete Lespri?

Dan Labib, bann mo ki finn servi pu “lespri” vedir sirtu “lesuf.” Me, sa mo la vedir plis ki pran lesuf, uswa respire. Par egzanp, ekrivin Labib Zak dir: “Enn lekor san lespri, li mor.” (Zak 2:26) Donk, lespri mem ki gard lekor enn dimunn vivan.

Sa lafors ki gard enn lekor vivan la pa kapav zis lesuf, uswa ler ki rant dan pumon enn dimunn. Kifer? Parski mem kan enn dimunn aret respire, bann selil so lekor kontiyn viv pandan enn tipe letan—“pu ankor detrwa minit,” dapre The World Book Encyclopedia. Akoz sa, li posib ranim enn dimunn ki finn perdi konesans, ek fer transplantasyon bann organn enn dimunn dan lekor enn lot dimunn. Me, kan nepli ena lafors lavi, uswa lespri dan bann selil enn lekor, pa kapav fer nanyin pu fer lekor la reviv. Tu lesuf ki kapav ena dan lemond pa pu kapav fer reviv mem enn selil. Donk, lespri li lafors lavi invizib—enn ti laflam lavi—ki gard bann selil vivan. Sa lafors lavi la kontiyn egziste grasa respirasyon.—Zob 34:14, 15.

Eski sa lespri la azir zis dan bann dimunn? Labib permet nu tir enn meyer konklizyon lor la. Saz Lerwa Salomon ti ekrir: “Kisannla laba ki konn lespri bann garson bann imin, si li pe mont lao, ek lespri zanimo, si li pe desann anba ver later?” (Eklezyast 3:21) Alor, Labib montre ki bann dimunn ek bann zanimo, zot tulede ena enn lespri. Kuma eski sa posib?

Nu kapav konpar lespri, uswa lafors lavi, kuma kuran ki travers dan enn masinn, uswa enn laparey. Sa kuran invizib la kapav fer diferan kitsoz, tu depann ki kalite laparey li fer marse. Par egzanp, enn fur elektrik donn saler, enn ordinater travay bann informasyon ki li gayne, ek li fer bann kalkil, ek enn televizyon donn zimaz ek son. Me, zame kuran pa pu vinn kuma sa laparey ki li fer fonksyone la. Li res tu sinpleman enn lafors. Pareyman, lafors lavi pa pran form sa kreatir ki li fer viv la. Li pena okenn personalite, ni okenn kapasite pu reflesi. Bann dimunn ek bann zanimo zot tulede “ena mem lespri.” (Eklezyast 3:19) Donk, kan enn dimunn mor, so lespri pa kontiyn egziste dan enn lot lemond kuma enn kreatir spirityel.

Alor, ki kondisyon enn dimunn mor? Ek ki arive ar lespri kan enn dimunn mor?

“To Pu Return dan Lapusyer”

Kan premye zom, Adan ti dezobeir volonterman komannman Bondye, Zeova ti dir li: “Avek laswer lor to figir, to pu bizin manz dipin ziska ki to return dan later, parski dan later mem ki to sorti. Parski to lapusyer, to pu return dan lapusyer.” (Zenez 3:19) Kot Adan ti ete avan ki Zeova finn kre li dan lapusyer? Be, li pa ti okenn plas! Li pa ti egziste, tu sinpleman. Donk, kan Bondye Zeova ti dir ki Adan pu “return dan lapusyer,” Li ti rod dir ki Adan ti pu mor. Adan pa finn al dan lemond lespri. Kan li ti pu mor, li ti pu revinn enn kreatir san lavi, ki pa egziste. So pinisyon ti lamor—enn kondisyon kot pena lavi—me pa enn transfer dan enn lot lemond.—Romin 6:23.

Ki nu kapav dir lor bann lezot ki finn mor? Eklezyast 9:5, 10 explik klerman kondisyon bann mor. Li dir: “Bann mor pa konn nanyin . . . Pa kapav azir, pa kapav zize, pena ni konesans ni sazes, la kot bann mor ete, la kot twa usi, to pu ale.” (La Bible en Français Courant) Alor, lamor li enn kondisyon kot nanyin pa egziste. Ekrivin bann psom finn ekrir ki kan enn dimunn mor, “so lespri sorti, li return dan so later; sa zur la mem so bann panse fini net.”—Psom 146:4.

Li kler ki bann mor zot inkonsyan, ek zot pa kapav fer nanyin. Zot pa konn nanyin. Zot pa kapav truv u, tann u, uswa koz ar u. Zot pa kapav ed u, ni fer u ditor. U pena okenn rezon pu per bann mor. Me, kuma eski lespri “sorti” kan enn dimunn mor?

Lespri “Return ar Vre Bondye”

Labib dir ki kan enn dimunn mor, “lespri return ar vre Bondye ki ti donn sa.” (Eklezyast 12:7) Eski sa vedir ki vremem enn lespri vivan kit lekor ek vwayaz atraver lespas pu al kot Bondye? Non! Kan Labib servi mo “return,” li pa vedir enn muvman, setadir sorti enn plas pu al enn lot plas. Par egzanp, Bondye ti dir bann Izraelit ki pa ti fidel: “‘Return ar mwa, ek mo pu return ar zot,’ ala seki Zeova bann larme finn dir.” (Malaki 3:7) Pu Izrael, “return” ar Zeova ti vedir aret zot move kondwit, ek reviv an akor avek simin drwat Bondye. Ek pu Zeova, “return” ar Izrael ti vedir ki Li ti pu repran so pep kont. Dan tulede ka, ‘returne’ konsern enn latitid, pa enn vre deplasman, setadir sorti enn plas pu al enn lot plas.

Pareyman, kan lespri “return” ar Bondye letan enn dimunn mor, pena okenn deplasman depi later ziska lesyel. Pa bliye, lespri sa mem lafors lavi. Kan sa kit enn dimunn, zis Bondye ki kapav redonn dimunn la sa lafors la. Donk, kan Labib dir ki “lespri return ar vre Bondye,” sa vedir ki lespwar pu ki sa dimunn la reviv depann zis lor Bondye.

Get par egzanp seki Labib dir lor lamor Zezi. Lik, ekrivin enn Levanzil rakonte: “Zezi finn apel [so Papa] avek enn lavwa for ek li finn dir: ‘Papa, mo remet mo lespri dan to lamin.’ Kan li finn fini dir sa, li finn mor.” (Lik 23:46) Kan so lespri finn kit li, Zezi pa ti pe al dan lesyel. Zezi finn resisite trwazyem zur apre so lamor. Ek 40 zur apre, li finn mont dan lesyel. (Akt 1:3, 9) Selman, moman so lamor, Zezi finn remet so lespri dan lamin so Papa, parski li ti ena ful konfyans ki Zeova pu kapav redonn li lavi.

Wi, zis Bondye ki kapav redonn enn dimunn lavi. (Psom 104:30) Vremem, sa uver bann gran-gran posibilite pu nu!

Enn Lespwar Sir

Labib dir: “Ler pe vini kot tu bann ki dan bann tom suvenir pu tann lavwa [Zezi] ek zot pu sorti.” (Zan 5:28, 29) Wi, Zezi Kris ti promet ki tu bann ki dan memwar Zeova pu resisite, uswa pu regayn lavi. Olye ki nu tann bann nuvel lamor tris, nu pu tann bann rapor zwaye lor bann dimunn ki finn resisite. Li pu vremem enn gran lazwa pu akeyir bann pros ki pu sorti dan tom!

Eski u ti pu kontan gayn plis ranseyman pu kone kuma u kapav profit sa lespwar ki Bondye finn donn nu la? Nu invit u pu ekrir lor enn sa bann ladres anba la pu u gayn enn kopi brosir Ki Bondye Pe Demann Nu?

Amwin deza indike, tu bann tex Labib ki site finn tradir depi New World Translation of the Holy Scriptures.