Leson 9

Bann serviteur Bondié bizin pur

Kifer nou bizin pur dan tou kitsoz? (1)

Ki vedir ena bann croyance religieux ki pur? (2) ena enn conduite pur? (3) ena bann pensée pur? (4) ena enn lekor ek l’entourage prop? (5)

Ki qualité langage malprop nou bizin pa servi? (6)

1. Jéhovah Li enn Bondié ki pur ek saint. Li attann ki so bann serviteur aussi ena bann croyance religieux ki pur, enn conduite pur, bann pensée pur, ek ki zot garde aussi zot lekor ek zot l’entourage prop. (1 Pierre 1:16) Nou bizin faire beaucoup zeffort pou reste pur devant lizié Bondié. Nou pé vive dan enn lé-monde malprop. Nou bizin aussi lutte kont nou prop l’envie pou faire bann kitsoz mauvais. Mais fodé pa nou baisse lé-bras.

2. Bann croyance religieux ki pur: Si nou envie servi Jéhovah, nou pa kapav contigne suive n’importe ki l’enseignement ou-soit garde n’importe ki coutume ki sorti dan fausse religion. Nou bizin quitte fausse religion net ek pa soutenir li ditou. (2 Corinthiens 6:14-18; Révélation 18:4) Enn fois ki nou finn aprann la verité lor Bondié, nou bizin faire attention pou pa laisse dimoune embete nou par bann fausse l’enseignement.—2 Jean 10, 11.

3. Enn conduite pur: Jéhovah envie ki bann ki adore Li agir touletan couma bann vrai chrétien. (1 Pierre 2:12) Li trouve tou seki nou faire, mem seki nou faire en cachiette. (Hébreux 4:13) Nou bizin rejette bann mauvais conduite sexuel ek bann lezot pratik malprop sa lé-monde-la.—1 Corinthiens 6:9-11.

4. Bann pensée pur: Si nou rempli nou l’esprit avek bann pensée pur, nou conduite aussi pou pur. (Philippiens 4:8) Mais si nou arrete nou l’esprit lor bann kitsoz malprop, nou pou faire bann kitsoz ki pa bon. (Matthieu 15:18-20) Nou bizin rejette bann divertissement ki kapav gate nou l’esprit. Nou kapav rempli nou l’esprit avek bann bon pensée kan nou etudié Parole Bondié.

5. Lekor ek l’entourage prop: Parski zot represente Bondié, bann chrétien bizin garde zot lekor ek zot linge prop. Nou bizin lave nou la-main apré ki nou sorti toilette, ek avant ki nou mangé ou-soit trappe mangé. Si ou pena enn bon system drainage, ou bizin enterre bann malpropté. (Deutéronome 23:12, 13) Kan nou garde nou lekor ek nou l’entourage prop, sa pou aide nou pou ena enn pli bon la-santé. Lakaz enn chrétien, endan ek dehors, bizin prop ek en ordre. Dan l’endroit kot li resté, li bizin enn bon l’exemple pou lezot.

6. Enn langage prop: Bann serviteur Bondié bizin touletan dire la verité. Bann menteur pa pou rente dan Royaume Bondié. (Éphésiens 4:25; Révélation 21:8) Bann chrétien pa zouré. Zot pa raconte ek zot pa ecoute bann joke sale ek bann zistoire malprop. Ki zot dan lekol, dan travail, ou-soit dan zot voisinage, zot montré par zot langage prop ki zot pa pareil couma lezot.—Éphésiens 4:29, 31; 5:3.

[Zimage, page 19]

Bann serviteur Bondié bizin pur dan tou kitsoz