Leson 1

Couma nou kapav koné ki Bondié pé demann nou faire

Ki bann renseignement important ena dan la Bible? (1)

Kisannla finn faire ecrire la Bible? (2)

Kifer ou bizin etudié la Bible? (3)

1. Bondié finn donne nou enn cadeau ki ena beaucoup valeur: La Bible. Li couma enn lettre ki enn bon papa finn ecrire so bann zenfant. Li faire nou konn la verité lor Bondié—kisannla Li été ek ki so bann principe. Li explik nou couma nou kapav faire face ar nou bann problem ek couma nou kapav trouve vrai bonheur. Zis la Bible ki dire nou ki nou bizin faire pou faire Bondié plaisir.—Psaume 1:1-3; Isaïe 48:17, 18.

2. La Bible finn ecrire par apepré 40 zom. Zot ti commence ecrire la Bible en 1513 avant nou lepok, ek sa travail-la ti fini 1,600 an apré. La Bible divisé en 66 ti livre. Sa bann dimoune ki finn ecrire la Bible-la ti guidé par l’esprit Bondié. Zot pa finn ecrire zot prop pensée, mais zot finn ecrire pensée Bondié. Alors, pa enn dimoune lor la terre ki finn faire ecrire la Bible mais plutot Bondié ki dan le ciel ki finn faire ecrire sa.—2 Timothée 3:16, 17; 2 Pierre 1:20, 21.

3. Bondié finn veillé ki bann dimoune copié la Bible exact pou exact ek ki zot preserve li bien. Pena okenn lot livre a part la Bible ki finn imprimé sa quantité-la. Pa tou dimoune ki pou content trouve ou etudié la Bible, mais fodé pa ki sa decourage ou. Pou ki ou gagne la vie eternel, ou bizin contigne aprann konn Bondié ek faire so volonté, mem si certain pou rod empeche ou faire sa.—Matthieu 5:10-12; Jean 17:3.