Zistwar 67

Yehoshaphat Fer Jéhovah Konfians

ESKI to kone kisannla sa bann zom-la ek ki zot pe fer? Zot pe al lager ek bann zom ki devan zot se bann santer. Me kitfwa to pe demann twa: ‘Be kifer bann santer-la pena lepe ek lans avek zot?’ Anou get sa.

Yehoshaphat limem lerwa rwayom de tribi Israël. Li viv dan mem lepok ki Lerwa Ahab ek Jézabel ki dan rwayom lenor, rwayom dis tribi. Me Yehoshaphat enn bon lerwa ek so papa Asa osi ti enn bon lerwa. Alor, pandan plizir lane lepep ki dan rwayom lesid, rwayom de tribi, ti pe viv bien.

Me asterla enn kitsoz fer lepep per. Bann mesaze dir Yehoshaphat: ‘Enn gran larme ki sorti dan pei Moab, Ammôn ek montagn Séïr pe vinn atak twa.’ Boukou Izraelit rasanble dan Jérusalem pou rod led Jéhovah. Zot al dan tanp ek la Yehoshaphat priye: ‘A Jéhovah nou Bondie, nou pa kone ki pou fer. Nou feb devan sa gran larme-la. Nou kont lor twa pou ed nou.’

Jéhovah ekoute, ek Li fer enn So bann serviter dir lepep: ‘Sa lager-la pa pou zot me pou Jéhovah. Zot pa pou bizin lager. Zis gete ek trouve kouma Jéhovah pou sov zot.’

Landemin gramatin Yehoshaphat dir lepep: ‘Fer Jéhovah konfians!’ Li met bann santer devan so bann solda, ek amezir ki zot marse zot pe sante pou donn Jéhovah laglwar. To kone ki arive kan zot pre pou ariv dan landrwa kot pou lager? Jéhovah fer bann lennmi lager ant zotmem. Ek kan bann Izraelit arive, tou bann solda lennmi inn mor!

Eski Yehoshaphat pa finn azir avek sazes kan li’nn fer Jéhovah konfians? Nou osi nou pou montre ki nou saz si nou fer Li konfians.

1 Rois 22:41-53; 2 Chroniques 20:1-30.