Eski To Ti Kone?

Dan Zerizalem, kan bann pret ti sakrifie bann zanimo dan tanp, ki ti ariv disan sa bann zanimo-la?

DAN Izrael, sak lane bann pret ti sakrifie plizir milye zanimo lor lotel kot fer bann sakrifis dan tanp. Zozef, enn istorien zwif, inn ekrir ki bann pret ti sakrifie plis ki 250,000 agno zour ki ti selebre Pak. Alor, ti ena boukou disan ki ti pe koule lor lotel. (Lev. 1:10, 11; Nonb 28:16, 19) Kotsa tou sa disan-la ti ale?

Bann arkeolog ti fer bann lafouy otour tanp ki ti existe dan lepok Zezi. Zot ti dekouver enn gran sistem drin ki bann pret ti pe servi pou fer disan bann zanimo ale.

Anou get de kitsoz ki ti form parti sa sistem drin la:

• Bann trou anba lotel kot fer bann sakrifis: Mishna, enn vie liv ki’nn ekrir apre lane 200 Nou Lepok ek kot ena bann lalwa ek bann tradision zwif, dekrir enn sistem drin ki ti servi pou lotel kot fer bann sakrifis. Liv-la explike ki ti ena de trou dan enn kwin lotel-la. Disan bann zanimo ek delo ki ti servi pou netway lotel-la, ti pas par sa bann trou-la ek ti tom dan enn kanal ki ti al ziska Vale Kidronn.

  Bann arkeolog dakor ar seki’nn ekrir dan Mishna. Liv The Cambridge History of Judaism dir ki’nn dekouver “enn gran sistem drin” pre kot tanp. Sa liv-la dir: “Sirman ti servi sa [sistem drin la] pou fer delo ek disan bann zanimo ale.”

• Enn bon sistem pou larive delo: Bann pret ti bizin boukou delo pou lav sali kot lotel ti ete, pou ki sa disan-la pas par sa bann trou-la ek tom dan kanal-la. Pou ki zot kapav fer sa travay inportan la, bann pret ti touletan gagn delo ki zot ti bizin depi lavil. Sa delo-la ti vinn ziska lotel gras-a bann kanal ek bann lezot metod. Joseph Patrich, enn arkeolog, dir ki kitfwa okenn lezot tanp dan sa lepok-la pa ti ena enn sistem pou larive delo ek enn sistem drin koumsa.