“Pardonn Bann Pese ki Bann Dimounn Ti Fer dan Lepase”

Se zis gras-a sakrifis Zezi ki nou kapav gagn pardon nou bann pese. (Efe. 1:7) Selman, Labib dir: “Dan so tolerans [Bondie] ti pe pardonn bann pese ki bann dimounn ti fer dan lepase,” setadir avan ki Zezi donn so lavi kouma enn ranson. (Rom. 3:25, not.) Kouma Zeova ti kapav pardonn bann pese, avan mem ki Zezi donn so lavi an sakrifis? Eski sa li an-akor ar So lazistis?

Zeova ti promet ki enn “desandans” ti pou sov tou bann dimounn ki ti pou ena lafwa dan Li ek dan so bann promes. (Zen. 3:15; 22:18) Ek kan Li ti fer sa promes-la, se koumadir ti fini pey laranson. Zeova ti sir ki so Garson ti pou aksepte donn so lavi an ranson dan moman ki Li ti fixe. (Gal. 4:4; Ebre 10:7-10) Kan li ti lor later, Zezi ti ena pouvwar pou pardonn bann pese, avan mem ki li donn so lavi an ranson. Zezi ti kapav pardonn pese bann dimounn ki ti ena lafwa, parski li ti kone ki so sakrifis ti pou pardonn zot pese.—Mat. 9:2-6.