Ena Konfians ki Nou Pou Sape kan Lafin Sa Lemond-La Vini

Biento Zeova pou aret montre pasians anver sa lemond-la. Fos relizion pou detrir. Bann nasion pou zwenn ansam pou atak pep Bondie ek Zeova pou detrir bann move dimounn pandan Armagedon. Bann Kretien pe atann pou viv sa bann moman inportan la.

Biensir, nou pa konn dan tou ti detay kouma gran detres pou pase. Par exanp, nou pa kone exakteman kan li pou koumanse. Nou pa kone ki rezon bann gouvernman pou done pou explike kifer zot pe atak bann relizion. Nou pa kone pou komie letan sa latak lor pep Bondie la pou dire ek kouma sa pou ete. Nou pa kone exakteman ki bann kitsoz Zeova pou servi pou detrir bann move dimounn pandan Armagedon.

Me selman, Labib donn nou tou bann linformasion ki nou bizin pou nou fer fas ar lavenir avek kouraz ek konfians. Par exanp, nou kone ki nou pe viv lafin “bann dernie tan.” (2Tim 3:1) Nou kone ki sa latak lor relizion la pou rakoursi pou ki vre relizion pa detrir. (Mt 24:22) Nou kone ki Zeova pou delivre so pep. (2Pi 2:9) Ek nou kone ki sa Kikenn ki Zeova inn swazir pou detrir bann move dimounn ek pou protez gran lafoul pandan Armagedon, li kontan lazistis ek li ena enn gran pouvwar.​—Rev 19:11, 15, 16.

Sirman bann levennman ki pou arive dan lavenir pou fer bann dimounn “tom sek telman zot gagn per.” Me selman, kan nou lir ek medit lor fason ki Zeova ti delivre so pep dan lepase ek lor seki Li’nn dir Li pou fer dan lavenir, nou kapav ‘dres nou ek lev nou latet’ parski nou sir ki nou delivrans pe koste.​—Lk 21:26, 28.