Anou Ena Lobzektif pou Fer Bann Disip
1. Ki nou bizin fer pou ki bann dimounn gagn lavi sov?
1 Rapor mondial pou lane servis 2014 montre ki bann serviter Bondie bien zele ek determine pou pres bon nouvel lor Rwayom Bondie. (Mat. 24:14) Atraver predikasion lakaz-lakaz, bann kanpagn spesial pou distribie bann trak ek bann linvitasion, ek temwaniaz an piblik, nou pe reisi partaz mesaz ki ena dan Labib ar pli boukou dimounn ki avan. Selman, pou ki bann dimounn kapav gagn lavi sov, nou bizin ed zot pou vinn bann disip Zezi kan nou etidie Labib avek zot.—1 Tim. 2:4.
2. Ki bann kestion nou kapav poze pou nou touletan pre pou koumans enn letid Labib?
2 Anou Touletan Pre pou Koumans enn Letid Labib: Kan enn dimounn montre lintere, eski ou fer tou seki ou kapav pou gagn bann ransegnman lor li ek apre, ou pa tarde pou revizit li ek koumans enn letid Labib avek li? Kan dernie fwa ou finn montre enn dimounn kouma enn letid Labib deroule premie fwa ki ou’nn zwenn li? Kan dernie fwa ou finn propoz enn letid Labib ar bann dimounn ki pran peryodik avek ou regilierman? Eski ou finn montre video Kifer Li Bon Etidie Labib? ek Kouma enn Letid Labib Deroule? ar ou bann koleg travay, kamarad lekol, vwazin, fami ek lezot konesans? Kan ou servi prezantwar ouswa latab expozision, eski ou fer zefor pou inform bann ki pran enn piblikasion ki servi pou fer letid, ki zot kapav gagn enn letid Labib gratis baze lor sa piblikasion-la?
3. Pou nou kapav ansegn bien laverite, ki nou bizin?
3 Zeova ek Zezi Ed Nou: Kan Zezi ti donn nou lord pou “fer bann disip,” li ti dir “ale,” pou montre ki nou bizin fer bann zefor ek pran linisiativ. Selman, li pa finn les nou koumsa mem, me li ti promet ki li pou avek nou. (Mat. 28:19, 20, NW.) Anplis, Zeova finn donn nou so lespri sin, bann zouti ek enn formasion ki nou bizin pou ansegn bann dimounn laverite. (Zek. 4:6; 2 Kor. 4:7) Nou kapav priye pou nou ena “dezir ek kapasite” pou partisip dan sa laktivite inportan-la.—Fil. 2:13, NW.
4. Kifer nou bizin ena lobzektif pou fer bann disip?
4 Kan nou pres bon nouvel, sa fer nou ere. Selman, nou lazwa ogmante kan nou ansegn enn dimounn laverite ek ed li pou vinn avek nou lor “semin ki amenn ver lavi.” (Mat. 7:14, NW; 1 Tes. 2:19, 20) Ek seki pli inportan se: kan nou ena lobzektif pou fer bann disip, nou fer plezir Zeova ki “pa anvi ki personn mor, me Li anvi ki tou dimounn repanti.”—2 Pier 3:9, NW.