Kondir Bann Letid Labib Efikas
1. Ki responsabilite bann proklamater ki kondir bann letid Labib ena?
1 Personn pa kapav servi Bondie, amwin ki Jéhovah “atir li.” (Jean 6:44) Kanmem, bann proklamater ki kondir bann letid Labib bizin fer zot par pou ed bann dimounn pou vinn pli pros ar Jéhovah, nou Papa ki dan lesiel. (Jacq. 4:8) Sa demann preparasion. Li pa ase ki nou zis lir sak paragraf ek apre poz kestion ki ena dan liv pou ed nou bann etidian konpran mesaz ki ena dan Labib ek fer bann progre.
2. Ki rezilta nou pou gagne si nou kondir enn letid Labib dan enn fason efikas?
2 Pou zot kapav kondir bann letid efikas, bann proklamater bizin ed zot bann letid pou (1) konpran seki Labib ansegne, (2) aksepte seki Labib ansegne, ek (3) met an pratik seki Labib ansegne. (Jean 3:16; 17:3; Jacq. 2:26) Sa kapav pran plizir mwa pou ed enn dimounn fer tousala. Selman, sak letap se enn pa inportan pou li devlop bann bon relasion avek Jéhovah ek pou li voue so lavi ar Li.
3. Kifer bann ansegnan efikas poz bann kestion pou konn lopinion zot etidian?
3 Ki Etidian Labib la Panse?: Pou nou kone si nou etidian Labib konpran ek aksepte seki li pe aprann, evit koz tou oumem ek ankouraz li pou exprim li. (Jacq. 1:19) Eski li konpran seki Labib dir lor size ki zot pe examine? Eski li kapav explik sa dan so prop mo? Ki li panse lor seki li pe aprann? Eski li krwar ki seki Labib ansegne rezonab? (1 Thess. 2:13) Eski li konpran ki seki li pe aprann bizin ena enn linflians lor so lavi? (Col. 3:10) Pou nou kone ki li panse, nou bizin poz li bann kestion avek takt. Apre, nou bizin ekout li.—Mat. 16:13-16.
4. Ki nou bizin fer si enn etidian pe gagn difikilte pou konpran ouswa pou met an pratik seki li pe aprann dan Labib?
4 Souvan, bann labitid ek bann fason panse enn dimounn inn bien anrasine dan so leker, ek sa pran letan pou ki li sanze. (2 Cor. 10:5) Ki nou pou fer si nou etidian pa aksepte ouswa pa met an pratik seki li pe aprann? Nou bizin ena pasians ek donn li ase letan pou ki Parol Bondie ek lespri sin azir lor so leker. (1 Cor. 3:6, 7; Héb. 4:12) Si enn etidian pe gagn difikilte pou konpran ouswa pou aplik enn lansegnman Biblik, olie ki nou met presion lor li, li pou pli bon ki nou examinn enn lot size. Amezir ki nou kontign ansegn li Labib avek pasians ek lamour, kitfwa avek letan li pou fer bann sanzman ki bizin.