Suive l’Exemple Bann Prophete—Yona
1. Ki bann bon qualité Yona ti ena?
1 Ki vinn dan ou l’esprit kan ou pense prophete Yona? Certain kapav considere li couma enn capon ou-soit enn kikenn ki ti ena enn leker dur. Mais Yona ti montré dan enn fason clair ki li ti ena l’humilité, courage, ek enn l’esprit sacrifice. Couma nou kapav “suive l’exemple” Yona ek manifesté so bann bon qualité?—Jacq. 5:10.
2. Couma eski nou kapav imite l’humilité Yona?
2 L’Humilité: Au commencement, Yona pa ti al dan territoire ki Jéhovah ti dire li, mais li ti sauvé pou al dan enn lot direction. Sa pa etonne nou, parski ti konn bann Assyrien couma bann dimoune violent, ek avek le temps ti appel Ninive “la ville ki verse di-sang.” (Nah. 3:1-3) Kan mem sa, Jéhovah ti discipline Yona, ek Yona ti manifesté l’humilité. Kan Jéhovah ti donne li enn deuxieme chance, li ti accepté mission ki li ti gagné. (Prov. 24:32; Yona 3:1-3) Mem si li ti sauvé au commencement, li ti faire volonté Jéhovah. (Mat. 21:28-31) Eski nou’si nou determiné pou preche la bonne nouvelle, mem si nou gagne enn discipline ou-soit nou ena enn territoire difisil?
3. Dan ki bann domaine nou ministere nou bizin courage ek enn l’esprit sacrifice?
3 Courage ek l’Esprit Sacrifice: Kan Yona ti realisé ki so mauvais decision ti mette lavi bann marin en danger, li ti pré pou sacrifié so lavi pou zot. (Yona 1:3, 4, 12) Plitar, kan li ti pé rempli so mission dan Ninive, li ti al ziska dan centre sa la ville-la, kitfois pou rod enn l’endroit approprié pou annonce jugement Jéhovah. Seki Yona inn faire, montré ki li pa ti enn capon, mais plutot enn prophete Bondié ki ti ena courage! (Yona 3:3, 4) Ki nou kapav dire lor nou azordi? Nou aussi nou bizin courage ki Bondié donné pou rann temoignage kan nou gagne l’opposition. (Actes 4:29, 31) Pou nou kapav donne nou le temps ek seki nou ena, dan nou ministere, nou bizin ena enn l’esprit sacrifice.—Actes 20:24.
4. Kifer nou bizin prend le temps pou medite lor bon l’exemple ki bann prophete Jéhovah inn laissé?
4 Chaque fois ki ou lire enn recit lor enn parmi bann prophete Jéhovah, ou pou tire profit si ou imagine-ou-mem dan sa bann situation-la. Demann-ou-mem: ‘Couma mo ti pou reagir? Couma mo kapav imite so bann bon qualité dan mo lavi?’ (Héb. 6:11, 12) Dan lavenir, pou ena ankor lartik dan Ministere du Royaume ki pou examine lezot leson important ki nou kapav aprann ar bann fidele prophete Jéhovah.