Ki ‘raison ou ena pou glorifié-ou-mem’?
1. Ki raison nou ena pou glorifié-nou-mem kan arrive la fin du mois?
1 Kan arrive la fin du mois ek nou bizin remette nou rapport, ki ‘raison nou ena pou glorifié-nou’? (Gal. 6:4) Ki nou enn pionnier special ki remette enn rapport 130 heure temps dan nou ministere ou-soit enn proclamateur ki ena l’autorisation pou faire zis 15 minute, sakenn parmi nou bizin ena la joie ki li finn kapav donne Jéhovah enn service avek tou so leker.—Ps. 100:2.
2. Kifer nou bizin faire tou seki nou kapav dan service Jéhovah?
2 En tant ki Souverain Seigneur l’univers, Jéhovah merité ki nou donne Li seki pli bon. (Mal. 1:6) Nou finn voué nou la vie pou faire so volonté parski nou content Li. Alors, kan arrive la fin la journée ou-soit la fin du mois, si nou sur ki nou finn donne Jéhovah “bann premier recolte” nou le temps, nou talent, ek nou la force dan so service, lerla personnellement nou pou ena raison pou glorifié-nou-mem. (Prov. 3:9) Mais, si nou conscience reproche nou, nou bizin guetté ki nou kapav faire pou amelioré.—Rom. 2:15.
3. Kifer li pa sage pou compare-nou-mem ar lezot?
3 ‘Sans ki nou compare-nou avek enn lot’: Li pa sage pou compare-nou-mem ar lezot ou-soit ar nou-mem kan enn certaine lepok nou ti ena plus la force. Bann situation changé. Tou dimoune pena mem capacité. Souvent bann comparaison crée competition ou-soit enn sentiment ki nou pa vaut nanyé. (Gal. 5:26; 6:4) Jésus pa ti faire bann comparaison. Au contraire, li ti felicite enn dimoune pou seki li ti kapav faire.—Marc 14:6-9.
4. Ki bann leson bien important nou kapav aprann ar parabole Jésus lor bann talent?
4 Dan parabole Jésus lor bann talent, chaque travailleur ti gagne bann talent “dapré so capacité.” (Mat. 25:15) Kan zot maitre ti retourné ek ti demann enn rapport lor zot travail, bann ki ti travail dur dapré zot capacité ek zot situation ti gagne bann felicitation ek ti partage la joie zot maitre. (Mat. 25:21, 23) A mesure ki nou aussi nou reste occupé dan travail predication lor Royaume Bondié, nou kapav sur ki nou pou gagne faveur Bondié ek ki nou pou ena raison pou glorifié-nou-mem!