Question Ki’nn Soulevé

◼ Ki kitsoz merite nou l’attention si nou envie ki enn partie ou-soit tou nou bann di-bien al pou l’organisation Jéhovah apré nou la mort?

Kan bann dimoune mort, zot nepli ena controle lor zot bann di-bien materiel. (Eccl. 9:5, 6) A cause sa-mem, beaucoup faire enn testament bien en avance kot zot expliké couma zot ti pou content ki partage zot bann di-bien. (2 Rois 20:1) En general sa document-la precise bien kisannla dimoune-la inn choisir couma so administrateur di-bien, setadir dimoune ki pou occupe so bann di-bien apré so la mort. Si pa faire sa document-la, dan beaucoup pays c’est bann l’autorité ki decidé couma pou partage bann di-bien sa dimoune ki’nn mort-la. Alors, si nou ena bann volonté precis concernant nou bann di-bien, couma par exemple si nou envie donne enn partie ou-soit tou nou bann di-bien l’organisation Jéhovah, li important ki nou faire enn document coumsa ki precise sa ek ki dire aussi kisannla pou agir couma nou administrateur di-bien.

Sa administrateur di-bien-la ena enn grand responsabilité. Dependant quantité di-bien ki ena, kitfois li pou bizin rente dan beaucoup ti detail pou rassemblé sa bann di-bien-la ek partage zot, ek sa kapav demann-li beaucoup le temps. En plus, bann l’autorité souvent ena bann l’instruction ki nou bizin suive. Pa tou bann membre congregation ki pou enn bon administrateur di-bien. Sa dimoune ki nou pou choisir-la bizin enn dimoune ki ena bann capacité ki bizin, ki nou kapav faire confiance, ek ki disposé pou respecté nou volonté.​—Guette lartik “ Préparer sa succession : une mesure sage, ” dan Réveillez-vous ! 8 décembre 1998.

Si demann ou pou vinn enn administrateur di-bien: Avant tou, reflechi bien lor seki tousala impliké ek dan la priere guette bien si ou pou kapav assume sa responsabilité-la. (Luc 14:28-32) Apré ki dimoune-la mort, en tant ki so administrateur di-bien, ou pou bizin informe tou bann heritier. Lerla enn fois ki ou pou gagne droit faire sa, li pou ou responsabilité pou partage bann di-bien sa dimoune-la en accord avek la loi ek exactement couma inn ecrire dan so testament. Ou bizin comprend ki mem si li ena beaucoup di-bien ou-soit tigit, ou bizin partage bann di-bien-la couma li, li ti envie. N’importe ki don ki enn dimoune offert enn parmi bann association officiel bann Témoins de Jéhovah, c’est enn fond ki vinn pou l’organisation Jéhovah.​—Luc 16:10; 21:1-4.