Jamais nou prend off
1. Couma nou koné ki bann predicateur dan premier siecle jamais ti pensé ki ena fois zot ti off?
1 Bann predicateur zelé dan premier siecle ti annonce la bonne nouvelle “sans arreté” partout kot zot ti joinde bann dimoune. (Actes 5:42) Alors, nou pa kapav mazinn zot pé preché lakaz par lakaz sans ki zot rann temoignage aussi bann dimoune ki ti pé passé lor chemin. Ni nou kapav maziné ki zot ti pou rate enn l’occasion pou rann temoignage informel kan zot ti pé acheté kitsoz dan bazar apré ki zot inn fini predication. Pareil couma Jésus, jamais zot ti pensé ki ti ena bann moment kot zot ti off.—Marc 6:31-34.
2. Ki sa impliké pou vive en accord avek nou nom?
2 Touletan pré: Nou nom, Témoins de Jéhovah, pa zis decrire seki nou faire; li decrire aussi kisannla nou été. (Is. 43:10-12) Alors, nou touletan pré pou defann nou l’esperance mem si nou pa pé preché lakaz par lakaz. (1 Pierre 3:15) Eski ou reflechi a l’avance lor bann situation ki kapav permette ou rann temoignage informel ek ou pense lor seki ou kapav dire? Eski ou garde bann publication avek ou pou donne bann dimoune ki montré l’interet? (Prov. 21:5) Eski ou preche zis lakaz par lakaz ou-soit ou partage la bonne nouvelle avek bann dimoune dan lezot place si situation permette ou?
3. Ki pli bon l’expression pou decrire predication ki nou faire lor chemin, dan bann parking, jardin, bann quartier commercial ek lezot place encore?
3 La voie “publik”: L’apotre Paul ti dire ki li ti preché “en publik” ek lakaz par lakaz. (Actes 20:20) Alors, l’expression la voie “publik” bien approprié pou decrire predication ki nou faire lor chemin, dan bann parking, jardin, bann quartier commercial ek lezot place encore. Li vrai ki predication lakaz par lakaz li reste toujours fason principal ek pli efficace pou faire bann dimoune tann message lor Royaume Bondié. Mais selman, bann predicateur dan premier siecle ti concentré zot lor bann dimoune, pa bann lakaz. Zot ti saisi tou l’occasion pou koz lor la verité—en publik, informel, ek lakaz par lakaz. Ki nou aussi nou ena mem fason pensée pou nou kapav accompli nou ministere a fond!—2 Tim. 4:5.