Eski ou finn reflechi lor service Béthel?

¹ Kifer nou bizin reflechi pou servi dan Béthel? Psaume 110:3 montré nou couma dan dernier jour, bann serviteur Bondié pou porte-zot volontaire. Partout lor la terre, bann serviteur Bondié pé faire tou seki zot kapav pou preche la bonne nouvelle lor so Royaume. Parmi zot, ena bann membre famille Béthel. Nou envie donne zot bann lezot renseignement lor service Béthel pou ki zot pli conscient ki sa service-la represente enn grand privilege ek pou ki zot konn bann besoin ki la filiale ena zordi.

² Plusieurs travail: Bann membre famille Béthel gagne different travail pou faire. Dan Brooklyn, ek dan lezot different filiale, bann frere travail pou produire ek pou envoye bann la Bible, bann livre, bann periodik, bann brochure ek bann tract dan different l’endroit. Certain prend soin ek veillé ki bann l’equipement ek bann batiment reste en bon etat. Sa demann beaucoup travail aussi pou prend soin la famille, couma par exemple prepare repas, lave linge, ek faire lezot kitsoz encore. En plus, bann frere ek soeur ki faire menage garde enn niveau bien elevé concernant la propté ek zot occupe beaucoup lezot travail important.

³ Qualification ek bann condition ki bizin rempli: En ce moment, bizin surtout bann jeune frere celibataire ki en bonne santé, parski pou travail dan Béthel, bizin ena la force. Si enn frere envie rempli enn demande pou rente dan Béthel, li bizin baptisé depuis au moins enn an. Li bizin enn kikenn ki spirituel, disposé pou travail dur, souvent pou faire bann travail manuel. Zordi, dan le monde beaucoup dimoune pensé ki fodé pa faire sa qualité travail-la. C’est pou sa raison-la ki enn dimoune ki envie servi dan Béthel bizin ena nouveau personnalité pou ki li faire enn bon travail avek so la main. (Guette Éphésiens 4:28.) Fodé pa ki c’est enn kikenn ki fixé so l’esprit lor bann plaisir, detente ek divertissement, ek li bizin enn kikenn ki serieux.​—Guette 1 Corinthiens 13:11.

⁴ Eski ou ena entre 19 ek 35 an? Eski ou en bonne santé lor plan physik ek affectif? Eski ou lire ek ou ecrire bien français/anglais, ek aussi créole? Eski ou enn dimoune spirituel? Si appel ou pou travail dan Béthel, eski ou pou reste pou au moins enn an, ek accepté n’importe ki travail ki donne ou? Si ou reponn oui tou sa bann question-la, li bon ki ou reflechi lor sa grand privilege pou servi dan Béthel-la.

⁵ Bann bienfait ki nou gagné pou servi dan Béthel: La Tour de Garde 15 juin 1994, en français, ti faire sa remark-la: “Enn Béthélite ena privilege pou servi Jéhovah avek so bann frere ek soeur toulé-jour. (Psaume 26:12)! C’est enn bon l’occasion ki li ena pou augmente so maturité spirituel!” Oui, c’est enn bienfait extraordinaire ki nou gagné kan nou servi dan Béthel. Bann Béthélite gagne l’occasion pou travail ensam avek bann frere ki fidele depuis longtemps. De temps en temps, zot gagne visite enn membre College central. N’importe ki travail ki zot gagné pou faire, c’est vrai-mem enn benediction pou travail dan l’unité avek sa bann frere-la.

⁶ Programme enn Béthélite: Enn Béthélite li bien absorbé par bann activité ki ena enn rapport avek Royaume Bondié. Depuis lundi ziska vendredi, a partir 6 heure 45, li assisté texte du jour dan la salle a mangé. Certain membre la famille faire commentaire lor texte du jour. Apré sa, enn frere ki ena l’experience presente enn ti discours ek finalement, faire la priere. Sa permette bann membre la famille pou fortifié-zot lor plan spirituel avant zot commence zot la journée travail. Apré enn bon ti-dejeuner, sakenn al faire travail ki’nn donne li. Depuis lundi ziska vendredi, li commence travail 7 heure 30, pou fini 4 heure 30, li faire enn pause enn heure-temps pou dejeuner. Enn Béthélite passe so bann soirée, so bann samedi, ek dimanche pou al reunion, preché, etudié ek accompli bann lezot responsabilité. Li kapav al dan bibliothek Béthel pou al etudié ek pou prepare so bann reunion. Bien sur, li prend aussi le temps pou reposé ek pou detann-li. (Marc 6:31, 34). Béthel permette li pou consacré la plupart so le temps dan service sacré.

⁷ Bann activité dan congregation: Dan Maurice ek Seychelles, bann Béthélite forme partie dan sept congregation. Zot conscient ki zot bizin reste actif pou zot garde enn bon spiritualité. A cause sa, zot assisté reunion dan zot congregation ek zot participe dan predication ensam avek zot bann frere ek soeur. En plus, chaque lundi soir, zot profite l’etude La Tour de Garde avek la famille Béthel. Tou travail ki faire dan Béthel tourne autour bann kitsoz spirituel. Sa permette zot pou ena enn la vie heureux dan service Jéhovah.​—1 Cor. 15:58.

⁸ Couma ou kapav prepare-ou pou servi dan Béthel? Si ou envie servi bien dan Béthel, fortifié ou spiritualité ek developpe bann bon relation avek Jéhovah. Choisir bann nouveau Béthélite surtout parmi bann pionnier. Mais sa service-la pa reservé zis pou bann ki pionnier. Tou bann ki rempli bann condition ki bizin, kapav rempli enn demande pou rente Béthel. Ek aussi, ki enn kikenn qualifié dan certain domaine ou-soit non, li bizin kapav konn vive avek lezot pou faire enn travail l’equipe. Fodé pa li ena enn l’esprit competition ek independance. Mais li bizin cooperé ek ena l’amour, ek aussi enn desir pou soumette ar direction theocratik.​—Guette Éphésiens 4:16.

⁹ Parmi peuple Jéhovah, bann jeune ena possibilité pou travail ek pou developpe bann capacité ki’nn mentionné la-haut. Alors, si invite zot pou travail Béthel, zot pou gagne plus formation pou zot kapav assume bann lezot responsabilité. Nou invite bann parent ek bann ancien pou koz souvent lor service Béthel avek bann jeune. Bann parent amenn souvent zot zenfant pou visite Béthel, seki permette zot pou koné ki faire dan enn Béthel, ek sa kapav pousse zot pou rempli enn demande pou rente dan Béthel kan zot fini lekol.

¹⁰ Nou ti pou bien content gagne bann frere ek soeur ki ena l’experience dan domaine electronik ek dan programmation bann computer, pou vinn travail Béthel. L’organisation veillé ki bann dizaine photocopieuse, imprimante, ek computer ki Béthel servi, marche bien. Nou bizin aussi bann plombier ek bann dimoune ki konn faire maintenance. Dan traduction, bizin bann frere ek soeur ki konn bien anglais ek ki zot langue maternel, c’est créole.

¹¹ Nou bizin surtout bann frere celibataire, mais bann frere ki marié, ek ki qualifié dan certain domaine precis, kapav invité pou rente Béthel. Ou kapav gagne bann form pou rente Béthel avek surveillant circonscription ou-soit pendant bann l’assemblée district, ou-soit ou kapav ecrire la filiale. Si ou marié, rappel ki ou femme aussi bizin ena bann qualité spirituel ek ena enn bon la santé lor plan physik ek affectif. Si ou finn gagne enn formation ou-soit ou ena l’experience dan enn parmi bann domaine ki finn mentionné la-haut, donne tou bann renseignement lor ou lettre, ek mette sa ensam avek ou form.

¹² Eski ou kapav reflechi lor la? Bizin toujours bann volontaire dan Béthel. Si ou rempli bann condition ki bizin pou rente Béthel, nou encourage ou pou rempli enn demande. Pa bizin decouragé si pa invite ou desuite. Ou kapav renouvelé ou demande chaque l’année, sa pou montré ki ou encore disponible. Dan chaque l’assemblée district, ena enn reunion en rapport avek service Béthel, ek ladan donne bann l’encouragement ek bann conseil precis, bann ki interessé ar sa service ki ena valeur-la. Kifer ou pa assisté sa reunion-la dan prochain l’assemblée district. Nou invite ou pou faire sa!

¹³ Kan Jéhovah ti demandé: “Kisannla ki mo pou envoyé, ek kisannla ki pou al pou nou?” Isaïe ti reponn sans hesité: “Ala mo la. Envoye moi.” Ou pou gagne beaucoup bienfait si appel ou pou servi dan Béthel, “lakaz Bondié.”​—Is. 6:8.