Revision Lekol ministere theocratik
Nou pou examine bann question ki lor sa feuille-la dan Lekol ministere theocratik pendant semaine ki commence a partir le 28 juin 2010. Surveillant lekol pou faire enn revision pendant 20 minute. Sa revision-la basé lor bann sujet ki ti faire a partir semaine 3 mai ziska 28 juin 2010.
1. Ki nou aprann ar deuil ki David ti gardé a cause Abner? (2 Sam. 3:31-34) [3 mai, w05-CE 1/7 p. 9 § 5; w06-CE 1/8 p. 15 § 9-10] Kan le roi David ti pé loué bann qualité Abner ek ti donne l’ordre ki tou dimoune garde deuil, sa ti montré David so l’humilité, so patience, so tolerance ek so confiance dan Jéhovah. Li pa ti ena enn l’esprit pou tire vengeance ek li pa ti nourri okenn mauvais sentiment. C’est enn bon l’exemple pou bann chretien zordi ki bizin faire face ar l’imperfection lezot.
2. Ki erreur Nathân ti faire, ek kifer Jéhovah pa ti rejette li en tant ki so prophete? (2 Sam. 7:3) [10 mai, rs-F p. 153 § 9] Nathân ti encourage le roi David pou faire dapré seki ti ena dan so leker pou range enn lakaz pou adore Jéhovah, mais sa pa ti en accord avek volonté Jéhovah. Mem si Nathân ti mal conseil David, Jéhovah pa ti rejette Nathân, parski kan Jéhovah ti faire li konn So volonté, avek humilité li ti corrige sa situation-la.
3. Couma eski 2 Samuel 7:14 inn realisé? [10 mai, it-1-F p. 279 § 3; p. 554 § 5] Jéhovah ti permette ki lakaz David gagne enn punition parski plusieurs mauvais le roi ti mal represente Li. Sa punition-la inn arrive so top en 607 avant nou lepok, depuis sa okenn le roi, ni enn kikenn ki ti ena droit vinn le roi ti pou apparette ziska l’an 29 nou lepok, kan heritier permanent le roi David ti pou apparette.
4. Couma bann action ki David ti faire envers Mephibosheth ti montré so l’amour fidele, ek ki l’effet sa bizin ena lor nou? (2 Sam. 9:7) [17 mai, w02-CE 1/6 p. 16 § 5] La Bible koz lor l’hospitalité ki David ti contigne manifesté envers Mephibosheth, couma enn action ki ti montré so l’amour fidele. Sa ti enn preuve so fidelité envers enn relation ki ti’nn deja etabli. (1 Sam. 18:3; 20:15, 42) Zordi, mem si bann serviteur Bondié montré enn bonté naturel envers tou dimoune en general, zot contigne manifesté l’amour fidele envers bann dimoune avek ki zot ena bann relation ki approuvé par Bondié.
5. Ki bann leson nou kapav aprann ar relation ki ti ena entre Ittaï, enn Guittite, ek le roi David? (2 Sam. 15:19-22) [24 mai, w09-F 15/5 p. 27-28] Ittaï ek David toulé-deux ti kapav trouve pli loin ki la haine ki ti ena entre bann Israélite ek bann Philistin. Ittaï ti trouve David couma enn kikenn ki ti content Jéhovah ek ti remark so bann bon qualité. David ti ena enn grand l’estime pou Ittaï, li ti mette li en charge enn tiers so l’armée. (2 Sam. 18:2) Nou aussi nou bizin faire zeffort pou trouve pli loin ki bann difference ki ena a cause culture ek race, ek remark bann bon qualité ki lezot ena.
6. Couma la Bible aide nou pou comprend ki l’accusation ki Tsiba ti faire kont Mephibosheth ti fausse? (2 Sam. 16:1-4) [31 mai, w02-CE 1/3 p. 10 § 11, note.] Mephibosheth ti ena reconnaissance ek l’humilité. Nou pa kapav attann ki enn dimoune coumsa essaye prend place le roi. Avek humilité, so papa, Yonathân, ti reconette ki Jéhovah ti’nn choisir David pou vinn le roi en Israël. (1 Sam. 20:12-17) A cause l’amitié fidele ki li ti ena avek David, Yonathân pa ti pou enseigne so jeune garson pou rod gagne pouvoir royal.
7. Kan David ti demann Barzillaï, ki ti ena 80 an, pou forme partie dan la cour royal, kifer Barzillaï ti conseil li prend plutot Kimham? (2 Sam. 19:33-37) [7 juin, w07-CE 1/6 p. 27 § 13] David ti envie recompense Barzillaï parski li ti’nn soutenir li ek so l’armée pendant rebellion Absalom. (2 Sam. 17:27-29) Mais parski li ti nepli gagne gout mangé et li ti nepli tendé pareil couma avant, Barzillaï pa ti montré-li egoïste, li ti demandé ki Kimham gagne sa privilege pou mange lor la table le roi-la. Zordi beaucoup serviteur Jéhovah ki agé ena mem l’attitude ki li, zot pa egoïste ek zot genereux, zot koné ki Jéhovah prend plaisir ar n’importe ki sacrifice ki zot faire. (Héb. 13:16)
8. Couma l’humilité Jéhovah ti donne David grandeur? (2 Sam. 22:36) [14 juin, w07-F 1/11 p. 5 § 1; w04-F 1/11 p. 29] Jéhovah Li humble dan sens ki Li ena enn grand compassion pou bann dimoune ki faire bann zeffort sincere pou gagne so faveur, ek Li ena pitié pou zot. Kan Samuel ti vini pou choisir enn nouveau le roi en Israël parmi bann huit garson Jessé, pa ti mem presente li David, ki ti pli jeune. C’est zis kan Samuel ti insisté, ki lerla Jessé ti faire criyé David ki ti pé gardien bann mouton. (1 Sam. 16:6-13) Jéhovah ti montré l’humilité kan li ti prend compte jeune David ek ti donne li grandeur.
9. Kifer Adoniya ti rod prend trone alors ki David ti encore vivant? (1 Rois 1:5) [21 juin, w05-CE 1/8 p. 28 § 5] La Bible pa dire kifer, mais li raisonnable pou croire ki Adoniya ti pensé ki, en tant ki pli grand garson David ki ti encore vivant, li ti ena droit pou vinn le roi. (2 Sam. 3:2-4; 13:28, 29; 18:14-17) Adoniya ti gagne soutien Yoab, chef l’armée, ek grand pretre, Abiathar, toulé-deux, alors, li ti sur ki li ti pou reussi. Parski li pa ti invite Salomon pou “enn sacrifice,” sa faire nou pensé ki li ti considere li couma so rival. (1 Rois 1:9, 10)
10. Kifer Jéhovah ti reponn la priere Salomon ki ti demann sagesse ek discernement? (1 Rois 3:9) [28 juin, w05-CE 1/8 p. 30 § 2] Mem si sa ti enn demande personnel, Salomon ti faire sa dan l’interet Bondié ek so peuple. Li pa ti faire sa avek bann mauvais mobile ek sa pa ti kont volonté Bondié. Zordi aussi pareil, bann serviteur Jéhovah ena l’assurance ki Jéhovah pou reponn zot la priere sincere pou gagne sagesse, l’intelligence ek so direction pou zot reussi accompli so service. (Jacq. 1:5)