Question Ki’nn Soulevé

◼ Kifer bizin ena enn bon jugement concernant connection par telephone dan bann reunion la congregation?

Beaucoup congregation finn prend disposition pou mette enn telephone dan la Salle du Royaume. Ek bann ki pa kapav vinn reunion a cause enn maladie ou-soit lezot situation ki pa kapav evité, zot kapav suive reunion dan zot lakaz par telephone. Sa c’est enn disposition ki’nn prend par amour. Sa demann enn bon jugement ek enn bon l’organisation pou faire sur ki bann ki pé profite sa disposition-la ena vrai-mem bann bon raison pou servi sa moyen-la. Alors, bann ancien ki en charge sa disposition-la pou envie organise ek controle so l’utilisation pou ki “tou kitsoz passe couma bizin ek dan l’ordre.”—1 Cor. 14:40.

Bann ancien bizin donne priorité bann proclamateur ki ena enn maladie chronik ou-soit ki pa kapav sorti kot zot. Enn proclamateur ki malade pou enn periode le temps ki courte, ou-soit enn etudiant la Bible ki pé faire progré mais ki pa kapav sorti kot li, kapav profite sa disposition-la ek pou compte zot dan l’assistance. Si pena assez telephone pou tou bann dimoune ki vrai-mem bizin sa disposition-la, kitfois kapav servi lezot moyen, couma par exemple, enregistré reunion ek donne zot sa apré.

Bien sur, nanyin pa remplace bann bienfait ki nou gagné kan nou present dan nou bann reunion. Kan nou dan la Salle du Royaume avek nou bann frere, sa permette ki ena “enn l’echange l’encouragement” ek sa aide bann nouveau pou apprecié l’importance pou vinn reunion. Kan nou present dan nou bann reunion, nou capté pli bien bann demonstration, bann ancien kapav donne nou enn l’aide personnel, ek nou profite directement l’amour nou bann frere. Enn soeur ti maye enn lot soeur ki agé dan so lé-bras, alors ki soeur agé-la ti pé retourne so lakaz apré reunion. Seki sa soeur agé-la inn dire, li bien vrai: “Ou pa kapav gagne sa par telephone!”—Rom. 1:11, 12.

Pareil couma Anne “ki jamais pa ti absent dan temple,” zordi beaucoup nou bann frere ek soeur agé assisté regulierement bann reunion tant ki zot situation ek zot la santé permette zot. (Luc 2:36, 37) Bann frere ek soeur agé pa considere telephone couma enn moyen pou pa assisté reunion, mais zot servi telephone kan necessaire. Anou imite zot bon l’exemple ek contigne faire zeffort pou nou present dan nou bann reunion pendant ki nou pé adore nou grand Bondié, Jéhovah.—Ps. 95:1-3, 6; 122:1.