Couma ou pou reponn?
1. Kifer nou bizin imite l’exemple Jésus kan dimoune pose nou question?
1 Ziska zordi, bann dimoune impressionné par fason ki Jésus ti reponn bann question ki bann dimoune ti pose li. Dan nou ministere, li bon ki nou imite Jésus kan bann dimoune pose nou tou sorte qualité question.—1 Pierre 2:21.
2. Ki kapav aide nou pou donne enn bon reponse kan enn dimoune pose nou enn question?
2 D’abord ecouté: Jésus ti reflechi lor raison ki ti pousse enn dimoune pou pose li question. Dan nou cas, parfois nou pou bizin pose dimoune-la bann question pou koné vrai-mem seki li pé envie dire nou. Si enn dimoune demann ou: “Eski ou croire dan Jésus?,” kitfois li envie koné vrai-mem kifer ou pa fête Noël. Si ou reussi trouve vrai raison pou kifer enn dimoune pose ou question, ou pou kapav faire li raisonné avek plus efficacité.—Luc 10:25-37.
3. Ki nou ena pou aide nou trouve bann bon reponse biblik?
3 Reponn avek Parole Bondié: Souvent, li pli bon pou servi la Bible pou reponn bann question. (2 Tim. 3:16, 17; Héb. 4:12) Livre Comment raisonner ek bann “ Sujets de conversation bibliques ” ki ena dan Les Saintes Écritures — Traduction du monde nouveau, finn aide bann proclamateur pou donne bann bon reponse. Mem si enn dimoune ki pose question pa considere la Bible couma enn livre sacré, avek tact ou pou kapav montré li seki la Bible enseigné. Encourage dimoune-la pou reflechi bien lor la sagesse pratik ki trouve dan la Bible. Kan nou imite Jésus, bann reponse ki nou pou donné pou “couma bann pomme en or lor enn plateau en argent,” setadir, ki digne, ki joli, ek ki ena valeur.—Prov. 25:11.
4. Dan ki l’occasion li pli bon ki nou pa essaye reponn tou question ki dimoune pose nou?
4 Eski nou bizin reponn tou question? Si ou pa konn enn reponse, pa hesité pou dire: “Mo pa koné, mais mo pou faire recherche lor ou question, ek apré mo pou donne ou enn reponse kan mo révini.” Kan ou manifesté sa qualité l’humilité-la ek kan ou montré l’interet personnel pou enn dimoune, sa kapav motive li pou invite ou pou révini. Si ou trouvé ki enn dimoune ki opposé avek nou, pé pose ou question zis pou leve enn discussion, imite Jésus ek avek beaucoup respé termine conversation-la la mem. (Luc 20:1-8) Li pareil aussi kan enn dimoune ki pa interessé pou konn la verité essaye pousse ou pou rente dan enn debat. La, ou kapav avek gentillesse, arrete sa conversation-la, ek servi ou le temps pou rod bann ki sincere.—Mat. 7:6.
5. Ki l’exemple Jésus inn laissé dan fason pou reponn bann question?
5 Jésus ti koné ki bizin ena confiance en Jéhovah pou ki kapav rempli mission pou “rann temoignage lor la verité,” seki implik aussi pou reponn bann dimoune sincere. (Jean 18:37) Oui, c’est enn grand privilege pou imite Jésus kan nou donne enn reponse bann ki “ena l’attitude ki bizin pou gagne la vie eternel”!—Actes 13:48.