Revision Lekol ministere theocratik
Nou pou examine bann question ki lor sa feuille-la dan Lekol ministere theocratik pendant semaine ki commence a partir le 31 août 2009. Surveillant lekol pou faire enn revision pendant 20 minute. Sa revision-la basé lor bann sujet ki ti faire a partir semaine 6 juillet ziska 31 août 2008.
1. Kifer n’importe kisannla ki ti “maudit” lor so bann parent ti condamné a mort? (Lév. 20:9) [6 juillet, w04-CE 1/6 p. 22 § 6] Jéhovah considere enn mauvais l’attitude rempli avek la haine pareil couma enn crime. C’est a cause sa ki Li ti donne l’ordre ki enn zenfant ki ti maudi so bann parent, gagne mem punition ki enn zenfant ki ti touye so bann parent. Sa bizin encourage enn chretien pou montré l’amour, pa la haine, pou so bann compagnon chretien. (1 Jean 3:14, 5)
2. Si tou bann Israélite male ti bizin assisté fête Gateau sans levain, kisannla ti pou recolté bann premier recolte l’orge ki zot ti offert? (Lév. 23:5, 11) [13 juillet, w07-F 15/7 p. 26 § 3] Commandement pou offert Jéhovah bann premier recolte l’orge pou fête Gateau sans levain, ti donné ar tou le peuple. Chaque dimoune pa ti bizin commence recolte ek amenn so premier recolte dan temple. Plutot, le peuple ti gagne l’ordre pou faire bann representant faire sa. Alors, enn groupe dimoune ki ti represente le peuple ti kapav al coupe bann branche l’orge pou sa fête-la, dan enn karo ki ti pré.
3. Ki l’année Jubilé ti representé? (Lév. 25:10, 11) [20 juillet, w04-F 15/7 p. 26-27] Jubilé ti enn l’année retablissement ek liberation pou nation Israël ki ti existé dan le passé. Bann chretien ki ena l’espoir pou al dan le ciel gagne enn liberation ar “la loi peché ek la mort” kan Bondié declare zot juste ek adopté zot couma so bann garson ek faire zot vinn so bann oint par l’esprit saint. (Rom 8:2) Pou bann “lezot brebis,” Regne mille an Christ pou represente enn Jubilé ek pendant sa Regne-la, Jésus pou applik bann bienfait so sacrifice dan enn fason complet pou cancel tou bann l’effet peché ek la mort. (Jean 10:16; Rom. 8:21)
4. Eski “bann signe” ki mentionné dan Nombres 2:2 ena enn signification religieux pou Israël? [27 juillet, w02-F 15/9 p. 21 § 4] Non. Sa bann signe-la pa ti consideré couma enn kitsoz sacré dan Israël, ek pa ti associé zot avek okenn ceremonie religieux. Sa bann signe-la ti zis enn moyen pratik pou montré chaque trois groupe Israélite ki coté zot ti bizin rassemblé kan zot ti pé campé autour tabernacle.
5. Pareil couma bann naziréen dan le passé en Israël, ki l’attitude bann proclamateur a plein temps ena zordi? (Nomb. 6:3, 5, 6) [3 août, w04-CE 1/8 p. 29-30] Pareil couma bann naziréen dan le passé ti ena enn l’esprit sacrifice, zordi aussi bann serviteur a plein temps ena enn l’esprit sacrifice ek soumission ar Jéhovah ek pou so bann disposition, mem si zot pa’nn faire okenn voeu.
6. Ki principe dan la loi concernant retraite bann Lévite kapav appliké ar peuple Jéhovah zordi? (Nomb. 8:25, 26) [10 août, w04-CE 1/8 p. 30 § 1] Zordi nou pa prend retraite dan travail predication. Mais principe ki nou tiré dan sa la loi-la enseigne nou enn leson ki ena enn grand valeur. Si enn chretien nepli kapav rempli certaine obligation parski li’nn rente dan l’age, li kapav servi dan enn lot forme service dapré so possibilité.
7. Couma bann Israélite ti manifesté “enn desir egoïste,” ek ki leson bann chretien zordi kapav tiré zordi? (Nomb. 11:4) [17 août, w01-F 15/6 p. 14; w95-F 1/3 p. 15 § 10] Parski zot ti mank reconnaissance pou bann disposition Jéhovah, sa grand peuple melangé-la ti commence plaigné kont Jéhovah. Sa mank reconnaissance-la ti ena enn mauvais l’influence lor bann Israélite ek sa ti faire zot nepli satisfait ar seki Jéhovah ti donne zot. Zot ti ena enn desir egoïste pou bann confort materiel ki zot ti’nn quitte derriere zot, dan sa pays kot zot ti été-la. Zordi, si nou plaigné lor bann kitsoz ki Jéhovah donne nou, sa kapav empeche nou apprecié nourriture spirituel ki Li donne nou a travers “l’esclave fidele et avisé.” (Mat. 24:45-47)
8. Kifer zis Miriam ki ti gagne la lepre, ek ki leson important nou kapav aprann? (Nomb. 12:9-11) [17 août, w04-CE 1/8 p. 31 § 2; it-2-F p. 295 § 1] Zis Miriam ki ti gagne la lepre parski c’est li ki ti commence plaigné kont Moïse ek ki ti convaink Aaron pou faire pareil couma li. Alors ki li pa ti bon ki Miriam ek Aaron toulé-deux plaigné kont Moïse, li ti pire pou Miriam, a cause role ki Jéhovah inn donne bann femme: zot bizin soumette ar bann zom. (1 Cor. 11:3; 1 Tim. 2:11-14) Nou aprann enn leson bien important: Jéhovah attann ki nou respecté so bann representant.
9. Ki Josué ek Caleb ti pé rod dire kan zot ti pé compare bann habitant Canaan couma “di-pain”? (Nomb. 14:9) [24 août, w06-CE 1/10 p. 16 § 5; it-2-F p. 472] Josué ek Caleb ti trouvé couma Jéhovah ti abaisse grand puissance l’Égypte ek so bann bondié kan Li ti envoye dix plaie. Zot ti trouve Jéhovah noye Pharaon ek so l’armée dan la mer Rouge. Alors, kan zot ti dire bann Israélite ki ti’nn rassemblé ki bann habitant Canaan “coumadir di-pain pou nou,” kitfois Josué ek Caleb ti pé rod dire ki ti pou kapav combatte bann Cananéen avek l’aide Jéhovah ek ki sa l’experience-la ti pou fortifié Israël.
10. Ki l’avertissement ena dan Nombres 21:5? [31 août, w99-F 15/8 p. 26-27] Bann dimoune imparfait kapav perdi zot reconnaissance pou bann kitsoz ki zot gagné toulé-jour—mem si sa bann kitsoz-la montré l’interet sincere ki Jéhovah ena pou nou. Au commencement, bann Israélite ti bien content kan Jéhovah ti faire mirak pou donne zot la manne, mais apré inpé le temps, beaucoup parmi zot ti commence plaigné—sa ti montré ki zot ti pé commence “eloigne-zot ar Bondié vivant.” (Héb. 3:12) Nou bizin bien prend compte sa l’avertissement-la pou ki jamais nou pa laisse bann l’enseignement la Bible ou seki nou gagné a travers l’organisation Bondié vinn enn kitsoz normal, ou-soit banal, dan nou l’esprit.